ގުރޫޕްގެ އެއްވަނަ ޓީމުގެ ގޮތުގައި ގައުމީ އަންހެން ޓޭބަލް ޓެނިސް ޓީމު ސެމީއަށް

މޮރިޝަސްގައި މިހާރު ކުރިޔައްދާ އިންޑިއަން އޯޝަން އައިލޭންޑް ގޭމްސްގައި، ގްރޫޕްގެ އެއްވަނަ ޓީމުގެ ގޮތުގައި ގައުމީ އަންހެން ޓޭބަލް ޓެނިސް ޓީމު ސެމީ ފައިނަލަށް ދަތުރުކޮށްފިއެވެ.

އަންހެން ޓީމު އިވެންޓުގެ އެއްވަނަ ޓީމުގެ ގޮތުގައި ރާއްޖެ ސެމީއަށް ދަތުރުކުރީ މޮރިޝަސް އަދި މަޔޯޓް ބަލިކުރުމަށްފަހުއެވެ. މޮރިޝަސް މެޗުން ރާއްޖެ މޮޅުވީ ތިން ސެޓު ދެ ސެޓުން ކުރި ހޯދައިގެންނެވެ. އަދި މަޔޯޓް ބަލިކުރީ ސީދާ ތިން ސެޓުންނެވެ.

މޮރިޝަސް އާއި ދެކޮޅަށް ރާއްޖެ ކުޅުން މެޗުގައި ޒުވާން ކުޅުންތެރިޔާ ދީމާވަނީ ތަފާތު މޮޅު ކުޅުމެއް ކުޅެފައެވެ. އެގޮތުން އޭނާ ވަނީ މޮރިޝަސް އާއި ދެކޮޅަށް ކުޅުނު ފުރަތަމަ މެޗް ސީދާ ތިން ސެޓުން ކާމިޔާބުކޮށްފައެވެ. މި މެޗް ގެ ސެޓުތައް ދީމާ ކާމިޔާބުކުރީ 11-9، 11-7، އަދި 11-7 އިންނެވެ. ދިމާގެ ދެވަނަ މެޗް އޭނާ ކާމިޔާބު ކުރީ ތިން ސެޓު ދެ ސެޓުންނެވެ. މި މެޗުގެ ސެޓުތައް ދީމާ ކާމިޔާބުކުރީ 7-11، 11-5، 11-8، އަދި 10-12 އިންނެވެ. މޮރިޝަސް އާއި ދެކޮޅަށް ރާއްޖޭގެ ރަފާ ކުޅުންމެޗު ވެސް ވަނީ ކާމިޔާބު ކޮށްފައެވެ. އޭނާ ވަނީ މޮރިޝަސްގެ ކުޅުންތެރިޔާ ސީދާ ތިން ސެޓުން ބަލިކޮށްފައެވެ. މި މެޗުގެ ސެޓުތައް ރަފާ ގެންދިޔައީ 11-6، 13-11 އަދި 15-13 އިންނެވެ.

ދިވެހިރާއްޖޭގެ އަންހެން ޓީޓީ ޓީމު މަޔޯޓް އާއި ދެކޮޅަށް ކުޅުނު މެޗު ކާމިޔާބު ކޮށްފައި ވަނީ ސީދާ ތިން މެޗުން މޮޅުވެގެންނެވެ. އެ ގޮތުން ރާއްޖޭގެ ރަފާ ކުޅުނު ދެ މެޗުން އޭނާ ވަނީ ސީދާ ތިން ސެޓުން މޮޅުވެފައެވެ. އަދި މުއީނާގެ މެޗު އޭނާ ވެސް ކާމިޔާބުކޮށްފައި ވަނީ ސީދާ ތިން ސެޓުންނެވެ.

ރަފާ ކުޅުނު ފުރަތަމަ މެޗުގެ ސެޓުތައް އޭނާ ގެންދިޔައީ 11-3، 11-6 އަދި 11-3 އިންނެވެ. ރަފާ އޭނާގެ ދެވަނަ މެޗުގެ ސެޓުތައް ގެންދިޔައީ 11-3، 11-5 އަދި 6-11 އިންނެވެ. ތަޖުރިބާކާރު ކުޅުންތެރިޔާ މުއީނާގެ މެޗުގެ ސެޓުތައް އޭނާ ކާމިޔާބުކުރީ 11-7، 11-3 އަދި 11-2 އިންނެވެ.

ޓީޓީ ޓީމު އައިއޯއައިޖީ އާއި ކުރިމަތިލީ މެޑައްޔެއް ކާމިޔާބުކުރުމުގެ އަޒުމުގައެވެ.