ޔޫއެފާގެ ކުރީގެ ރައީސް ޕްލެޓިނީ ދޫކޮށްލައިފި

ކޮރަޕްޝަންގެ ތުހުމަތުގައި ހައްޔަރުކުރި ޔުއެފާގެ ކުރީގެ ރައީސް މިޝޭލް ޕްލެޓިނީ ދޫކޮއްލައިފިއެވެ.

ފްރާންސްގެ އެންޓި ކޮރަޕްޝަން ފުލުހުން ޕްލެޓިނީ އަންގާރަ ދުވަހު ހައްޔަރުކޮށްފައިވާއިރު، އޭނާ ދޫކޮށްލީ ފްރާންސް ފުލުހުން ތަހުގީގުކުރަމުންދާ މައްސަލައަކާ ގުޅިގެން ސުވާލުކުރުމަށްފަހުއެވެ.

ޕްލެޓިނީގެ މައްޗަށް ކުރެވިފައިވާ ތުހުމަތަކީ ގަތަރުން 2010 ވަނަ އަހަރު ގަތަރުގައި ވޯލްޑް ކަޕް ބާއްވަން ފުރުސަތު ދިނުމެވެ. އަދި އެކަމުގައި ކޮރަޕްޝަން އެކުލެވޭ ކަމަށް ރިޕޯޓްތައްވެސް ބުނެއެވެ.

ފްރާންސްގެ އެންޓި ކޮރަޕްޝަން ފުލުހުން ވަނީ މި މައްސަލަ ސީރިއަސް މައްސަލައެއްގެ ގޮތުގައި ބަލާނެކަމަށް ބުނެފައެވެ.

ޕްލެޓިނީގެ ލޯޔަރުން ނެރުނު ބަޔާނެއްގައި ބުނީ، ޕްލެޓިނީ ހައްޔަރުކޮށްފައި ނުވާކަމަށާއި، ޕްލެޓިނީ ފުލުހަށް ހާޒިރު ކުރީ ސުވާލު ކުރުމަށް ކަމަށެވެ. އަދި ޕްލެޓިނީ ހުރީ ސާބިތުކަމާއެކު ކަމަށް ލޯޔަރުން ބުނެއެވެ.

ވޯލްޑް ކަޕް ބޭއްވުމުގެ ފުރުސަތު ގަތަރަށް ދޭން 2010 ވަނަ އަހަރު ފީފާގެ އެގްޒެކެޓިވް ކޮމިޓީން ނިންމި އިރު، ޕްލެޓިނީ އަކީ އެ ކޮމިޓީގެ މެމްބަރެކެވެ. އެ ވޯޓުގެ ކުރިން އެގްޒެކެޓިވް ކޮމިޓީގެ ދެ މެމްބަރަކު ވަނީ ކަރަޕްޝަނުގެ ތުހުމަތުގައި ސަސްޕެންޑްކޮށްފަ އެވެ.

މީގެއިތުރުން ޕްލެޓިނީ މަގާމުން ވަކި ކުރުމުގެ ކުރިން 2014 ވަނަ އަހަރު ޕްލެޓިނީ ވަނީ ގަތަރުގެ ވޯލްޑް ކަޕް ބިޑުގެ ކުރިން ގަތަރުގެ ފުޓުބޯޅަ އޮފިޝަލް މުހައްމަދު ބިން ހައްމާމުއާއެކު ސިއްރު ބައްދަލުވުންތަކެއް ބޭއްވިކަމަށް އެއްބަސްވެފައެވެ.

ވޯލްޑް ކަޕް 2022 ވަނަ އަހަރު ބާއްވަން ގަތަރުގެ އިތުރުން ބިޑުކުރީ ދެކުނު ކޮރެއާ، ޖަޕާން، އޮސްޓްރޭލިއާ އަދި އެމެރިކާއިންނެވެ.