ޖޭއެސްސީގެ ޤާނޫނަށް އިސްލާހު ހުށައެޅުމުގެ ބިލަށް ފަނޑިޔާރުންގެ ޖަމިއްޔާއިން ހިޔާލު ހުށައަޅައިފި
ސަރުކާރުން ހުށައެޅި އިސްލާހުތަކުގެ އިތުރުންވެސް ކަންކަން ހުށައެޅި
ޖުޑީޝަލް ސާރވިސް ކޮމިޝަން
ޖުޑީޝަލް ކޮމިޝަންގެ ޤާނޫނަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅާފައިވާ އިސްލާހުތަކަށް ދިވެހި ފަނޑިޔާރުންގެ ޖަމިއްޔާއިން ހިޔާލު ހުށައަޅައިފިއެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ މުޤައްރިރު އިމްތިޔާޒް ފަހުމީއަށް އެެޑްރެސްކޮށް ފަނޑިޔާރުންގެ ޖަމިއްޔާއިން ހޯމަ ދުވަހު ހުށައަޅާފައިވާ ސިޓީގައި ބުނެފައިވަނީ، ޤާނޫނު ނަންބަރު 10/2008 (ޖުޑީޝަލް ސާރވިސް ކޮމިޝަނުގެ ޤާނޫނު) އަށް އިސްލާހު ގެނައުމަށް ސަރުކާރުން ހުށައަޅާފައިވާ ބިލާއި ގުޅޭގޮތުން ފަނޑިޔާރުންގެ ޖަމިއްޔާއަށް ފާހަގަ ކުރެވޭ ކަންކަމާއި، ބިލުގައި ހިމަނަން ފެންނަ ބައެއް މުހިއްމު ކަންކަން ހިމެނޭ ކަރުދާހެއް ފޮނުވާފައިވާނެ ކަމަށެވެ.
ސަރުކާރުން ހުށައަޅާފައިވާ އިސްލާހުގައި ކޯޓުތަކުގެ އިދާރީ އޮނިގަނޑު އެކުލަވައިލުމާއި އިދާރީ މުވައްޒަފުންގެ ވަޒީފާއާ ބެހޭ ކަންކަން އެ ކޯޓެއްގެ ރަޖިސްޓްރާ ނުވަތަ އިދާރީ އެންމެ އިސް މުވައްޒަފުގެ މަޝްވަރާގެ މަތިން ހިންގަން ހުށަހަޅާފައި ވާއިރު، ފަނޑިޔާރުންގެ ޖަމިއްޔާއިން ވަނީ މި ހުށަހެޅުމުން ރަޖިސްޓްރާ އުނިކުރަން ހުށައަޅާފައެވެ. އެގޮތުން އެ ޖަމިއްޔާއިން ބުނީ، ކޯޓުތަކުގެ އިދާރީ އޮނިގަނޑުގައި ވަނީ އިދާރީ އެންމެ އިސް ފަރާތަކީ ކޯޓް އެޑްމިނިސްޓްރޭޓަރުން ކަމުގައި ކަނޑައަޅާފައި ކަމަށެވެ.
ސަރުކާރުން ހުށައަޅާފައިވާ އިސްލާހުތަކަށް ފަނޑިޔާރުންގެ ޖަމިއްޔާއިން ގިނަ ހިޔާލުތަކެއް ހުށައަޅާފައިވާއިރު، އެ ޖަމިއްޔާއިން ވަނީ ސަރުކާރުން ހުށައެޅި އިސްލާހުތަކުގެ އިތުރުންވެސް އެ ބިލުގައި ހިމަނަން ބޭނުންވާ ކަންކަން ކޮމިޓީއަށް ހުށައަޅާފައެވެ. އޭގެތެރޭގައި ފަނޑިޔާރުންނާ ބެހޭ ގޮތުން ޖޭއެސްސީ އަށް ހުށައެޅޭ އެކިއެކި ޝަކުވާތަކުގެ މައްސަލަތައް ނިންމާނެ މުއްދަތެއް ކަނޑައެޅުން ފަދަ ކަންކަން ހިމެނެއެވެ.
