އަނިޔާ ލިބޭ މީހުންގެ ޒާތީ މައުލޫމާތު ހާމަނުކުރުމަށް މެމްބަރުންނަށް އިލްތިމާސްކޮށްފި
2 ޖުލައި 2019 | އަންގާރަ 13:35އަބުރު ރައްކާތެރިކުރުމަށް މެމްބަރުން އިސްކަން ދެއްވަން ޖެހޭ
ރައްޔިތުންގެ މަޖިލީހުގެ ޖަލްސާ އެއް ކުރިޔަށް ދަނީ
ރައްޔިތުންގެ މަޖިލީހަށް ހުށައެޅޭ މައްސަލަތަކުގައި މެމްބަރުން ވާހަކަދައްކަވާއިރު، އަނިޔާ ލިބޭ މީހުންގެ ޒާތީ މައުލޫމާތު ހާމަނުކުރުމަށް އިލްތިމާސްކޮށްފިއެވެ.
މަޖިލީހުގެ އިދާރާއިން އަންގާރަ ދުވަހު ނެރެފައިވާ ބަޔާނެއްގައި ބުނީ، މަޖިލީހަށް ހުށައެޅޭ ބިލުތަކާއި މައްސަލަތަކުގައި މަޖިލީހުގެ ޖަލްސާ އަދި ކޮމިޓީތަކުގެ ބައްދަލުވުން ތަކުގައި މެމްބަރުން ވާހަކަދައްކަވާއިރު މައްސަލަ ތަކުގައި އަނިޔާ ލިބިފައިވާ ފަރާތްތައް ނުވަތަ ވިކްޓިމް އާއި މައްސަލަތަކުގައި ހެކިބަސްދީފައިވާ ފަރާތްތަކުގެ ކަރާމަތާއި އަބުރު ރައްކާތެރިކުރުމަށް މެމްބަރުން އިސްކަންދެއްވަން ޖެހޭ ކަމަށެވެ.
އެ ފަރާތްތަކަށް ނުރައްކަލެއް ވެދާނެ މީހުންގެ ކިބައިން އެ ފަރާތްތައް ރައްކާތެރިކޮށް، އެ ރައްކާތެރިކަން ދެމެހެއްޓުމަށްޓަކައި އެ ފަރާތްތަކުގެ ޒާތީ މައުލޫމާތު ހާމަނުކުރުމަށް ސަމާލުވެވަޑައިގަތުމަށް މަޖިލީހުގެ އިދާރާއިން ވަނީ މެމްބަރުންނަށް އިލްތިމާސް ކޮށްފައެވެ.
ރައްޔިތުންގެ މަޖިލީހުން އެފަދަ ގޮތަކަށް ބަޔާނެއް ނެރެފައިވާއިރު، ދައުލަތުގެ ބެލުމުގެ ދަށުގައި ހުއްޓާ ގެއްލުން ޝައިމްގެ މައްސަލާގައި ޖެންޑަރ މިނިސްޓަރު އެ ކުއްޖާއާ ބެހޭ ޒާތީ މައުލޫމާތު ހިއްސާ ކޮށްފައިވާތީ މަޖިލީސް މެމްބަރުންގެ ފާޑު ކިޔުން ވަނީ އަމާޒުވެފައެވެ. އެކަމަކު އެ ކުއްޖާގެ ޒަތީ މައުލޫމާތުތައް ރައްކާތިރު ކުރުމުގެ ގޮތުން މަޖިލީހުގެ ޖެންޑަރ ކޮމިޓީ އަށް ޝިދާތާ ހާޒިރު ކުރި ކޮމިޓީ ވަނީ ސިއްރުކޮށްފައެވެ.
