އިންޑިއަން އޯޝަން އައިލޭންޑް ގޭމްސް (އައިއޯއައިޖީ) 2019 ގައި ރީޔޫނިއަން އަތުން ރާއްޖޭގެ ފިރިހެން ފުޓުބޯޅަ ޓީމު ބަލިވެއްޖެއެވެ.

ބުރާސްފަތި ދުވަހު ކުޅުނު މި މެޗު ރާއްޖެއާ ވާދަކޮށް ރީޔޫނިއަން އިން ކާމިޔާބުކުރީ 4-0 ގެ ނަތީޖާއަކުންނެވެ.

މޮރިޝަސްގެ އޮގަސްޓޭ ވޮލޭއާ ސްޓޭޑިއަމްގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ފެނިގެންދިޔައީ ދާދި ހަމަހަމަ ކުޅުމެކެވެ. އެގޮތުން ދެޓީމަށްވެސް ލަނޑު ޖަހަން މި ހާފްގައި ފުރުސަތުތަކެއް ލިބި ބޭކާރުވިއެވެ.

ރީޔޫނިއަންއިން މެޗުގެ ލީޑު ނެގީ 31 މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އިމީރާ ކަރީމް ނަގައިދިން ހުރަހަކުން ވަޑަޕިން އަންޖީއެވެ. އޭނާ މި ލަނޑު ކާމިޔާބުކުރީ ބޮލުންނެވެ.

މި ލަނޑަށްފަހުވެސް ރީޔޫނިއަން ފެނިގެންދިޔައީ ވަރަށް ވަރުގަދަކޮށެވެ. އެގޮތުން 33 ވަނަ މިނެޓުގައި ރީޔޫނިއަންގެ ދެވަނަ ލަނޑު ކާމިޔާބުކުރީ ފޮންޓެއިންއެވެ. އޭނާ މި ލަނޑު ކާމިޔާބުކުރީ ރާއްޖޭގެ ދެ ކުޅުންތެރިން ކައިރިން ނައްޓާލުމަށްފަހުއެވެ.

މި ލަނޑުތަކަށްފަހުވެސް ރީޔޫނިއަންއަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. އަދި ފުރަތަމަ ހާފްގެ ފަހުކޮޅު ރާއްޖެއަށް ވަނީ ނަތީޖާގެ ފަރަގު ކުޑަކުރަން ދެ ފުރުސަތެއް ލިބި ބޭކާރުވެފައެވެ.

ދެވަނަ ހާފް ފެށިގެން ރީޔޫނިއަންގެ ފަރާތުން ނުރައްކާތެރި ހަމަލާތަކެއް ވަނީ ފެނިގެން ގޮސްފައެވެ. އަދި ލަނޑު ޖެހުމަށްވެސް އެޓީމަށް ވަނީ ފުރުސަތުތަކެއް ލިބި ބޭކާރުވެފައެވެ.

ރީޔޫނިއަންގެ ތިންވަނަ ލަނޑު 63 ވަނަ މިނެޓުގައި ކާމިޔާބުކުރީ ސާޕެޑޮން މެތިއުއެވެ. އޭނާ މި ލަނޑު ކާމިޔާބުކުރީ ކީޕަރު މުހައްމަދު ފައިސަލްއަށް ހެދުނު ގޯހެއްގެ ފައިދާ ނަގައިގެންނެވެ.

މި ލަނޑަށްފަހުވެސް ރީޔޫނިއަންގެ ފަރާތުން ފުލުފުލުގައި ހަމަލާތައް ފެނިގެންދިޔައެވެ. އެގޮތުން 68 ވަނަ މިނެޓުގައި އެޓީމުގެ ކެޕްޓަން ޑަމޯ ޖޯއި ވަނީ ހަތަރުވަނަ ލަނޑު ކާމިޔާބުކޮށްފައެވެ.

މެޗުގެ ފަހުވަގުތުކޮޅު ވެސް ރީޔޫނިއަންއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ. މި ހާާފްގައި ރާއްޖޭގެ ފަރާތުން މާ އެދެވޭ ކުޅުމެއް ނުފެނުނު ނަމަވެސް، ލަނޑު ޖެހުމަށް ފުރުސަތުތަކެއް ލިބި ބޭކާރުވިއެވެ.

މުބާރާތުގައި ރާއްޖެ ކުޅޭ ދެވަނަ މެޗުގައި ހޮނިހިރު ދުވަހު ނިކުންނާނީ ކޮމޯރޮސްއާ ދެކޮޅަށެވެ. އަދި ފަހު މެޗުގައި ހޯމަ ދުވަހު ނިކުންނާނީ މަޔޯޓްއާ ދެކޮޅަށެވެ.