މަޑަވެލި ހޯނޑެއްދޫ ކޯޒްވޭގެ މައްސަލަ އިތުރަށް ދިރާސާކުރަނީ
މި މައްސަލަ ދިރާސާ ކުރުމަށް ކުޑަ ކޮމިޓީއެއް ވަނީ އެކުލަވާލާފައި
ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކަލައިމްޓް ޗޭންޖް ކޮމިޓީ
ގދ. ހޯނޑެއްދޫ އާއި ގދ. މަޑަވެލި ގުޅާލުމަށް ހަދާފައިވާ ކޯޒްވޭގެ މައްސަލަ އިތުރަށް ދިރާސާ ކުރުމަށް ކުޑަ ކޮމިޓީއެއް އެކުލަވާލުމަށް ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކަލައިމެޓް ޗޭންޖް ކޮމިޓީން ނިންމައިފިއެވެ.
އަންގާރަ ދުވަހު ބޭއްވި ކޮމިޓީގެ ބައްދަލުވުމުގައި ކޮމިޓީގައި މި މައްސަލަ އާއި ގުޅޭގޮތުން މެންބަރު ފާޅުކުރެއްވި ޚިޔާލުތަކަށް ރިއާޔަތްކޮށް ކޮމިޓީގެ މުޤައްރިރު ނިންމަވާފައިވަނީ މި މައްސަލަ ކޮމިޓީއަށް ބަލައިގަތުމަށެވެ. ކޮމިޓީގައި މި މައްސަލަ އިތުރަށް ދިރާސާ ކުރުމަށް ނިންމަވާ އަދި މި މައްސަލަ ދިރާސާ ކުރުމަށްޓަކައި ކުޑަ ކޮމިޓީއެއް ވަނީ އެކުލަވާލާފައެވެ.
ކުޑަ ކޮމިޓީގައި ހިމެނި ވަޑައިގަންނަވަނީ އުނގޫފާރު ދާއިރާގެ މެންބަރު މުހައްމަދު ވަހީދާއި، ގައްދޫ ދާއިރާގެ މެންބަރު އަހުމަދު ޒާހިރު އަދި މަޑަވެލީ ދާއިރާގެ މެންބަރު ހުސައިން ފިރުޝާން އެވެ. ކުޑަ ކޮމިޓީން އެމައުލޫމާތުތައް ދިރާސާ ކުރައްވާ ހޯދަން ޖެހޭ ހޯދުންތައް ހޯއްދެވުމަށް ފަހު ސަމަރީ ރިޕޯޓެއް ތައްޔާރުކޮށް އެމައްސަލަ އަނބުރާ ކޮމިޓީއަށް ގެނައުމަށް ކޮމިޓީގެ މުޤައްރިރު ވަނީ ދެ ހަފްތާގެ މުއްދަތެއް ދެއްވާފައެވެ.
ކޯޒްވޭ އާއި ގުޅޭ ގުޅޭގޮތުން ކޮމިޓީގައި ވާހަކަ ދައްކަވަމުން މަޑަވެލި ދާއިރާގެ މެންބަރު ހުސައިން ފިރުޝާން ވިދާޅުވީ މަޑަވެލި ހޯނޑެއްދޫ ކޯޒްވޭއަކީ 2008 ވަނަ އަހަރު ރައީސް މުހައްމަދު ނަޝީދުގެ ވެރިކަމުގައި ފުރަތަމަ ހަދަން ޕްލޭން ކުރި ކޯޒްވޭއެއް ކަމަށެވެ.
ކޯޒްވޭ ހެދުމަށް އީއައިއޭ ހެދިފައިވަނީ 2012 ވަނަ އަހަރު ނަމަވެސް އެމްޑީޕީ ސަރުކާރު ވެއްޓުމާއި ގުޅިގެން މަސައްކަތް ހުއްޓިފައި އޮތުމަށްފަހު ކޯޒްވޭގެ މަސައްކަތް ފެށިފައިވަނީ 2016 ވަނަ އަހަރު ކަމަށް ފިރުޝާން ވިދާޅުވިއެވެ. 2016 ވަނަ އަހަރު ދެފަހަރެއްގެ މަތިން އީއައިއޭ ހަދަން އިއުލާން ކޮށްފައިވާކަމަށާއި ނަމަވެސް އީއައިއޭ ހެދިކަމެއް އިނގެން ނެތް ކަމަށެވެ. އަދި މި ދެ އިއުލާނަކީ އޭރުގެ ހައުސިންގ މިނިސްޓްރީގެ ދެ ޑިޕާޓްމަންޓަކުން ކޮށްފައިވާ ދެ އިއުލާނެއް ކަމަށް ފިރުޝާން ވިދާޅުވިއެވެ.
ފިރުޝާން ވިދާޅުވީ 2012 ވަނަ އަހަރު ހެދި އީއައޭ ރިޕޯޓް އީޕީއޭގެ ވެބްސައިޓްގައި އޭރު ނެތް ކަމަށާއި މި ރިޕޯޓް އީޕީއޭގެ ވެބްސައިޓްގައި ޝާޢިއު ކޮށްފައިވަނީ މިއަހަރުގެ މާރޗް މަހު 26 ވަނަ ދުވަހު ކަމަށެވެ. 440 މީޓަރު ދިގުމިނިގެ މި ކޯޒްވޭ އަކީ 29 މިލިއަން ރުފިޔާ ދިވެހި ދައުލަތުން ޚަރަދު ކޮށްގެން ހަދާފައިވާ ކޯޒްވޭއެކެވެ.
ކޯޒްވޭގެ ސަބަބުން މޫސުން ގޯސްވެ ކަނޑު ގަދަވާ ކޮންމެ ފަހަރު ރަށަށް ރާޅު އަރާ ފެންބޮޑުވެ ދަނޑު ބިންތައް ހަލާކުވެ އެ ރަށްރަށުގައި ދިރިއުޅުމަށް ވަނީ ދަތިތަކާއި ކުރިމަތިލާން ޖެހިފައެވެ. ރައްޔިތުން ނިކުމެ ހައިމާކެއް ބޭނުންކޮށްގެން ކޯޒްވޭ ވަނީ ކަނޑާލަފައެވެ. މި މައްސަލަ އެންވަޔަރަންމަންޓް އެންޑް ކްލައިމްޓް ޗޭންޖް ކޮމިޓީން ކޮމިޓީގެ ސަމާލުކަމަށް އައިސްފައިވަނީ ކޯޒްވޭގެ ސަބަބުން ތިމާވެށީގެ ވަރަށް ގިނަ މައްސަލަތަކެއް ކުރިމަތިވަމުން ދާތީއެވެ.
