ބ. ގޮއިދޫގައި އީދާއި ދިމާކޮށް ކުރިއަށް ގެންދެވުނު ހަރަކާތްތަކުގެ ތެރެއިން އަލިފާން ބޯޅަ މުބާރާތެއް ބާއްވައިފިއެވެ.
ކޮންމެ އަހަރެއްގައިވެސް އެރަށުގައި ބާއްވަމުންގެންދާ އަލިފާން ބޯޅަ މުބާރާތަކީ އާންމުންގެ ގިނަ ބައެއްގެ ތަރުހީބު ލިބެމުންދާ ކަމެކެވެ. އެގޮތުން ޒުވާނުންގެ އިސްނެގުމާ އެކު މި މުބާރާތް ކުރިއަށް ގެންގޮސްފައިވަނީ އީދު ވިލޭރޭގެ 09:30 ގައެވެ. ރޭގައި ކުޅެފައިވަނީ ހަތް މިނެޓުގެ ދެހާފެވެ.
އަލިފާން ބޯޅަ މުބާރާތުގައި ބައިވެރިވެ، ވާދަކޮށްފައިވަނީ 30 އަހަރުން ދަށުގެ ޓީމަކާއި 30 އަހަރުން މަތީ ޓީމެއް ކަމަށް ރާއްޖެ އެމްވީ އަށް މައުލޫމާތު ދެއްވަމުން އީދު ހަރަކާތްތަށް ކުރިއަށް ގެންދިއުމަށްޓަކާ ރަށު ކައުންސިލުން އެކުލަވާލި ކޮމެޓީގެ ރައީސް އިބްރާހިމް ނިޔާޒްވަނީ މައުލޫމާތު ދެއްވާފައެވެ.
އޭނާ ރާއްޖެއެމްވީ އަށް މައުލޫމާތު ދެމުން ބުނީ މި ކުޅިވަރަކީ ކޮންމެ އަހަރެއްގެ އިދާއި ދިމާކޮށް ބާއްވަމުންގެންދާ ހަރަކާތެއް ކަމުގައެވެ. އެގޮތުން މި ހަރަކާތް ރަށުގައި ބާއްވަމުން ގެންދާތާ 10 ވަރަކަށް އަހަރުވެފައިވާ ކަމަށް ވެސް ބުންޏެވެ.
އަލިފާން ބޯޅަ އަކީ ދުނިޔޭގެ އެކި ހިސާބުތަކުގައި ކުޅެމުންދާ ކުޅިވަރެކެވެ. އީދާއި ގުޅިގެން މިހާ ފުޅާ ދާއިރާއެއްގައި މި ކުޅިވަރު ބ. ގޮއިދޫގައި ބާއްވާ ކަން ފާހަގަ ކޮށްލެވެއެވެ.
