ކުރިޔަށް އޮތް ސީޒަނަށް ތައްޔާރުވުމުގެ ގޮތުން މެންޗިސްޓަރ ޔުނައިޓެޑާއި ލީޑްސް ބައްދަލު ކުރި މެޗް ޔުނައިޓެޑުން ކާމިޔާބު ކޮށްފިއެވެ.
މި މެޗް މެންޗިސްޓަރ ޔުނައިޓެޑުން ކާމިޔާބުކުރީ 4-0 ގެ ނަތީޖާއަކުންނެވެ.
މެޗުގެ ފުރަތަމަ ހާފުގެ ކުރީ ކޮޅު ޔުނައިޓެޑުން ވަނީ ލަނޑުޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ މެސަން ގްރީންވުޑްއެވެ. މެޗުގެ ފުރަތަމަ ހާފު ނިމުމުގެ ކުރިން ރަސްފާޑް ވަނީ އިތުރު ލަނޑެއްޖަހާ ލީޑު ފުޅާ ކޮށްދީފައެވެ.
ދެވަނަ ހާފުގައި ވެސް ޔުނައިޓެޑުން ވަނީ މޮޅު ކުޅުމެއް ކުޅެފައެވެ. އެގޮތުން ފިލިޕްސް ޖޯންސް ވަނީ އިތުރު ލަނޑެއްޖަހާ މެޗުގެ ނަތީޖާ 3-0 ކަށް ބަދަލު ކޮށްލައިފައެވެ. މެޗު ނިމުމުގެ ކުރިން މާރޝިއަލް ވަނީ ލިބުނު ޕެނަލްޓީއެއް ކާމިޔާބުކޮށް ނަތީޖާ 4-0 ކަށް ބަދަލު ކޮށްލައިފައެވެ.
މި މެޗުގައި ޔުނައިޓެޑްގެ މިޑްފިލްޑަރ ޕޮގްބާ ވަނީ މޮޅަށް ކުޅެފައެވެ. ނަމަވެސް އޭނާ ޔުނައިޓެޑް ދޫކޮށް ރެއާލް އަށް ބަދަލުވާން އުޅޭކަމުގެ އަޑުތައްވަނީ ގަދަވެފައެވެ.
