އިންޑިއާގެ ބޮޑު ވަޒީރު ނަރެންދުރާ މޯދީ އަށް ދިވެހި ދައުލަތުން ދެވޭ އެންމެ މަތީ ޝަރަފު ''ނިޝާން އިއްޒުއްދީން އިއްޒަތުގެ ވެރިކަން'' ގެ ލަގަބު އަރުވަން ހަމަޖެހިއްޖެއެވެ.

އިންޑިއާގެ ނޫސްތަކުގައި އޮފިޝަލަކާ ހަވާލާދީ ބުނީ، އިންޑިއާގެ ބޮޑުވަޒީރު މޯދީ ރާއްޖެއަށް ކުރައްވާ ރަސްމީ ދަތުރުފުޅުގައި އެ މަނިކުފާނަށް އިހްތިރާމް އަދާކުރުމުގެ ގޮތުން ނިޝާން އިއްޒުއްދީންގެ ލަގަބު އަރުވަން ހަމަޖެހިފައިވާ ކަމަށެވެ.

ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވީ، އެކަމާ ބެހޭ ގޮތުން ޖަވާބެއް ދެއްވާނީ 11 ގެ ފަހުން ކަމަށެވެ.

މޯދީ އަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބަކީ ރާއްޖޭގައި ގައުމެއްގެ އިސްވެރިޔަކަށް ދެވޭ އެންމެ މަތީ ލަގަބެކެވެ.

މިހާތަނަށް މި ޝަރަފް އެރުވުނު ހަމައެކަނި ބޭރުގެ އިއްޒަތްތެރިޔަކީ އިނގިރޭސި ރާނީ އެލިޒަބަަތު އެލެކްސް ސެންޑްރަރ މޭރީ (އެލިޒަަބަތު 2). އެކަމަނާއަށް މި ޝަރަފް އަރުވާފައިވަނީ 1972 ވަނަ އަހަރުގެ މާރޗް މަހު އެ ކަމަނާ ރާއްޖެއަށް ކުރެއްވި ދަތުރުފުޅުގައެވެ.

ދެވަނަ ދައުރަކަށް ހޮވިވަޑައިގަތުމަށް ފަހު ގައުމުން ބޭރަށް ރާއްޖެއަށް ކުރައްވާ ދަތުރުފުޅުގައި އެމަނިކުފާނު ވަޑައިގަންނަވާނީ ހޮނިހިރު ދުވަހު މެންދުރުގެ 15:00 ގައެވެ.

ދިވެހި ސަރުކާރުން މޯދީ އަށް ހޫނު މަރުހަބާއެއް ކިޔަން ތައްޔާރުވެފައިވާއިރު މި ދަތުރުފުޅުގައި މުހިއްމު އެއްބަސްވުން ތަކެއްގައި ސޮއިކުރުމުގެ އިތުރުން އަދި ރައީސް ސޯލިހާ އެކު ޖޮއިންޓް ޕްރެސް ސްޓޭޓްމެންޓެއް ދެއްވުމަށް ވަނީ ހަމަޖެހިފައެވެ.

މޯދީގެ ދަރުފުޅުގައި އެންމެ ހާއްސަ ކަމެއްގެ ގޮތުގައި އޮތީ ރައްޔިތުންގެ މަޖިލީހުގައި ތަގްރީރު ކުރެއްވުމެވެ. އެމަނިކުފާނު މަޖިލީހުގައި ތަގްރީރު ކުރައްވާނީ 18:45 ގައެވެ. އެއަށް ފަހު މޯދީގެ ޝަރަފުގައި ރައީސް ސޯލިހު ދެއްވާ ފަރީކޮޅެއްގައި އެމަނިކުފާނު ބައިވެރިވެވަޑައިގަތުމަށް ވަނީ ތާވަލުކުރެވިފައެވެ.

ދެ ދުވަހުގެ ދަތުރުފުޅު ނިންމަވަލެއްވުމަށް ފަހު މޯދީ ދެން ވަޑައިގަންނަވަން ހަމަޖެހިފައިވަނީ އަވަށްޓެރި ސްރީލަންކާއަށެވެ.