ޑެންގީ ހުން ޖެހިގެން ނުވަ އަހަރުގެ ކުއްޖަކު މަރުވެއްޖެ
23 ޖުލައި 2019 | އަންގާރަ 07:52އެ ކުއްޖާ މަރުވެފައިވަނީ ހެނދުނުގެ ވަގުތެއް ގައި އެއާޕޯޓުން އައިޖީއެމްއެޗަށް ގެންދިޔަ މަގުމަތީގައި
ޑެންގޫ ޖެހުން ގިނަވާތީ ސަމާލުވުމަށް އެޗްޕީއޭއިން ވަނީ އިލްތިމާސް ކޮށްފައި
ޑެންގީ ހުން ޖެހިގެން ނުވަ އަހަރުގެ ކުއްޖަކު މަރުވެއްޖެއެވެ. ރާއްޖެ.އެމްވީ އަށް މައުލޫމާތު ލިބިފައިވާ ގޮތުން އެ ކުއްޖާ މަރުވެފައިވަނީ ހެނދުނުގެ ވަގުތެއް ގައި އެއާޕޯޓުން އައިޖީއެމްއެޗަށް ގެންދިޔަ މަގުމަތީގައެވެ.
އައިޖީއެމްއެޗްގެ މީޑިއާ އޮފިސަރު ވިދާޅުވީ، ކުއްޖަކު މަރުވެގެން ގެނެސްފައިވާ ކަަމަށެވެ. އެކަމަކު އެ ކުއްޖާ މަރުވި ސަބަބެއް އޭނާ ހާމާއެއް ނުކުރެއެވެ. މައުލޫމާތު ލިބިފައިވާ ގޮތުން މަރުވެފައިވަނީ ހދ. ކުޅުއްދުއްފުށްޓަށް ނިސްބަތްވާ ކުއްޖެކެވެ. އެ ކުއްޖާގެ މައްޗަށް ކުރެވޭ ކަށުނަމާދު އޮންނާނީ މިއަދުގެ މެންދުރު ނަމާދަށް ފަހުއެވެ.
މިއީ މިއަހަރުގައި ޑެންގީ ޖެހިގެން މަރުވި ފުރަތަމަ ކުއްޖާއެވެ. މި ދުވަސްވަރު ޑެންގީ ފެތުރޭ މިންވަރު ގިނަވަމުންދާއިރު ހުރިހާ ފަރާތްތަކުންވެސް އެކަމަށް ސަމާލުވުމަށް އެޗްޕީއޭ އިން ވަނީ ހުރިހާ ފަރާތްތަކަށް އިލްތިމާސް ކޮށްފައެވެ. މި އަހަރުގެ ޖެނުއަރީ މަހުން ފެށިގެން މާޗް މަހާ ހަމަޔަށް ޑެންގީގެ 909 ކޭސް ރިޕޯޓް ކޮށްފައިވާ ކަމަށް އޭޗްޕީއޭ އިން މައުލޫމާތުދެއެވެ.
