ވަގަށް ވެހިކަލް އެތެރެކުރާ މައްސަލަ ތަހުގީގުކުރަނީ

ރާއްޖެއަށް ވަގަށް އެތެރެކޮށްފައިވާ ކަމަށް ތުހުމަތުކުރެވޭ ވެހިކަލްތަކެއް އަތުލައިގަނެ އެ މައްސަލަތައް ކަމާބެހޭ އިދާރާތަކާއި ގުޅިގެން ތަހުގީގު ކުރަމުންދާ ކަމަށް ކަސްޓަމްސްއިން ބުނެފިއެވެ.

ކޮމިޝަނާ ޖެނެރަލް އޮފް ކަސްޓަމްސް އަހުމަދު ނުއުމާން ވިދާޅުވީ އެ މައްސަލައިގެ ތަހުގީގު ކުރިއަށްދާ ކަމަށާއި އެކަމުގެ މައުލޫމާތު ސިއްރު ނުކުރައްވާނެ ކަމަށެވެ.

ކަސްޓަމްސްއާ މޯލްޑިވްސް ޕޮލިސް ސަރވިސް ގުޅިގެން ހިންގުނު އޮޕަރޭޝަނުން މިހާތަނަށް ވަގަށް އެތެރެކުރި 21 އުޅަނދެއް ވަނީ ހިފަހައްޓާފައެވެ. އޭގެ ތެރޭގައި ހިމެނެނީ 3 ކާރު، 2 ޕިކަޕް، 2 ވޭން އަދި 14 ސައިކަލު ކަމަށް ކަސްޓަމްސްއިން ބުނެއެވެ.

މިވެހިކަލްތަކުގެ ޖުމްލަ ސީ.އެންޑް.އެފް އަގު 586،000 (ފަސްލައްކަ އަށްޑިހަ ހަހާސް) ރުފިޔާއަށް އަންދާޒާ ކުރެވޭއިރު މިތަކެތީގެ އިމްޕޯޓު ޑިއުޓީގެ ގޮތުގައި ދައުލަތަށް 558،000 (ފަސްލައްކަ ފަންސާސްއަށް) ރުފިޔާ ލިބެންޖެހޭނެ ކަމަށް އަންދާޒާ ކުރެވޭ ކަމަށް ކަސްޓަމްސްއިން ވަނީ ބުނެފައެވެ.