ބައިނަލްއަގްވާމީ ސެޓްލްމަންޓާ ބެހޭ މުޢާހަދާ ގައި ބައިވެރިވުމަށް މަޖިލީހުން ރުހުން ދީފި!
މި މުއަހަދާ ގައި ބައިވެރި ވުމަށް ތާއީދު ކުރައްވާ 74 މެމްބަރުން ވަނީ ވޯޓު ދެއްވާފަ
މަޖިލިސް
"ޔުނައިޓެޑް ނޭޝަންސް ކޮންވެންޝަން އޮން އިންޓަރނޭޝަނަލް ސެޓްލްމަންޓް އެގްރީމަންޓްސް ރިސަލްޓިންގ ފްރޮމް މީޑިއޭޝަން" ގައި ރާއްޖެއިން ބައިވެރިވުމަށް މަޖިލީހުން ރުހުން ދީފިއެވެ.
މިމުއަހަދާ ގައި ބައިވެރި ވުމަށް ތާއީދު ކުރައްވާ 74 މެމްބަރުން ވަނީ ވޯޓު ދެއްވާފައެވެ. މިމުއާހަދާގައި ބައިވެރިވުމުގެ މައްސަލަ ދިރާސާކޮށްފައިވަނީ ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީންނެވެ. ކޮމިޓީގެ ރިޕޯޓް ވަނީ އަންގާރަދުވަހު ކުރިއަށްދާ މަޖިލީހުގެ ޖަލްސާއަށް އިއްވާފައެވެ.
ކޮމެޓީގެ ރިޕޯޓް މަޖިލީހުގެ ތަޅުމަށް އިއްވަމުން ކޮމިޓީގެ މުގައްރިރު އަދި މަރަދޫ ދާއިރާގެ މެމްބަރު އިބްރާހީމް ޝަރީފް ވިދާޅުވީ، މި މުއާހަދާގައި ސޮއިކުރެވުމުން ދިވެހިރާއްޖޭގެ ވިޔަފާރިތަކަށް ފަހި ފުރުސަތުތަކެއް ލިބިގެން ދާނެ ކަމަށެވެ. އަދި މިކަމަކީ ދިވެހި ރާއްޖޭގެ ވިޔަފާރިތައް ފުޅާ ވެގެން އަންނަ އިރު ކޮންމެހެން ބޭނުންތެރި މުއާހަދާއެއް ކަމުގައި ކޮމެޓީގެ މެމްބަރުންނަށް ފާހަގަ ކުރެވުނު ކަމަށް ވެސް ވިދާޅުވިއެވެ.
ރިޕޯޓު ހުށަހަޅުއްވަމުން މެމްބަރު ޝަރީފް އިތުރަށް ވިދާޅުވީ، މި މުއާހަދާގައި ދިވެހި ރާއްޖެއިން ސޮއިކޮށް ތަސްދީގު ކުރެވުމުން މަޖިލީހަށް މީޑިއޭޝަނާއި ބެހޭ ގާނޫނެއް ހުށަހަޅަން ސަރުކާރުން ތައްޔާރު ވަމުންދާ ކަމަށެވެ.
މި މުޢާޙަދާ އދ އިން ބަލައިގަތީ 20 ޑިސެންބަރު 2018 ގައެވެ. މުއާހަދާގައި 7 އޯގަސްޓް 2019 ވަނަ ދުވަހު ސިންގަޕޫރުގައި ސޮއިކުރުމަށް ހަމަޖެހިފައިވާއިރު، ރާއްޖެއިން މިމުއާހަދާގައި ސޮއިކުރުމަށް ގަސްތުކޮށްފައިވަނީ، މިމުއާހަދާގައި ދިވެހިރާއްޖެއިންވެސް ބައިވެރިވުން މުހިއްމު މުއާހަދާއެއްކަމަށް ގަބޫލު ކުރެވޭތީ ކަމަށް އޭޖީ އޮފީހުން ވަނީ މައުލޫމާތު ދީފައެވެ.
މިމުއާހަދާއަކީ، މުއާހަދާގައި ބައިވެރިވާ ޤައުމުތަކުން މީޑިއޭޝަން މެދުވެރިކޮށް ނިންމާ މައްސަލަތަކުން އުފެދޭ ބައިނަލްއަޤްވާމީ ސެޓްލްމަންޓް އެގްރީމަންޓްތައް، ބަލައިގަނެ އެޤައުމުތަކުގައި އެ އެއްބަސްވުންތައް ތަންފީޒުކުރުމަށް އެއް އުޞޫލުތަކަކާއި އިންތިޒާމުތަކެއް ޤާއިމުކުރުމަށްޓަކާ އެކުލަވާލާފައިވާ ބައިނަލްއަޤްވާމީ ޤާނޫނީ އޮނިގަނޑެކެވެ.
ބައިނަލްއަގްވަމީ ސެޓްލްމަންޓާ ބެހޭ މުއާހަދާއަށް ރުހުން ހޯދުމަށް މަޖިލީހުގެ ތަޅުމަށް ކޮމިޓީން ފޮނުވުމަށް ފާސްކޮށްފައިވަނީ ހޯމަ ދުވަހު ބޭއްވި ކޮމެޓީ ބައްދަލުވުމުގައެވެ.
