އަންނަ އަހަރުން ފެށިގެން ރާއްޖޭގެ ގިނަ ސުކޫލުތައް އެއްދަންފަޅިއަށް ބަދަލު ކުރެވިގެންދާނެ ކަމަށް މިނިސްޓަރ އޮފް އެޑިއުކޭޝަން ޑރ.އާއިޝަތު އަލީ ވިދާޅުވެއްޖެއެވެ.

ބުރާސްފަތި ދުވަހު ނޫސްވެރިންނާއި ބައްދަލުކުރައްވައި މިނިސްޓަރ ވިދާޅުވީ، ރާއްޖޭގެ 154 ސުކޫލެއް މިހާރުވެސް އެއްދަންފަޅިއަށް ބަދަލު ކުރެވިގެން ކުރިއަށްދާ ކަމަށާއި، ނަމަވެސް އެ ސުކޫލުތަކުގައި ދެވެމުންދަނީ ވަށާޖެހޭ ތައުލީމުކަން ޔަޤީންކުރަންޖެހޭ ކަމަށެވެ.

އެގޮތުން އަންނަ އަހަރު ތެރޭގައި ގިނަ ސުކޫލުތައް އެއްދަންފަޅިއަކަށް ބަދަލުކުރެވިގެންދާއިރު، ވަށާޖެހޭ ތައުލީމީ ނިޒާމެއް ބައްޓަން ކުރުމަށްޓަކައި މިހާރުވެސް ރާއްޖޭގެ 22 ސުކޫލެއްގައި ޕައިލޮޓް ޕްރޮގްރާމެއް ކުރިއަށްގެންދާ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މި ޕްރޮގްރާމް ކުރިއަށްދާ ސުކޫލުތަކުން ހެޔޮ ބަދަލުތަކެއް ފެންނަ ކަމަށް މިނިސްޓްރީއަށް މައުލޫމާތު ލިބެމުންދާ ކަމަށާއި، ކުދިންގެ އަޙްލާޤަށްވެސް ހެޔޮ ބަދަލުތަކެއް އަންނަކަން ފާހަގަކުރެވޭ ކަމަށެވެ.

މިނިސްޓަރ އިތުރަށް ވިދާޅުވީ، މިއަހަރު މި ޕްރޮގްރާމްގެ ދަށުން ރާއްޖޭގެ ސުކޫލުތައް ވަށާޖެހޭ ތައުލީމަށް ބަދަލު ނުކުރެވުނީ ބަޖެޓާއި އެފަދަ ކަންކަމަށް ރިއާޔަތް ކުރަންޖެހޭތީ ކަމަށާއި، ނަމަވެސް އަންނަ އަހަރު އެދެވޭ ހެޔޮ ބަދަލުތަކާއެކު މި މަޝްރޫއު ފެށިގެންދާނެ ކަމަށެވެ.

މިނިސްޓަރ އިތުރަށް ވިދާޅުވީ، ޚާއްސަ އެހީއަށް ބޭނުންވާ ކުދިންނަށް ހިންގޭ ޕްރޮގްރާމްތަކަށް އިންކްލޫސިވް އެޑިއުކޭޝަން ކޯޗުން ތަމްރީނު ކުރުމުގެ މަސައްކަތް ކުރައްވަމުންދާ ކަަމަށާއި، މިހާރުވެސް އެކަމަށް ބޭނުންވާ ތެރަޕިސްޓުން ހޯދުމުގެ މަސައްކަތް ކުރަމުންދާ ކަމަށެވެ. އެގޮތުން ތެރަޕިސްޓުން ލިބުމުން މޯބައިލް ޓީމެއްގެ ގޮތުގައި ރާއްޖޭގެ އެކި ހިސާބުތަކަށް މި ޓީމުތައް ހަރަކާތްތެރިވާނެ ކަމަށް މިނިސްޓަރ ވިދާޅުވިއެވެ.

ވަށާޖެހޭ ތައުލީމީ ނިޒާމެއްގެ ދަށުން ސުކޫލުތައް އެއް ދަންފަޅިއަށް ބަދަލު ކުރުމުގެ މަސައްކަތް މިނިސްޓްރީން ކުރަމުންދާއިރު، ރާއްޖޭގެ ހުރިހާ ސުކޫލެއް އެއްދަންފަޅިއަށް ބަދަލު ކުރުމަކީ ރައީސް ސޯލިހުގެ ރިޔާސީ ވައުދުފުޅެކެވެ.