ލީބިޔާގެ ކަނޑުގެ ސަރަހައްދުގައި ދަތުރުކުރަމުންދިޔަ ބޯޓުތަކެއް އަރިއަޅާލައި 100 އަށްވުރެ ގިނަ ރެފިއުޖީން ކަނޑުވެއްޖެއެވެ.

ލީބިޔާގެ ކޯސްޓް ގާޑުގެ ތަރުޖަމާނު އައްޔޫބް ގާސިމް ވިދާޅުވީ 300 އެއްހާ ފަސިންޖަރުން ގޮވައިގެން ދަތުރު ކުރަމުންދިޔަ ދެ ބޯޓެއް ވަނީ ލީބިޔާގެ ވެރިރަށް ޓްރިޕޯލީގެ 120 ކިލޯމީޓަރު ދުރުން ބަންޑުންޖަހާލާފައި ކަމަށެވެ. އަދި އޭނާ ވިދާޅުވީ 134 ރެފިއުޖީން ވަނީ ސަލާމަތް ކޮށްފައި ކަމަށެވެ.

ނަމަވެސް އިންޓަރނޭޝަންލް އޮގަނައިޒޭޝަން ފޮ މައިގްރޭޝަން (އައިއޯއެމް) އިން ބުރާސްފަތި ދުވަހު ކޮށްފައިވާ ޓްވީޓެއްގައި ބުނެފައިވަނީ އެ ހާދިސާގައި ކަނޑުމަތިވީ 150 މީހުން ކަމަށާ 145 މީހުން ސަލާމަތްކޮށް ލިބިޔާއަށް ގެންގޮސްފައިވާ ކަމަށެވެ.

އ.ދ ގެ ރެފިއުޖީންނާއި ބެހޭ ހައި ކޮމިޝަނަރ ފިލިޕޯ ގްރާންޑީ ވިދާޅުވިގޮތުގައި މިއީ މިއަހަރު ދިމާވި ކަނޑުމަތީގެ އެންމެ ހިތާމަވެރި ހާދިސާއެވެ.

މި ހާދިސާގައި ސަލާމަތްކޮށްފައިވާ ގިނަ ރެފިއުޖީންނަކީ އިތިއޯޕިއާއަށް ނިސްބަތްވާ މީހުންނެވެ. އަދި ބާކީ ތިބި ރެފިއުޖީންނަކީ ފަލަސްތީނަށާއި ސޫދާނަށް ނިސްބަތްވާ މީހުންނެވެ.

އ.ދ ގެ ރެފިއުޖީ އޭޖެންސީގެ ތަރުޖަމާނު ޗާރލީ ޔެކްސްލީ ވިދާޅުވިގޮތުގައި ކަނޑުވި މީހުން ސަލާމަތްކޮށް ލިބިޔާގެ އައްސޭރި އައްސޭރިފަށަށް ގެންގޮސްދިނީ ލިބިޔާގެ މަސްވެރިންތަކެއް ކަމަށާ އެހިސާބުން އެގައުމުގެ ކޯސްޓްގާޑުން ވަނީ އެމީހުންނަށް އެހީތެރިކަން ފޯރުކޮށްދީފައިކަމަށެވެ.

ކަނޑުވި ހިޖުރަވެރިންގެ ތެރެއިން ގާތްގަނޑަކަށް 150 މީހުން ވަނީ ގެއްލިފައި ނުވަތަ މަރުވެފައި ކަމަށް އޭނާ ބުނެފައިވެއެވެ. އަދި އެ މީހުންގެ ތެރޭގައި އަންހެނުންނާއި ކުޑަ ކުދިން ހިމެނޭ ކަމަށް ވެއެވެ.