ނެޝަނަލް އިންޓާރގްރިޓީ ކޮމިޝަން (އެންއައިސީ)ގެ މެމްބަރުކަމަށް ކުރިމަތިލުމުގެ ފުރުސަތު އަލުން ހުޅުވާލުމަށް ރައީސުލްޖުމްހޫރިއްޔާއަށް ފޮނުވުމަށް މަޖިލީހުން ފާސްކޮށްފިއެވެ.

ނެޝަނަލް އިންޓެގްރިޓީ ކޮމިޝަނަށް މެމްބަރަކު އައްޔަނު ކުރެއްވުމަށްޓަކާ ރައީސުލްޖުމްހޫރިއްޔާ ފޮނުވާފައިވާ ނަންފުޅުތައް މިނިވަން މުއައްސަސާތަކާ ބެހޭ ކޮމިޓީއިން ދިރާސާކޮށް ނިންމެވިގޮތުގެ ރިޕޯޓު އަލުން އަނބުރާ ކޮމިޓީއަށް ފޮނުވާފައިވުމާއި ގުޅިގެން، އެ ރިޕޯޓަށް މަޖިލީހުން ގޮތެއް ނިންމަވައި ދިނުމަށް މިނިވަން މުއައްސަސާތަކާއި ބެހޭ ކޮމެޓީން ވަނީ ހޯމަ ދުވަހުގެ ޖަލްސާގައި ހުށަހަޅާފަ އެވެ. ކޮމިޓީގެ ރިޕޯޓް ހޯމަ ދުވަހުގެ ޖަލްސާއަށް ހުށަހަޅުއްވަމުން، ކޮމިޓީގެ މުގައްރިރު އައްޑޫމީދޫ ދާއިރާގެ މެމްބަރު ރޮޒައިނާ ވިދާޅުވެފައިވަނީ މި ކަމުގައި މަޖިލީހުގެ ތަޅުމުން ގޮތެއް ނިންމަވައިދެއްވުމަށް އެދިވަޑައިގަންނަވާ ކަމަށެވެ.

ކޮމިޓީގެ ރިޕޯޓަށް ބަހުސްއަށް ހުޅުވާލުމުން މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ކޮމިޓީގެ ރިޕޯޓަށް އިސްލާހެއް ހުށަހަޅުއްވާފައެވެ. މެމްބަރު އާޒިމް ހުށަހެޅުއްވި އިސްލާހަކީ އެންއައިސީގެ މެމްބަރުކަމަށް ކުރިމަތި ލުމަށް އަލުން ހުޅުވާލުމަށް ރައީސުލްޖުމްހޫރިއްޔާއަށް ފޮނުއްވުމަށެވެ. އާޒިމްގެ ހުށަހެޅުއްވުމަށް ތާއީދު ކުރައްވާފައިވަނީ ކުޑަހުވަދޫ ދާއިރާގެ މެމްބަރު އަހްމަދް އާމިރެވެ.

މެމްބަރު އާޒިމް ހުށަހެޅުއްވި އިސްލާހު ފާސްވީ މަޖިލީހުގެ 66 މެމްބަރުންގެ ތާއީދާއެކުއެވެ.

ނޭޝަނަލް އިންޓެގްރިޓީ ކޮމިޝަނަށް ކުރިމަތިލެއްވި 26 ބޭފުޅުންގެ ނަމުގެތެރެއިން 75 އިންސައްތައަށްވުރެ މަތިން މާކްސް ލިބުނީ 4 ބޭފުޅުންނަށެވެ.