ވޯލްޑް ޖޫނިއާ ސްވިމިންގ ޗެމްޕިއަންޝިޕްގައި އަލީ އިމްއާން ދެ އިވެންޓަކުން ގައުމީ ރެކޯޑު އާކޮށްފިއެވެ.

ހަންގޭރީގައި ކުރިޔަށްދިޔަ މުބާރާތުގައި އިމްއާން ގައުމީ ރެކޯޑު އާކުރީ 200 މީޓަރު ބެކްސްޓްރޯކް އަދި 50 މީޓަރު ބެކްސްޓްރޯކްއިންނެވެ.

200 މީޓަރު ބެކްސްޓްރޯކް އިން އިމްއާން ގައުމީ ރެކޯޑު މުގުރާލީ ދެ މިނެޓު 28.17 ސިކުންތުން ރޭސް ނިންމައިގެންނެވެ.

މި ރެކޯޑު ކުރިން ވެސް އޮތީ އިމްއާން އަތުގައެވެ. މިދިޔަ މަހު ކޮރެއާގައި އޮތް 18 ވަނަ ފީނާ ވޯލްޑް ޗެމްޕިއަންޝިޕްގައި އޭނާ ރެކޯޑު ހެދީ 02 މިނެޓު 33.23 ސިކުންތުން ރޭސް ނިންމައިގެންނެވެ.

50 މީޓަރު ބެކްސްޓްރޯކް އިވެންޓުން އިމްއާން ގައުމީ ރެކޯޑު އާކުރީ 30.86 މިނެޓުން ރޭސް ނިންމައިގެންނެވެ. ކުރިން މި ރެކޯޑު އޮތީ ހުސެއިން ހާއިޝް އަތުގައެވެ. އޭނާ ރެކޯޑު ހެދީ މިދިޔަ އަހަރު އޭޝިއަން ގޭމްސްގައި 31.95 މިނެޓުން ރޭސް ނިންމައިގެންނެވެ.

މި މަހުގެ 18 އިން 25 އަށް ކުރިޔަށް ދިޔަ ވޯލްޑް ޖޫނިއާ ސްވިމިންގ ޗެމްޕިއަންޝިޕްގައި ރާއްޖެއިން ބައިވެރިވީ އިމްއާންގެ އިތުރުން ހާއިޝް އަދި ހަމްނާ މުހައްމަދުއެވެ.