ރިލްވާންގެ މައްސަލަ އިސްތިއުނާފު ކުރުމަށް ހައިކޯޓުގައި އެދުނީ ކްރިމިނަލް ކޯޓުން ހުކުމް ކުރި ދުވަހު: ޕީޖީ
އިސްތިއުނާފު ކުރުމަށް ނުވަތަ އިސްތިއުނާފު ކުރުމުގެ ހުއްދައަކަށް ދައުލަތުން އެދިފައިވާ ކަމަށް ރެކޯޑްތަކުން ފެންނަން ނެތް
ޕްރޮސެކިއުޓަރ ޖެނެރަލް އައިޝަތު ބިޝާމް
ނޫސްވެރިޔާ އަހްމަދު ރިލްވާން ރަހީނު ކުރި މައްސަލައިގައި ދައުލަތުން ދައުވާކުރީ އެމައްސަލައިގައި ކްރިމިނަލް ކޯޓުގައި ހުކުމް ކުރި ދުވަހުގައިކަމަށް ޕްރޮސެކިއުޓަރ އޮފީސް(ޕީޖީ)އިން ބުނެފިއެވެ.
މިދިޔަ އަހަރުގެ އޮގަސްޓު މަހުގެ ދެވަނަ ދުވަހު ކްރިމިނަލް ކޯޓުން ވަނީ ދައުލަތުން ދައުވާކުރި ދެ މީހުންގެ މައްޗަށް ކުށް ސާބިތު ނުވާކަމަށް ހުކުމް ކޮށްފައެވެ. އަދި ޕްރޮސެކިއުޓަރ ޖެނެރަލްގެ އޮފީހުން އެމައްސަލަ ހައިކޯޓުގައި އިސްތިއުނާފު ކުރިކަމަށް ބުނާ ތާރީޚަކީ ވެސް ކްރިމިނަލް ކޯޓުން ހުކުމް ކުރި ދުވަހެވެ.
ޖުލައި މަހުގެ 22 ވަނަ ދުވަހު ޕްރޮސެކިއުޓަރ ޖެނެރަލް އައިޝަތު ބިޝާމް ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ހާޒިރުކޮށް މެމްބަރަކު ކުރެއްވި ސުވާލަކަށް ޖަވާބު ދެއްވަމުން ވިދާޅުވީ ރިލްވާންގެ މައްސަލަ ހައިކޯޓުގައި އިސްތިއުނާފުގެ ހުއްދައަކަށް އެދިފައިވާ ކަމަށެވެ.
މިމަހުގެ 8 ވަނަ ދުވަހަށް ރިލްވާންއަށް ވީނުވީއެއް ނޭގި ގެއްލުނުތާ 5 އަހަރު ވަނީ ވެފައެވެ. ދައުލަތުގެ ފަރާތުން އެމައްސަލަ ހައިކޯޓުގައި އިސްތިއުނާފު ކުރިތޯ ސާފު ކުރުމަށް ރިލްވާންގެ އާއިލާގެ ފަރާތުން އެކޯޓަށް ވަނީ ސިޓީއަކުން އެދިފައެވެ. ހައިކޯޓުން ފޮނުވި ސިޓީގެ ޖަވާބުގައި ވަނީ ރިލްވާންގެ މައްސަލަ އިސްތިއުނާފު ކުރުމަށް ނުވަތަ އިސްތިއުނާފު ކުރުމުގެ ހުއްދައަކަށް ދައުލަތުން އެދިފައިވާ ކަމަށް އެ ކޯޓުގެ ރެކޯޑްތަކުން ފެންނަން ނެތް ކަމަށެވެ.
އެ ޚަބަރު ނޫސްތަކުގައި ޝާއިއު ކުރެވުމާއެކު ޕީޖީއިން ކޮށްފައިވާ ޓްވީޓެއްގައި ބުނެފައިވަނީ މައްސަލަ އިސްތިއުނާފު ކުރުމުގެ ހުއްދައަކަށް އެ އޮފީހުން ހައިކޯޓުގައި އެދުނީ މިދިޔަ އަހަރުގެ އޮގަސްޓް މަހުގެ ދެވަނަ ދުވަހު ކަމަށެވެ. އަދި ހައިކޯޓުން ޖަވާބު ދީފައިވަނީ އޭގެ ހަތަރު ދުވަސް ފަހުން އޮގަސްޓް މަހުގެ ހަ ވަނަ ދުވަހު ކަމަށެވެ.
ބިޝާމް ޖުޑީޝަރީ ކޮމިޓީއަށް ހާޒިރުވެ ވިދާޅުވީ ރިލްވާންގެ މައްސަލައިގައި އިސްތިއުނާފު ކުރުމުގެ ހުއްދައަކަށް އެދިފައިވާނެ ކަމަށާއި އެމައްސަލައަކީ މަރު ކޮމިޝަނުން ބަލާ މައްސަލައަކަށް ވާތީ އެކަމުގައި ބަލަންޖެހޭ ކަންތައްތައް ހުރެދާނެ ކަމަށެވެ. އެހެން ކަމުން މައްސަލާގައި ބަލަން ޖެހޭ ކަންކަމާއި އަޅަންޖެހޭ ފިޔަވަޅުތައް ތަފާތު ވާނެ ކަމަށް ގަބޫލު ކުރެވޭ ކަމަށް ވެސް އެ ދުވަހު ބިޝާމް ވިދާޅުވިއެވެ.
އެ ކޮމިޓީގައި ބިޝާމް ވިދާޅުވީ ރިލްވާންގެ މައްސަލަ އެ އޮފީހަށް ފޮނުވާފައިވަނީ ބަލަންޖެހޭ ވަރަށް ނުބެލި އެކަށީގެންވާ ތަހުގީގެއް ނުކޮށް ކަމަށެވެ. އަދި އެކަން ކުރީގެ ރައީސް އަބްދުﷲ ޔާމީނަށާއި އޭރު ޕޮލިސް ކޮމިޝަނަރަކަށް ހުންނެވި އަހުމަދު އަރީފުގެ ސަމާލު ކަމަށް ގެންނެވި ކަމަށެވެ. ރައީސް ޔާމީނަށް އެކަމާއި ގުޅިގެން ފޮނުއްވި ސިޓީ ކޮމިޓީއާއި ހަވާލު ކޮށްފައިވާނެ ކަމަށް ވެސް ބިޝާމް ވިދާޅުވެފައި ވެއެވެ. ބިޝާމް ވިދާޅުވި ގޮތުގައި އެ މައްސަލަ ފުލުހުން ޕީޖީ އޮފީހަށް ގެނައީ ޖިނާއީ އިޖުރާއަތުގެ ގާނޫނަށް އަމަލު ކުރަން ފެށުމާއެކު ވަކި މުއްދަތެއްގެ ތެރޭގައި ދައުވާ ކުރަން ޖެހޭ މައްސަލައެއްގެ ގޮތުގައި އެ މައްސަލަ ވެގެން ދިއުމުންނެވެ.
ރިލްވާން ގަދަކަމުން ފޮރުވި ކަމަށް ބުނެ ދައުލަތުން ޓެރަރިޒަމްގެ ދައުވާކުރީ ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށެވެ. ނަމަވެސް އެއްވެސް މީހެއްގެ މައްޗަށް ކުށް ސާބިތު ވެފައެއް ނުވެއެވެ.
