ދިވެހިރާއްޖޭގެ ގައުމީ އެއާލައިން މޯލްޑިވިއަން މުވައްޒަފުންގެ މުސާރާ ބޮޑު ކުރީ ވާދަވެރި އެހެން ކުންފުނިތަކަށް މުވައްޒަފުން ދާތީ ކަމަށް މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިންޑް ޑިރެކްޓަރ މުހައްމަދު ރިޒްވީ ވިދާޅުވެއްޖެއެވެ.

އައިލެންޑް އޭވިއޭޝަންގެ ސީނިއާ މުވައްޒަފުން މުސާރާ ބޮޑުކޮށްފައިވާ މައްސަލާގައި މޯލްޑިވިއަންގެ މެނޭޖްމެންޓުގެ އިސް ބޭފުޅުން ވަނީ އަންގާރަ ދުވަހު ސްޓޭޓް އޯން އެންޓަރޕްރައިސަސް ކޮމިޓީ (އެސްސޯއީ) އަށް ހާޒިރުކޮށްފައެވެ.

އެސްއޯއީގެ ސާދަ ވަނަ ކޮމިޓީގައި މެމްބަރުން ކުރިމަތި ކުރުވި ސުވާލުތަކަށް ޖަވާބު ދެއްވަމުން މޯލްޑިވިއަންގެ މެނޭޖިން ޑިރެކްޓަރ މުހައްމަދު ރިޒްވީ ވިދާޅުވީ، ބައެއް މުވައްޒަފުންގެ މުސާރަ ބޮޑުކޮށްފައިވާ ކަމަށެވެ.

ރިޒްވީގެ މުސާރާ އެއްލައްކަ ލިބޭ ކަމަށް ޝޯޝަލް މީޑިއާގައި ދެކެވޭ ވާހަތައް ރިޒްވީ ދޮގުކުރިއެެވެ. ވާދަވެރި ކުންފުނިތަކުން ހުށައެޅުން ލިބުމުން ބައެއް މުވައްޒަފުން ވަޒީފާއިން ވަކިވި ކަމަށެވެ.

ރިޒްވީ ވިދާޅުވީ، ކުންފުނީގެ މުވައްޒަފުން މަސައްކަތް ކުރަން ރަނގަޅު މަހައުލެއް ހޯދައި ދިނުމުގެ މަސައްކަތް ކުރަމުންދާ ކަމަށެވެ. އެގޮތުން މި މަސް ތެރޭގައި ރިޒަވޭޝަން އޮފީސްވެސް އެހެން ތަނަކަށް ބަދަލުކުރާނެ ކަމަށެވެ. ޓެކްނިކަލް ބައެއް ތަންތަން ބަދަލުކޮށްފައިވާ ކަމަށްވެސް ވިދާޅުވިއެވެ.

މޯލްޑިވިއަންގެ އެމްޑީ ވިދާޅުވީ، މިދިޔަ އަހަރާއި އަޅާ ބަލާއިރު މި އަހަރުގެ ފުރަތަމަ ހަ މަސް ތޭރޭގައި ކުންފުންޏަށް ފައިދާވެފައިވާ ކަމަށެވެ. އެތެރޭގެ އުދުހުމުގެ އަގު ހެޔޮ ކުރުމުންވެސް އެ ކުންފުންޏަށް ވަނީ ފައިދާވެފައެވެ.

މޯލްޑިވިއަން ގައި 1240 މުވައްޒަފުން ތިބޭއިރު އޭގެ ތެރެއިން 90 ޕަސެންޓަކީ ދިވެހިންނެވެ. މޯލްޑިވިއަން ގައި މިހާރު 23 އެއާކްރާފްޓް ގެންގުޅޭއިރު އެތެރޭގެ އުދުހުން ތަކަށް 10 ފްލައިޓެއް ބޭނުންކުރެއެވެ. މޯލްޑިވިއަން ގައި މޫދަށް ޖައްސާ 11 ބޯޓެއް އޮވެއެވެ.