ދެވަނަ ބޮޑު ހަނގުރާމައިގެ ދުވަސްވަރު ހިންގި ޖަރީމާތަކަށް ޕޮލެންޑްގެ ކިބައިން ޖަރުމަނުން މައާފަށް އެދިއްޖެ
ވިއެލުން އަކީ ޖަރުމަނުގެ ބޮން ވައްޓާލި ފުރަތަމަ ސަރަހައްދު
މަރުވެގެން ދިޔަ މީހުންގެ ހަދާނުގައި ހަމަހިމޭންކަމުގެ ސްކޫތްކޮޅެއްވެސް މި ހަފްލާގައި ގެންގޮސްފައިވޭ
ދެވަނަ ބޮޑު ހަނގުރާމައިގެ ދުވަސްވަރު ނާޒީ ޖަރުމަނުން ޕޮލެންޑާ ދޭތެރޭ ކަންތައް ކުރި ގޮތާމެދު ޖަރުމަނުގެ މިހާރުގެ ރައީސް ފްރޭންކް ވަލްޓާރ ސްޓެއިންމެއަރ ޕޮލެންޑްގެ ކިބައިން މައާފަށް އެދިއްޖެއެވެ.
ޕޮލެންޑްގެ ވިއެލުންގައި އާދިއްތަ ދުވަހު ކުރިއަށް ގެންދިޔަ ހަފްލާއެއްގައި ސްޓެއިންމެއަރ ވަނީ ނާޒީ ޖަރުމަނުގެ ހަރުކަށިކަން ކުއްވެރިކޮށްފައެވެ. އޭނާއާއެކު ވާހަކަދައްކަވަމުން ޕޮލެންޑްގެ ރައީސް އަންޒްރެޖް ޑޫޑާ ވަނީ ނާޒީ ޖަރުމަނުގެ ހަރުކަށިކަމަކީ ލާއިންސާނީ އަމަލުތަކެއް ކަމަށް ވިދާޅުވެފައެވެ.
މި ހަފްލާގައި ވަނީ ދެވަނަ ބޮޑު ހަނގުރާމައިގެ ދުވަސްވަރު މަރުވެގެން ދިޔަ މީހުންގެ ހަދާނުގައި ހަމަހިމޭންކަމުގެ އެއްމިނެޓްގެ ސްކޫތްކޮޅެއްވެސް ބާއްވާފައެވެ.
ވިއެލުން އަކީ ޖަރުމަނުގެ ބޮން ވައްޓާލި ފުރަތަމަ ސަރަހައްދެވެ. ދެވަނަ ބޮޑު ހަނގުރާމައިގައި ޕޮލެންޑްގެ ހަ މިލިއަނަށްވުރެ ގިނަ މީހުން ވަނީ މަރުވެފައެވެ. ޕޮލެންޑުން އަދިވެސް ދަނީ ޖަރުމަނުގެ ފަރާތުން މަރުތަކުގެ ބަދަލު ދިނުމަށް އެދެމުންނެވެ.
