މެޖިސްޓްރޭޓް ޝުކޫރުގެ މައްސަލަތަކެއް ޖޭއެސްސީން ބަލަނީ
ޝުކޫރާއި ބެހޭ ގޮތުން ޖުމްލަ ފަސް ޝަކުވާއެއް ދަނީ ބަލަމުން
ޖޭއެސްސީން ދަނީ ގިނަ ފަނޑިޔާރުންތަކުގެ މައްސަލަތައް ބަލަމުން
ގއ. މާމެންދޫ ކޯޓުގެ މެޖިސްޓްރޭޓް އަހުމަދު ޝުކޫރުގެ މައްސަލަތަކެއް ބެލުމަށް ނިންމާފައިވާ ކަމަށް ޖުޑީޝަލް ސަރވިސް ކޮމިޝަން ( ޖޭއެސްސީ) އިން ބުނެފިއެވެ.
ބުދަ ދުވަހު ނޫސްވެރިނަށް މައުލޫމާތުދެމުން ޖޭއެސްސީގެ ޑިރެކްޓަރު ހަސަން ޒަހީން ވިދާޅުވީ، ޝުކޫރުއާ ބެހޭ ގޮތުން އޭގެ ތެރެއިން ހަތަރު ޝަކުވާއެއް ބަލަމުންދާ ކަމަށެވެ. އޭނާ ބެހޭ ޝަކުވާއެއް މީގެ ކުރިން ވެސް އެ ކޮމިޝަނަށް ވަނީ ހުށައެެޅިފައެވެ. އެއީ ކޮން ޝަކުވާތަކެއް ކަން ހާމައެއް ނުކުރެއެވެ.
އޭގެ އިތުރުން ޒަހީން ވިދާޅުވީ، ކްރިމިނަލް ކޯޓުގެ ގާޒީ ހަސަން ނަޖީބާ ބެހޭ ތިން ޝަކުވާއެއް ބެލުމަށް ކޮމިޝަނުން ނިންމާފައިވާ ކަމަށެވެ. ކުރިން ލިބިފައިވާ ޝަކުވާތަކާއި އެކު ނަޖީބުގެ ހަތް ޝަކުވާއެއް ތަހުގީގު ކުރުމުގެ މަސައްކަތް ޖޭއެސްސީން ދަނީ ކުރަމުންނެވެ.
ކ. އަތޮޅު މެޖިސްޓްރޭޓް މުހައްމަދު ރާޣިބް އަހުމަދާއި ބެހޭ ޝަކުވާއެއް ކުރިން ހުށައެޅިފައިވާކަން ފާހަގަ ކުރައްވަމުން ޒަހީން ވިދާޅުވީ، އޭނާއާ ބެހޭ އިތުރު ޝަކުވާއެއް ވެސް ހުށައެޅިފައިވާ ކަމަށެވެ.
ރާއްޖެ.އެމްވީ އަށް މައުލޫމާތު ލިބިފައިވާ ގޮތުން ޖޭއެސްސީން ބަލަމުންދާ ރާޣިބްގެ މައްސަލަތަކުގެ ތެރޭގައި، އޭނާ ކޯޓުގެ އަންހެން މުވައްޒަފުންތަކަކަށް ޖިންސީ ފުރުއްސާރަ ކުރިކަމަށް ބުނާ މައްސަލަ ވެސް ހިމެނެއެވެ.
މި ހުރިހާ ޝަކުވާތަކެއް ވެސް ބަލަމުންދާނީ ކޮމިޝަނުން އެކުލަވައިލާފައިވާ ވަކި ކޮމިޓީއަކުން ކަމަށް ޒަހީން ވިދާޅުވިއެވެ.
