މެރިން ޕަވަރ 2318 ނަމަކަށް ކިޔާ ބާޖެއް ދިޔަވަނީ
27 ޖުލައި 2019 | ހޮނިހިރު 08:09މިއީ އިންޑިއާގެ ޓުޓިކޮރިންއިން ފުރައިގެން މާލެ ދަތުރުކުރި ބާޖެއް
ދިޔަވަމުންދާ ބާޖް
ކ.ފޭދޫފިނޮޅު ކައިރީ ބަނދަރުކޮށްފައި އޮތް "މެރިން ޕަވަރ 2318" ނަމަކަށް ކިޔާ ބާޖެއް ދިޔަ ވާތީ އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަންއިން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ މި ހާދިސާގެ މަޢުލޫމާތު ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ހޮނިހިރު ދުވަހުގެ ހެނދުނު 10:16 ހާއިރު ލިބުމާއެކު މާލޭ އޭރިއާ ކޯސްޓްގާޑް ސްކޮޑްރަންގެ ޓީމެއް ޑައިވަރުންނާއެކު އެސަރަޙައްދަށް ގޮސް ހަރަކާތްތެރިވާން ފަށާފައިވާ ކަމަށެވެ.
މި ހާދިސާގައި ބާޖަށް ދިޔަވެފައިވަނީ ބާޖުގެ ބަލާސްޓް ޓޭންކަށް ދިމާވި މައްސަލައަކާ ގުޅިގެން ކަމަށް ބާޖުގެ ވެރިފަރާތުން އެމްއެންޑީއެފް ކޯސްޓްގާޑަށް މައުލޫމާތު ދީފައިވެއެވެ. އަދި ބާޖުގައި ހެދިފައިވާ ދިޔަގަނޑު ހިއްކުމުގެ މަސައްކަތުގައި ކޯސްޓްގާޑް ސިފައިން ހަރަކާތްތެރިވަމުންދާއިރު ޑައިވަރުން އަންނަނީ ބާޖުގެ އެއްވެސް ދިމާލެއް ފަޅައިގެން ގޮސްފައިވޭތޯ ބަލަމުންނެވެ.
މި ބާޖަކީ ހޮނިހިރު ދުވަހު ހެނދުނު އިންޑިއާގެ ޓުޓިކޮރިންއިން ފުރައިގެން މާލެ ދަތުރުކުރި ބާޖެކެވެ. މިބާޖުގައި 10 ބިދޭސީން ތިބި އިރު އެއްވެސް މުދަލެއް ނެތެވެ. މި ހާދިސާގައި އެއްވެސް މީހަކަށް ގެއްލުމެއް ނުލިބޭ ކަމަށް އެމްއެންޑީއެފުން މައުލޫމާތުދެއެވެ.
