ޙައްޖު ކޯޓާ ހަމަޖެހުނު ބިދޭސީންގެ ތެރޭގައި މަލީޝާ ގްރޫޕްއިން ފައިސާ ނަގާ އޮޅުވާލި މީހެއް ހިމެނޭ :އިސްލާމިކް މިނިސްޓްރީ
10 އޯގަސްޓު 2019 | ހޮނިހިރު 03:08
ހައްޖަށް ދާ ގްރޫޕެއް
ޙައްޖު ކޯޓާ ހަމަޖެހުނު ބިދޭސީންގެ ތެރޭގައި މަލީޝާ ގްރޫޕްއިން ފައިސާ ނަގާ އޮޅުވާލި މީހެއް ހިމެނޭ ކަމަށް އިސްލާމިކް މިނިސްޓްރީ އިން ބުނެފިއެވެ.
އިސްލާމިކް މިނިސްޓްރީން މިހެން ބުނެފައި ވަނީ ދިވެހިރާއްޖެއަށް ލިބިފައިވާ ޙައްޖު ކޯޓާއިން ބިދޭސީންނަށް ކޯޓާ ދިނުމާ ގުޅޭ ގޮތުން މީޑިއާތަކަށް މައުލޫމާތު ދެމުންނެވެ.
އެގޮތުން މިނިސްޓްރީން ބުނެފައި ވަނީ ދިވެހިރާއްޖެއަށް ލިބިފައިވާ ޙައްޖު ކޯޓާއިން ކޯޓާ ހަމަޖެހުނު ބިދޭސީންގެ ތެރޭގައި މަލީޝާ ގްރޫޕްއިން ފައިސާ ނަގާ ، ޙައްޖަށް ނުފޮނުވާ އޮޅުވާލާފައިވާ ފަރާތެއް ހިމެނޭ ކަމަށެވެ. އަދި ބާކީ ތިބި މީހުންނަކީ ދިވެހިންނާ ކައިވެނިކޮށްގެން އުޅޭ މީހުން ޙައްޖަށް ފޮނުވަން އޮންނަ އުޞޫލުގެ ތެރެއިން ގްރޫޕްތަކުން ޖާގަ ހޯދައިގެން ދިޔަ މީހުން ކަމަށް ވެސް ބުނެފައިވެއެވެ.
މިއަހަރުގެ ހައްޖުގެ މަތިވެރި އަޅުކަން އަދާކުރުމަށްޓަކައި ރާއްޖެއިން ހައްޖަށް ފުރި ހައްޖާޖީންގެ ފުރަތަމަ ގުރޫޕް ފުރާފައިވަނީ ޖުލައި މަހުގެ 21 ވަނަ ދުވަހުއެވެ. ރާއްޖެއިން ފުރަތަމަ ހައްޖަށް ފުރި ޒަޢީ ގްރޫޕް ޕްރައިވެޓް ލިމިޓެޑުގެ ފަރާތުން ހައްޖަށް ފުރާ ހައްޖާޖީންނެވެ. ރާއްޖެއިން މިފަހަރު ހައްޖަށް މީހުން ގެންދިޔަ ގްރޫޕް ތަކަކީ މޯލްޑިވްސް ހައްޖު ކޯޕަރޭޝަން ލިމިޓެޑް، ޒަޢީ ގްރޫޕް ޕްރައިވެޓް ލިމިޓް، ތަޒްކިޔާ ޕްރައިވެޓް ލިމިޓެޑް، އަލް ހައްޖު އެންޑް އުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑް، މިނާ ހައްޖު އުމްރާ ޕްރައިވެޓް ލިމިޓެޑް އަދި އެކްރޯ ޕްރައިވެޓް ލިމިޓެޑްއެވެ.
