މަނަފަރު ރިސޯޓް މައްސަލަ ހައްލު ކުރުމަށް ޓޫރިޒަމް މިނިސްޓަރ އެ ރިސޯޓަށް
މަނަފަރު ރިސޯޓްގައި ދިވެހިންގެ ރޭޝިއޯ 60 އިންސައްތައަށްވުރެ މަތި
ޓޫރިޒަމް މިނިސްޓަރ އަލީ ވަހީދު މީޑިއާއަށް މައުލޫމާތުދެއްވަނީ
މަނަފަރު ރިސޯޓުގެ މުވައްޒަފުންތަކެއް ވަޒީފާއިން ވަކިކުރަން ނިންމުމާ ގުޅިގެން އުފެދުނު ހަމަނުޖެހުންތައް ހައްލު ކުރުމަށް ޓޫރިޒަމް މިނިސްޓަރ އަލީ ވަހީދު އެ ރިސޯޓަށް ވަޑައިގަންނަވަން ނިންމަވައިފިއެވެ.
ހއ. އަތޮޅުގައި އޮންނަ މަނަފަރު ރިސޯޓުގެ ވިޔަފާރި ދަށްވުމުގެ ސަބަބުން ގިނަ އަދަދެއްގެ މުވައްޒަފުންތަކެއް ވަޒީފާއިން ވަކި ކުރަން ނިންމުމާ ގުޅިގެން ޓޫރިޒަމް މިނިސްޓަރ އަލީ ވަހީދު އާދިއްތަ ދުވަހު އެރަށަށް ވަޑައިގަތުމަށް ނިންމަވާފައިވާއިރު، އެކަމާ ގުޅޭގޮތުން މީޑިއާއަށް މައުލޫމާތު ދެއްވަމުން މިނިސްޓަރ ވިދާޅުވީ، އެ މައްސަލަ ބަލަން ނިންމާފައިވަނީ މިނިސްޓްރީގެ އަމިއްލަ އިސްނެގުމުގެ މަތިން ކަމަށާއި، އެކަން ހިނގާފައިވާ ގޮތް ރަނގަޅަށް ބައްލަވާނެ ކަމަށެވެ.
މިނިސްޓަރ އެހެން ވިދާޅުވެފައިވާއިރު، މި އަހަރު އެ ރިސޯޓުގެ މާލީ ހާލަތު ދައްވެ ރިސޯޓުގެ ބައެއް ކަންކަން ރީސްޓްރަކްޗަރ ކުރުމުގެ އިތުރުން ބައެއް މަގާމުތައް އުވާލަން ޖެހިފައިވާ ކަމަށް މެނޭޖްމަންޓުން މުވައްޒަފުންނަށް އަންގާފައިވާ ކަމަށް ބައެއް މީޑިއާ ތަކުގައި ވަނީ ރިޕޯރޓް ކޮށްފައެވެ. އަދި އެކަމާ ގުޅިގެން ރިސޯޓުގެ މުވައްޒަފުން ވަނީ ބަނޑުހައި ހޫނު ކަމުގެ ހަޅުތާލެއްވެސް ކޮށްފައެވެ.
އެކަމާ ގުޅޭގޮތުން މިނިސްޓަރ ވިދާޅުވީ، ރިސޯޓުގެ ވިޔަފާރި ދަށްވެ "ރިޑަންޑެންސީ"ގެ ހާލަތަށް ގޮސްފައިވާ ކަމަށް ލިބިފައިވާ މައުލޫމާތު ކަށަވަރު ކުރައްވާނެ ކަމަށެވެ. އަދި އެފަދަ ހާލަތެއްގައި ރިސޯޓުގެ މަސްލަހަތާއި، މުވައްޒަފުންގެ މަސްލަހަތު ނުގެއްލޭ ގޮތަށް ޤާނޫނާއި ޤަވާއިދު ތަކުގެ ތެރެއިން ހައްލެއް ގެނައުމަށް މަސައްކަތް ކުރައްވާނެ ކަމަށް މިނިސްޓަރ ވިދާޅުވި އެވެ.
މިދިޔަ އަހަރު އޯގަސްޓު މަހުގެ މިނިސްޓްރީގެ އިންސްޕެކްޝަން ރިކޯޑްތައް ދައްކާގޮތުން މަނަފަރު ރިސޯޓްގައި ދިވެހިންގެ ރޭޝިއޯ 60 އިންސައްތައަށްވުރެ މަތި އެވެ. މިނިސްޓަރ ވދާޅުވީ މިއަހަރު ފެބްރުއަރީގައި ހެދުނު ސޭފްޓީ އޮޑިޓްއިން ދައްކާގޮތުން އެ ރިސޯޓުގައި 56 އިންސައްތަ ދިވެހިންގެ ރޭޝިއޯ ހިފެހެއްޓިފައިވާ ކަމަށެވެ.
