ހޮންގްކޮންގުގައި ކުރަމުންދާ މުޒާހަރާތަކާ ބެހޭ ވީޑިއޯ ހިއްސާ ކުރާ ޔޫޓިއުބް އެކައުންޓުތައް ގޫގުލްއިން ހުއްޓުވައިފި
23 އޯގަސްޓު 2019 | ހުކުރު 03:17ގޫގުލްއިން ވަނީ މި ސަބަބާހުރެ 210 ޔޫޓިއުބް ޗެނަލެއް ޑިޒޭބަލް ކޮށްލާފަ
ހޮންގްކޮންގްގައި ކުރަމުންދާ މުޒާހަރާތަކުގެ ތެރެއިން
ހޮންގްކޮންގުގައި ކުރަމުންދާ މުޒާހަރާތަކާއި ބެހޭ ވީޑިއޯ ޔޫޓީއުބްގައި ހިއްސާކުރަން ހަދާފައިވާ އެކައުންޓުތައް ގޫގުލްއިން ހުއްޓުވައިފިއެވެ.
ގޫގުލްއިން ވަނީ މި ސަބަބާހުރެ 210 ޔޫޓިއުބް ޗެނަލެއް ޑިޒޭބަލް ކޮށްލާފައެވެ. އެ ކުންފުނިން ބުނެފައިވާ ގޮތުގައި އެފަދަ އެކައުންޓުތަކުގެ ފަހަތުގައި ތިބި ބަޔަކު ފޮރުވުމަށް ގިނަ މަސައްކަތްތަކެއް ކޮށްފައިވެއެވެ.
ގޫގުލްގެ ކުރިން ފޭސްބުކާއި ޓްވިޓާއިންވެސް ވަނީ، މުޒާހަރާތައް ކުރާ މަންޒަރު ދައްކުވައިދޭ ވީޑިއޯތައް ހިއްސާ ކުރާ އެކައުންޓުތަކާއިމެދު މިފަދަ ފިޔަވަޅެއް އަޅާފައެވެ. ނަމަވެސް ގޫގުލްއިން މިފަދަ ފިޔަވަޅެއް އެޅި ސަބަބެއް ކަމުގައި ބުނެފައިވަނީ މިހާރު ޑިސޭބަލްކޮށްލެވިފައިވާ އެކައުންޓުތަކުގެ ފަހަތުގައި ވަނީ ޗައިނާގެ ސަރުކާރު ކަމަށް ގަބޫލު ކުރެވޭތީ ކަމަށެވެ.
މީގެ އިތުރުން، މިކަމާ ގުޅިގެން، ޗައިނާގެ ބްރޯޑްކާސްޓް ކުރާ މީޑިއާ ތަކުގެ ތެރެއިން ޒިންހުއާ ކުންފުނި ފަދަ ކުންފުނިތަކާއެކު އިސްތިހާރުގެ ވިޔަފާރި ހުއްޓާލާނެ ކަމަކަށް ގޫގުލްއިން ބުނެފައެއް ނުވެއެވެ. ނަމަވެސް ޓްވިޓާއިން ވަނީ ހޮންގްކޮންގް ގެ މުޒާހަރާއާއި ދެކޮޅަށް ކެމްޕެއިން ކޮށްފައިވާ ބައެއް އެޑްތައް ޓްވިޓާގައި ހިމެނުމުން އޭގެ ސަބަބުން އެކުންފުންޏަށް ލިބުނު ގެއްލުމާއި ގުޅިގެން، އެއްވެސް ގައުމެއްގެ ސަރުކާރުން ބަލަހައްޓާ މީޑިއާތަކުގެ އިސްތިހާރު ޖެހުން ހުއްޓާލާފައިވާ ކަމަށް ބުނެފައެވެ.
ހޮންކޮންގްގައި ބޮޑެތި މުޒާހަރާތައް ކުރަން ފެށުނީ ސަރުކާރުން ގާނޫނު ހަދާ މަޖިލީހަށް މިދިޔަ އޭޕްރިލް މަހު ހުށަހެޅި ބިލަކާ ގުޅިގެންނެވެ. އެ ބިލް ފާސް ކުރި ނަމަ، ހޮންކޮންގްގައި ތިބި ކުށްވެރިންގެ ޝަރީއަތް ކުރިއަށް ގެންދިޔުމަށް އެމީހުން ޗައިނާއާ ހަވާލު ކުރެވިގެންދާނެއެވެ.
