ނޭޝަންސް ލީގުގައި ނެދަލޭންޑްސް ބަލިކޮށް ޕޯޗުގަލްއިން މުބާރާތުގެ ޗެމްޕިއަންކަން ހޯދައިފިއެވެ.

އާދީއްތަ ދުވަހުގެ ރޭ ކުޅުނު މެޗުން ޕޯޗުގަލް މޮޅުވީ ނެދަލޭންޑްސްއާ ވާދަކޮށް 0-1 ގެ ނަތީޖާއަކުންނެވެ.

ޕޯޗުގަލްގެ ޕޯޓޯގައި ކުޅުނު މި މެޗު ފެށިގެން ދެޓީމުގެ ފަރާތުން ފެނިގެންދިޔައީ ދާދި ހަމަހަމަ ކުޅުމެކެވެ. އެގޮތުން ދެޓީމުންވެސް ވަނީ ފުރަތަމަ ހާފްގައި ލަނޑު ޖެހުމަށް ފުރުސަތުތައް ތަނަވަސްކޮށްފައެވެ.

މި ހާފްގައި ޕޯޗުގަލްގެ ފަރާތުން ނުރައްކާތެރި ގިނަ ހަމަލާތަކެއް ފެނިގެންދިޔަ ނަމަވެސް، ނެދަލޭންޑްސްގެ ފަރާތުން މާ އެދެވޭ ހަމަލާތަކެއް ފެނިގެންނުދެއެވެ.

ދެވަނަ ހާފް ފެށިގެން ޕޯޗުގަލްއިން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން 60 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު ކާމިޔާބުކުރީ ބެނާޑޯ ސިލްވާގެ އެހީތެރިކަމާއެކު ގުއެޑެސްއެވެ. މިއީ އޭނާ ގައުމީ ޓީމަށް ކާމިޔާބުކުރި ފުރަތަމަ ލަނޑެވެ.

މި ލަނޑަށްފަހުވެސް ޕޯޗުގަލްއަށް ވަނީ ލީޑު ފުޅާކުރަންވެސް ފުރުސަތުތައް ލިބިފައެވެ. ނަމަވެސް އެޓީމަށް އެ ފުރުސަތުތަކުގެ ބޭނުން އެންމެ އެދެވޭ ގޮތެއްގައި ހިފިފައެއް ނުވެއެވެ.

މިއީ 2016 ވަނަ އަހަރުގެ ޔޫރޯއަށްފަހު، ޕޯޗުގަލްއިން ކާމިޔާބުކުރި ފުރަތަމަ ތަށްޓެވެ. އެޓީމުގެ ތާރީހުގައި މިހާތަނަށް ހޯދިފައިވަނީ އެންމެ ދެ ތަށްޓެވެ. މި ދެ ތަށިވެސް ޕޯޗުގަލްއިން ކާމިޔާބުކޮށްފައިވަނީ ކްރިސްޓިއާނޯ ރޮނާލްޑޯގެ ކެޕްޓަން ކަމުގެ ދަށުގައެވެ.

މުބާރާތުގެ ތިންވަނަ ހޯދާފައިވަނީ އިންގްލޭންޑުންނެވެ. އެޓީމުން ތިނަވަނަ ހޯދީ ޕެނަލްޓީ ޖަހައިގެން ސްވިޒަލޭންޑް ބަލިކުރުމަށްފަހުއެވެ.