ލޯންގޭ ގައުމީ ވޮލީ ޓީމަށް ކުޅުން ހުއްޓާލައިފި
13 އޯގަސްޓު 2019 | އަންގާރަ 18:56ލޯންގޭ ވަނީ މެދުނުކެނޑި 2004 އިން ފެށިގެން ގައުމީ ޓީމަށް ކުޅެފައި
ރައީސް ސޯލިހު (ކ) ލޯންގޭ (ވ) އާ އަގުވަޒަންކުރުމުގެ ފިލާ ހަވާލުކުރައްވަނީ
ރާއްޖޭގެ ވޮލީއަށް ދިގު މުއްދަތަކަށް ހިދުމަތްކޮށްދިން އަހުމަދު އަބްދުލްކަރީމް (ލޯންގޭ) ގައުމީ ވޮލީ ޓީމަށް ކުޅުން ހުއްޓާލައިފިއެވެ.
އަންގާރަ ދުވަހު ރާއްޖެ އަދި ލަންކާ ބައްދަލުކުރި ރަހުމަތްތެރިކަމުގެ މެޗަށްފަހު ލޯންގޭ ކުޅުން ހުއްޓާލާފައިވާއިރު، އޭނާގެ އަގުވަޒަންކުރުމުގެ ގޮތުން ވޮލީބޯލް އެސޯސިއޭޝަންގެ ފަރާތުން ވަނީ ޝިލްޑެއް ދީފައެވެ. މި ޝިލްޑް ލޯންގޭއާ ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ.
މީގެއިތުރުން ނިމިދިޔަ އިންޑިއަން އޯޝަން އައިލޭންޑް ގޭމްސްގައި ލޯންގޭ ކުޅުނު ޖޯޒީގައި ރައީސް ސޯލިހު ވަނީ ސޮއިކުރައްވާފައެވެ.
ލޯންގޭ ގައުމީ ޓީމަށް ކުޅުން ހުއްޓާލީ ލަންކާ އަދި ރާއްޖެ ބައްދަލުކުރި މެޗުގައި ކުޅުމަށްފަހުއެވެ. ފަހަކަށް އައިސް އޭނާއަށް މެޗުތަކުގައި ކުޅުމުގެ ފުރުސަތު ނުލިބުނު ނަމަވެސް، ގައުމީ ޓީމުން ޖާގަ އަބަދުވެސް ލިބެއެވެ.
ލޯންގޭ ވަނީ 2004 ވަނަ އަހަރުން ފެށިގެން މިއަހަރުގެ ނިޔަލަށް މެދުކެނޑުމެއްނެތި ގައުމީ ޓީމުން ޖާގަ ހޯދައިފައެވެ. އަދި އޭނާ ވަނީ 2010 ވަނަ އަހަރުން ފެށިގެން 2015 ވަނަ އަހަރުގެ ނިޔަލަށް ގައުމީ ޓީމުގެ ކެޕްޓަންކަންވެސް ކޮށްފައެވެ.
