ކޮރެއާގެ މަޝްހޫރު "ކޭޕޮޕް" ބޭންޑެއް ކަމަށްވާ "ބީޓީއެސް" އެމީހުންގެ ލަވަތަކާއި މިއުޒިކް ޓުއަރތައް މަޑުޖައްސާލާ ބްރޭކެއް ނަގަން ތައްޔާރުވެއްޖެއެވެ.
ކޮރެއާގެ ވެރިރަށް ސޯލްގައި ދިން މިއުޒިކް ޝޯއަކަށް ފަހު ކުޑަ ދުވަސްކޮޅަކަށް، ލަވަކުޅުމާއި ހުށަހެޅުމުން ދުރުވެ ޗުއްޓީއެއް ނަގަން ތައްޔާރުވެފައިވާ ކަމަށް ބީޓީއެސްއިން ވަނީ އިއުލާނުކޮށްފައެވެ.
މިއީ 2013 ވަނަ އަހަރަށް ފަހު ބީޓީއެސްއިން ބްރޭކެއް ނަގާ ފުރަތަމަ ފަހަރެވެ. އަދި އެމީހުން ޗުއްޓީގައި ހޭދަކުރާނީ ކިހާ ދުވަހެއްކަމެއް އެނގިފައެއް ނުވެއެވެ. ނަމަވެސް، ދުނިޔޭގެ އެކި ގައުމުތަކަށް އެ ގްރޫޕުން ކުރަމުންދާ "ލަވް ޔުއަރސެލްފް، ސްޕީކް ޔުއަރސެލްފް" ޓުއަރގެ ތެރެއިން، ކުރިއަށް އޮތް އޮކްޓޯބަރު މަހު އެ ގްރޫޕުގެ މިއުޒިކް ޝޯއެއް ސައުދި އަރަބިއާގައި ބޭއްވުމަށް ވަނީ ހަމަޖެހިފައެވެ.
ބީޓީއެސް އަކީ ދުނިޔޭގެ އެކި ގައުމުތަކުގައި ބެލުންތެރިންގެ މަގުބޫލުކަން ހޯދާފައިވާ ބޭންޑެކެވެ. އެ ބޭންޑްގައި ހިމެނެނީ ހަތް މެމްބަރުންނެވެ. އެއީ އާރްއެމް، ޖަންގްކުކް، ޖިން، ސުގާ، ޖޭ ހޯޕް، ޖިމިން އަދި ވީއެވެ.
ބީޓީއެސްއަކީ އެމެރިކާގެ މިއުޒިކް ޗާޓުތަކުން ޖާގަ ހޯދި ފުރަތަމަ ކޮރެއާ ބޭންޑެވެ. މި ބޭންޑު އުފެއްދީ 2013 ވަނަ އަހަރުއެވެ.
