ސަރުކާރުން ހުށައެޅި ބަޖެޓުގެ ބޮޑު އިންސައްތައެއް ސިއްހީ ނިޒާމު ހަރުދާނަ ކުރުމަށް
ސިއްހީ ހާލަތު ރަނގަޅު ކުރެވޭނީ ރަނގަޅު އިންވެސްޓްމެންޓް ތަކުން ކަމަށް ވިދާޅުވި
ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގައި ފިނޭންސް މިނިސްޓަރު އިބްރާޙިމް އަމީރު
ސަރުކާރުގެ ފަރާތުން ހުށައަޅާފައިވާ ބަޖެޓުގެ ބޮޑު އިންސައްތައެއް ސިއްހީ ނިޒާމު ހަރުދާނަ ކުރުމަށް ކަނޑައަޅަފައިވާކަން ހާމަވެއްޖެއެވެ.
މި އަހަރުގެ ބަޖެޓަށް ހެލްތް މިނިސްޓްރީ އަށް އިތުރު ކޮށްފައިވަނީ 309,674,646 (ތިންސަތޭކަ ނުވަ މިލިއަން ހަ ލައްކަ ހަތްދިހަ ހަތަރު ހާސް ހައްސަތޭކަ ސާޅިސް) ރުފިޔާއެވެ.
އާދިއްތަ ދުވަހު ބޭއްވި ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގައި ވާހަކަ ދައްކަވަމުން ފިނޭންސް މިނިސްޓަރު އިބްރާހީމް އަމީރު ވިދާޅުވީ، ރާއްޖޭގެ ސިއްހީ ދާއިރާ އޮތީ ވަރަށް ދަށް ހާލަތެއްގައި ކަމަށާއި، ރައްޔިތުންގެ އެންމެ ބޮޑު އެއް ޝަކުވާއަކީ ރަނގަޅު ސިއްހީ ނިޒާމެއް ނެތް ކަމުގެ ޝަކުވާ ކަމަށެވެ. ފިނޭންސް މިނިސްޓަރު ވިދާޅުވީ، ސިއްހީ ދާއިރާގެ ފެންވަރު ރަނގަޅު ކުރެވޭނީ މީހުންނަށާއި ތަކެއްޗަށް ކުރާ އިންވެސްޓްމެންޓް ތަކުން ކަމަށެވެ.
ސަރުކާރުގެ އަމާޒަކީ ސިއްހީ ހިދުމަތުގެ ފެންވަރު ރަނގަޅުކުރުން ކަމަށްވާއިރު، އިންވެސްޓްމެންޓް ތަކުގެ އެހީގައި އާސަންދައިގެ ތެރެއިން ބަލި މީހުން އެކި ތަންތަނަށް އުފުލުމާއި ރާއްޖެއިން ބޭރަށް ގެންދިޔުމުގެ ހަރަދު ކުޑަކުރެވޭނެ ކަމަށް އަމީރު ވިދާޅުވިއެވެ. އައިޖީއެމް ހޮސްޕިޓަލުގެ ފެންވަރު ރަނގަޅު ކުރުމަށް އެޅޭ އެންމެ ބޮޑު ފިޔަވަޅަކީ އެއީ ކަމަށް އަމީރު ފާހަގަ ކުރައްވަމުން ވިދާޅުވީ، އައިޖީއެމްއެޗަކީ ޓާޝަރީ ހިދުމަތްދެވޭ ހޮސްޕިޓަލަކަށް ހެދުމުގެ ފުރުސަތު ލިބޭނެ ކަމަށެވެ.
ބަޖެޓް ގައި ސިއްހީ ދާއިރާއަށް ކަނޑައަޅާފައިވާ އަދަދުތަކުގެ ތަފްސީލު ދެއްވަމުން އަމީރު ވިދާޅުވީ، ހުޅުމާލޭ ހޮސްޕިޓަލުގައި ކުރީ ސަރުކާރު މެދުވެރިކޮށް އާސަންދައިން ހުއްޓިފައި އޮތް މަޝްރޫއުތައް އަލުން ފަށައި ހިދުމަތް ފޯރުކޮށްދިނުމަށް 150 މިލިއަން ރުފިޔާ ކަނޑައަޅާފައިވާ ކަަމަށެވެ.
