އޯރކާ މީޑިއާ ގްރޫޕުން ވިޔަފާރިއަށް ޚާއްސަ މަޖައްލާއެއް ޗާޕުކޮށްގެން ނެރެނީ!
މިއީ އޮންލައިން ވިޔަފާރި ނޫސްމަޖައްލާއެއް
އޯރކާ މީޑިއާ ގްރޫޕުން ވިޔަފާރިއަށް ޚާއްސަކޮށްގެން ނެރޭ މަޖައްލާ
އޯރކާ މީޑިއާ ގްރޫޕުން ވިޔަފާރިއަށް ޚާއްސަ ކޯޕަރޭޓް މޯލްޑިވްސް މަޖައްލާގެ ފުރަތަމަ ޗާޕު ނެރެން ނިންމައިފިއެވެ.
ކޯޕަރޭޓް މޯލްޑިވްސްއަކީ އޯރކާ މީޑިއާ ގްރޫޕުން 2016 ވަނަ އަހަރު ލޯންޗްކުރި އޮންލައިން ވިޔަފާރި ނޫސްމަޖައްލާއެކެވެ.
މަޖައްލާ އަމާޒުކޮށްފައި ވަނީ ކޯޕަރޭޓް އަދި ހޮސްޕިޓަލިޓީ ދާއިރާގެ ފަރާތްތަކަށެވެ.
އޯރކާ އިން ބުނީ މި މަޖައްލާ ނެރެން ގަސްތުކޮށްފައި ވަނީ ކޮންމެ ހަތަރު މަހުން އެއް މަހުން ކަމަށެވެ. މި މަޖައްލާގެ އެންމެ ފުރަތަމަ ޗާޕު ނެރެން ހަމަޖެހިފައި ވަނީ މި އަހަރުގެ ޖުލައި މަހު ކަމަށާއި މަޖައްލާއަކީ ތަފާތު ގިނަ ދާއިރާއަކަށް ބަހާލައިގެން ނެރޭ މަޖައްލާއެއް ކަމަށް ވެސް އޯރކާ އިން ބުންޏެވެ.
މި މަޖައްލާގައި ހިމެނޭ ދާއިރާތަކަކީ؛ ޞިއްޙަތު، ބޭންކިންގް، އިންޝުއަރެންސް، ޓެކްނޮލޮޖީ، ތިމާވެށި، މަސްވެރިކަން، މާކެޓިން،ދަތުރުފަތުރު، ވިޔަފާރިވެރިން، ފިނޭންސް، ރިއަލް އެސްޓޭޓް، ސަރުކާރު، ސީ.އެސް.އާރް، ޓުއަރިޒަމް، އަންހެނުން، ސްޓާޓްއަޕްސް،މީހުން، އޭވިއޭޝަން، ކޮންސިއުމަރ،ވޯރކް ލައިފް އަދި ކާނާ އެވެ.
އޯރކާ މީޑިއާ ގްރޫޕަކީ 2010 ވަނަ އަހަރުން ފެށިގެން މާރކެޓިންގެ މަސައްކަތުގައި ހަރަކާތްތެރިވަމުން އަންނަ ކުންފުންޏެކެވެ.
ނަމަވެސް މި އަހަރުގެ މޭމަހުގެ ތެރޭ މި ކުންފުނި ވަނީ މީޑިއާއަށް ޚާއްސަ ކުންފުންޏަކަށް ބަދަލުވެފައެވެ.
އޯރކާ މީޑިއާ ގްރޫޕުން ބުނީ މި ބަދަލާ އެކު އެ ކުންފުނިން ބޭނުން ވަނީ ރާއްޖޭގެ އިތުރުން ދުނިޔޭގެ އެހެނިހެން ޤައުމުތަކުގެ ޚަބަރުތައް ވެސް ކިޔުންތެރިންނާ ހަމައަށް ފޯރުކޮށްދިނުމަށް ކަމަށެވެ.
އޯރކާ މީޑިއާ ގްރޫޕުން ފޯރުކޮށްދޭ ޚިދުމަތްތަކުގެ ތެރޭގައި މީޑިއާގެ ޚިދުމަތް، އިވެންޓް ބޭއްވުން، މާރކެޓިންގެ ޚިދުމަތްތައް، ކޮންޓެންޓް މާރކެޓިންގް، ޕަބްލިޝިންގް، ވެބް ޑިޒައިން، އިޝްތިހާރުކޮށްދިނުން، ބްރޭންޑިންގް، ފޮޓޯ އާއި ވީޑިއޯ ނެގުމުގެ ޚިދުމަތްތައް ހިމެނެއެވެ.
