ގައުމީ ވޮލީ ޓީމުގެ ކެޕްޓަނަކަށް ހުޒާންޓެ ހަމަޖައްސައިފި
1 އޯގަސްޓު 2019 | ބުރާސްފަތި 11:45ހުޒާންޓެ ގައުމީ ވޮލީ ޓީމަށް ކުޅެން ފެށީ 2011 ވަނަ އަހަރުން ފެށިގެން
ގައުމީ ވޮލީ ޓީމުގެ ކެޕްޓަނަކަށް ހަމަޖެއްސި ހުޒާންޓެ
ގައުމީ ފިރިހެން ވޮލީ ޓީމުގެ ކެޕްޓަނަކަށް ވ.ފެލިދުއަށް އުފަން އަލީ ހުޒާމް (ހުޒާންޓެ) ހަމަޖައްސައިފިއެވެ.
ގައުމީ ވޮލީ ޓީމަށް 2011 ވަނަ އަހަރުން ފެށިގެން ކުޅެމުން އަންނަ ހުޒާންޓެ ކެޕްޓަނަކަށް ހަމަޖެއްސިއިރު، އޭނާގެ ކެޕްޓަން ކަމުގެ ދަށުން ރާއްޖެ އެންމެ އަވަހަށް ނިކުންނާނީ މި މަހު ފަހުކޮޅުގައި ނޭޕާލްގައި ބާއްވާ ސެންޓްރަލް ޒޯން މުބާރާތަށެވެ.
ހުޒާންޓެ ވަނީ ގައުމީ ގިނަ މުބާރާތްތަކުގައި ކުޅުމުގެ އިތުރުން ބައިނަލްއަގުވާމީ ގިނަ މުބާރާތްތަކުގައި ވެސް ކުޅެފައެވެ. އޭނާ އަކީ ރާއްޖޭގައި މިވަގުތު ހުރި އެންމެ މޮޅު އެއް ވޮލީ ކުޅުންތެރިޔާއެވެ.
ގައުމީ ކެޕްޓަންކަން މީގެކުރިން ކުރަމުން އައީ އަހުމަދު އަބްދުލް ކަރީމް (ލޯންގޭ) އެވެ. އޭނާގެ ކެޕްޓަންކަމުގެ ދަށުން ރާއްޖެއިން ވަނީ މިދިޔަ އަހަރު ބަންގްލަދޭޝްގައި އޮތް ސެންޓްރަލް ޒޯން މުބާރާތާއި، އޭޝިއަން ގޭމްސް އަދި ނިމިދިޔަ އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގައި ކުޅެފައެވެ.
ގައުމީ ޓީމަށް ހުޒާންޓެގެ އެއްބަނޑު އެއްބަފާ ދެ ކޮއްކޮ އަންނަނީ ކުޅެމުންނެވެ. އެއީ ހުސެއިން ވިޝާމް (ބުޅިކެ) އާއި ހަސަން ނިލާމް (ޕާޓޭ) އެވެ.
ގައުމީ ވޮލީ ޓީމު ދާދި ފަހުން ސާބިއާގައި މަތީ ފެންވަރުގެ ޓްރެއިނިންގ ކޭމްޕެއް ފުރިހަމަ ކޮށްފައިވާއިރު، ނިމިދިޔަ އައިއޯއައިޖީގައި ވޮލީ ޓީމު ވަނީ މޮޅު ކުޅުމެއް ދައްކާފައެވެ.
ނަމަވެސް ކުޅުނު ތިން މެޗުގެ ތެރެއިން ރާއްޖެ މޮޅުވީ ކޮމޯރޮސްއާ ދެކޮޅަށް ކުޅުނު މެޗުން އެކަނިއެވެ. މުބާރާތުގައި ރީޔޫނިއަން އަދި މަޑަގަސްކަރަ އަތުން ރާއްޖެ ވަނީ ބަލިވެފައެވެ.
