ކާބަން ނިއުޓްރަލް ވެވޭނެ ގޮތާއި ޓެކްނޮލޮޖީ އެބަހުރި، ބޭނުންވަނީ އަޒުމު: ރައީސް ނަޝީދު
3 ޖުލައި 2019 | ބުދަ 13:44ރަނގަޅު އެކްޝަން ޕްލޭންއަކާއި ގާނޫނީ އޮނިގަނޑެއްގެ ތެރެއިން ލޯ-ކާބަން ތަރައްގީ ކުރެވޭނެ
ރައީސް ނަޝީދު ބައިވެރިވެވަޑައިގެންނެވި ޕެނަލްގެ ބައިވެރިންނާ އެކު
ލޯ-ކާބަން ތަރައްގީގެ ސްޓްރެޖީތަކުގެ ދަށުން ގައުމުތައް ތަރައްގީ ކުރެވޭނެ ޓެކޮނޮލޮޖީއާއި އިލްމު މިހާރު އެބަހުރި ކަމަށާއި، ދެން ބޭނުންވަނީ އެކަން ކުރަން އަޒުމް ކަނޑައެޅުން ކަމަށް ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ވިދާޅުވެއްޖެއެވެ.
ރުވާންޑާގެ ވެރިރަށް ކިގާލީގާއި ކުރިޔަށްދާ ކިގާލީ ގްލޯބަލް ޑައިލޮގްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ރަނގަޅު އެކްޝަން ޕްލޭންއަކާއި ގާނޫނީ އޮނިގަނޑެއްގެ ތެރެއިން ލޯ-ކާބަން ތަރައްގީގެ ސްޓްރެޓެޖީތަކުގެ ދަށުން ގައުމުތައް ތަރައްގީ ކުރެވޭނެ ކަމަށެވެ.
އަދުގެ ދުނިޔޭގައި އިޔާދަނުކުރެވޭ ހަކަތައަށް ވުރެ އިޔާދަކުރެވޭ ހަކަތަ އުފައްދަން މާ އަގުހެޔޮ ކަމަށް ވެސް ރައީސް ނަޝީދު ފާހަގަކުރެއްވިއެވެ. އެކަމުގެ މިސާލެއް ދައްކަވަމުން ރައީސް ނަޝީދު ވިދާޅުވީ މި ފަހުން އިންޑިއާގައި ހަކަތަ އުފައްދާ ޕްލާންޓަކަށް ބިޑް ކުރުމުގެ ކަންކަން ކުރިޔަށް ދިޔައިރު ފާހަގަވީ ކަމަކީ، "ކޯލް" އަށް ވުރެ އިޔާދަކުރަނިވި ހަކަތަ ބޭނުންކޮށްގެން ހަކަތަ އުފައްދަން މާ އަގުހެޔޮ ކަމެވެ. ހިޔާލަކީ އެކްސްޓްރެކްޝަން މަދުކޮށް، ރީސައިކަލް ކުރުން އިތުރުކުރުން ކަމަށް އެމަނަކިފާނު ވިދާޅުވިއެވެ.
ރައީސް ނަޝީދު ވިދާޅުވީ މިހާރު ރާއްޖޭގައި އޮތް ސަރުކާރަކީ ވެސް ލޯ-ކާބަން ތަރައްގީގެ މެނިފެސްޓޯއެއްގެ ދަށުން ވެރިކަމަށް އައިސްފައިވާ ސަރުކާރެއް ކަމަށެވެ. އަދި މީގެ ނުވަ އަހަރު ކުރިން ދިވެހިރާއްޖެ ވަނީ ކާބަން ނިއުޓްރަލް ގައުމަކަށް ވާން ނިންމި ފުރަތަމަ ގައުމަށް ކަމަށާއި، މިހާރު ދުނިޔޭގެ 49 ގައުމަކުން ކާބަން ނިއުޓްރަލް ވާން ނިންމައި، އިތުރު ގައުމުތަކުން ވެސް ވަނީ ކާބަން ނިއުޓްރަލްވުމުގެ މަޝްވަރާތައް ކުރަން ފަށާފައި ކަމަށް އެމަނިކުފާނު ވިދާޅުވިއެވެ.
އެގޮތުން ދުނިޔޭގެ ފަސްވަނައަށް އެންމެ ބޮޑު އިގްތިސާދު ކަމުގައިވާ ކެލިފޯނިއާއިން ވެސް މިހާރު ވަނީ ކާބަން ނިއުޓްރަލް ވުމުގެ މަސައްކަތް ފަށާފައި ކަމަށާއި، މިހާރު ދުނިޔޭގެ ކޮންމެ ހިސާބެއްގައި ވެސް އިޔާދަކުރަނިވި ހަކަތަ ބޭނުންކޮށްގެން ކަރަންޓު ފޯރުކޮށްދިނުމުގެ ގާބިލިއްޔަތު އެބަހުރި ކަމަށެވެ.
ކިގާލީ ގްލޯބަލް ޑައިލޮގަކީ ތަރައްގީ ގެނައުމުގައި މޫސާމާ ރައްޓެހި ޓެކްނޮލިޖީއާއި އީޖާދީ ހައްލުތައް ބޭނުންކޮށްގެން ދެމެހެއްޓެނިވި ތަރައްގީ ކުރެވޭނެ ގޮތްތަކާއި ބެހޭގޮތުން އޮންނަ ބައިނަލްއަގްވާމީ ޕެނަލިސްޓުން ބައިވެރިވާ ޑައިލޮގެކެވެ. މިއީ އޮބްޒާވަރ ރިސާޗް ފައުންޑޭޝަންގެ ސެންޓަރ ފޯރ ނިއު އިކޮނޮމިކް ޑިޕްލޮމަސީ އަދި ރްވާންޑާ ކޮންވެންޝަން ބިއުރޯ ގުޅިގެން ކުރިޔަށް ގެންދާ މަޝްވަރާ ބައްދަލުވުމެކެވެ.
ރައީސް ނަޝީދު މި މަޝްވަރާ ބައްދަލުވުމުގައި ބައިވެރިވެވަޑައިގެންނެވީ "ދި ކިގާލީ ކޮންސެންޝަސް: އަ ނިއު ޗާޓަރ ފޯރ ގްރޯތް އެންޑް ޑިވެލިޕްމަންޓް" ގެ ޕެނަލް ޑިސްކަޝަންގައެވެ.
