ނޭޝަންސް ލީގު: އިންގްލޭންޑް ބަލިކޮށް ނެދަލޭންޑްސް ފައިނަލަށް

ނޭޝަންސް ލީގުގައި އިންގްލޭންޑް ބަލިކޮށް ނެދަލޭންޑްސް ފައިނަލުގެ ފަހު ޖާގަ ކަށަވަރުކޮށްފިއެވެ.

ބުރާސްފަތި ދުވަހުގެ ރޭ ކުޅުނު މެޗު އިންގްލޭންޑާ ވާދަކޮށް ނެދަލޭންޑްސްއިން ކާމިޔާބުކުރީ 1-3 ގެ ނަތީޖާއަކުންނެވެ. މި މެޗުގެ ފުރިހަމަ ވަގުތު ހަމަވިއިރު، ދެޓީމުވެސް 1-1 ގެ ނަތީޖާއިން އެއްވަރުވުމުން ނަތީޖާ ނެރެފައިވަނީ 15 މިނެޓުގެ ދެ ހާފް ކުޅެގެންނެވެ.

ޕޯޗުގަލްގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ ނެދަލޭންޑްސްއިންނެވެ. ނަމަވެސް މެޗުގައި ފުރަތަމަ ލަނޑު ޖަހާ ލީޑު ނެގީ އިންގްލޭންޑެވެ. މި ލަނޑު 32 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކުރީ މާކަސް ރަޝްފޯޑްއެވެ.

މި ލަނޑާއެކު ނެދަލޭންޑްސްއިން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން ފުލުފުލުގައި ލަނޑު ޖެހުމަށް އެޓީމުން ވަނީ ފުރުސަތުތައް ހޯދާފައެވެ. ނަމަވެސް ލިބުނު ފުރުސަތުގެ ބޭނުން އެޓީމަށް އެންމެ އެދެވޭ ގޮތެއްގައި ފުރަތަމަ ހާފްގައި ނުހިފެއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ނެދަލޭންޑްސްގެ މައްޗަށް އިންގްލޭންޑް ކުރީގައި އޮވެގެންނެވެ.

ދެވަނަ ހާފް ފެށިގެންވެސް ނެދަލޭންޑްސްގެ ފަރާތުން ހަމަލާތަކެއް ފެނިގެންގޮސްފައިވާއިރު، 73 ވަނަ މިނެޓުގައި އެޓީމުން ވަނީ ނަތީޖާ ހަމަހަމަކޮށްފައެވެ. މި ލަނޑު ކާމިޔާބުކުރީ މެންފިސް ޑިޕޭގެ އެހީތެރިކަމާއެކު ޑެލައިޓްއެވެ.

މެޗުގެ ފުރިހަމަ ވަގުތު ހަމަވައިރު، ދެޓީމުވެސް ވަނީ 1-1 ގެ ނަތީޖާއިން އެއްވަރުވެފައެވެ. އެގޮތުން ދެން ކުޅެފައިވަނީ 15 މިނެޓުގެ ދެހާފެވެ.

15 މިނެޓުގެ ފުރަތަމަ ހާފް ފެށިގެން ނެދަލޭންޑްސްއިން ވަނީ މެޗުގައި ފުރަތަމަ ފަހަރަށް ލީޑު ނަގާފައެވެ. މި ލަނޑަކީ އިންގްލޭންޑްގެ ވޯކާ އަތުން ބައިކޮޅަށް ވަތް ލަނޑެކެވެ.

ދެވަނަ ހާފްގައި ނެދަލޭންޑްސްއިން ލީޑު ފުޅާކޮށްފައިވާއިރު، މި ލަނޑު ކާމިޔާބުކުރީ ޑިޕޭގެ އެހީތެރިކަމާއެކު ޕްރޮމްސްއެވެ.

މިއީ 2010 ވަނަ އަހަރުގެ ވޯލްޑް ކަޕް ފައިނަލަށްފަހު، ބޮޑު މުބާރާތެއްގެ ފައިނަލުން ނެދަލޭންޑްސް ޖާގަ ހޯދި ފުރަތަމަ ފަހަރެވެ. ފައިނަލުގައި ނެދަލޭންޑްސް ބައްދަލުކުރާނީ ޕޯޗުގަލްއާއެވެ.