ދުނިޔޭގެ އެންމެ ބޮޑު އެއާޕޯޓްގެ މަސައްކަތް މަޑުޖައްސާލައިފި

ދުބާއީގައި ހަދާ ދުނިޔޭގެ އެންމެ ބޮޑު އެއާޕޯޓް ކަމަށްވާ އަލް މަކްތޫމްގެ މަސައްކަތް ވަގުތީގޮތުން މަޑުޖައްސާލައިފިއެވެ.

ޚަބަރުތައް ބުނާގޮތުން އަލް މަކްތޫމް އެއާޕޯޓްގެ މަސައްކަތް މަޑުޖައްސާލީ ގަލްފުގެ ގައުމުތަކުގެ އިގްތިސާދު ދަށަށް ދާން ފެށުމުންނެވެ.

މި އެއާޕޯޓަކީ އަހަރަކު 250 މިލިއަން ފަސެންޖަރުންނަށް ޚިދުމަތް ދެވޭނެ ގޮތަށް ފަރުމާކުރާ އެއާޕޯޓެކެވެ.

ވިޔަފާރި ޚަބަރު ގެނެސްދޭ ވެބްސައިޓެއް ކަމަށްވާ ބްލޫމާގްގައި ބުނެފައިވާ ގޮތުން 36 ބިލިއަން އެމެރިކާ ޑޮލަރަށް ހަދާ މި އެއާޕޯޓް ލަސްކޮށްފައިވަނީ 2030 ގެ ނިޔަލަށެވެ. ކުރިން އެއާޕޯޓްގެ މަސައްކަތް ނިންމުމަށް ހަމަޖައްސާފައި އޮތީ 2025 ވަނަ އަހަރުގެ ނިޔަލަށެވެ. އެގޮތަށް ނިންމާފައިވަނީ އިގްތިސާދީގޮތުން ދަށަށް ދިއުމާއި އެންމެ ފަހުގެ ޓެކްނޮލިޖީ އެންމެ ފުރިހަމައަށް ބޭނުން ކުރުމަށް ކަމަށް އެއާޕޯޓް ހެދުމުގައި އިސްކޮށްއުޅޭ ފަރާތަކާއި ހަވާލާދީ އެނޫހުގައި ބުނެފައި ވެއެވެ.

އަލް މަކްތޫމް އެއާޕޯޓްގެ ބައެއް ނިންމައި މިހާރުވެސް އެއާޕޯޓްގެ ޚިދުމަތް މަދު އެއާލައިނަކަށް ދަނީ ދެމުންނެވެ.

ގަލްފުގެ ގައުމުތަކުގެ ސިޔާސީ މަސްރަހު ހަލަބޮލިވުމާއި ގުޅިގެން އެގައުމުތަކުގެ އިގްތިސާދަށް ވަނީ ލޮޅުންތަކެއް އަރާފައެވެ. އެގޮތުން 2017 ވަނަ އަހަރު އެގައުމުތަކުގެ އިގްތިސާދު 2.8ޕަސެންޓަށް ކުރިއެރި އިރު، 2018 ވަނަ އަހަރު ކުރިއަރާފައި ވަނީ 1.94 ޕަސެންޓުގައެވެ.