ލެސްޓާ ސިޓީއަށް ކުޅެމުން އަންނަ އިނގިރޭސި މިޑްފިލްޑަރ ޖޭމްސް މެޑިސަންއަށް ޕްރިމިއާ ލީގުގެ ގިނަ ކްލަބްތަކުން ޝައުގުވެރިވާ ކަމަށް ރިޕޯޓްތައް ބުނެފިއެވެ.

ޑެއިލީ ސްޓާއިން ބުނީ، ކުރިޔަށް އޮތް ސީޒަނަށް އަމާޒުކޮށް މެޑިސަން ގެނައުމަށް މެންޗެސްޓާ ޔުނައިޓެޑް، މެންޗެސްޓާ ސިޓީ، ޓޮޓެންހަމް ހޮޓްސްޕާ އަދި ލިވަޕޫލުން އަންނަނީ މަސައްކަތް ކުރަމުންނެވެ.

ރިޕޯޓްތައް ބުނާ ގޮތުން މެޑިސަން ވިއްކާލަން ލެސްޓާއިން އޮތީ ތައްޔާރަށެވެ. ނަމަވެސް އޭނާ ވިއްކާލަން ލެސްޓާއިން އެއްބަސްވާ އަގަކީ 60 މިލިއަން ޕައުންޑު ކަމަށް ރިޕޯޓްތައް ބުނެއެވެ.

އުމުރުން 22 އަހަރުގެ މެޑިސަން ލެސްޓާއަށް ބަދަލުވީ މިދިޔަ ސީޒަނުގައި 20 މިލިއަން ޕައުންޑުގެ އަގަކަށެވެ. އޭނާ އެ ކްލަބާއެކު ހަދާފައިވާ އެއްބަސްވުން 2023 ވަނަ އަހަރެވެ.

ކޮވެންޓްރީ ސިޓީއިން ކެރިޔަރު ފެށި މެޑިސަން ވަނީ ނޯވިޗްއަށްވެސް ކުޅެފައެވެ. އޭނާ ވަނީ ނޯވިޗްއަށް ކުޅުނު 53 މެޗުގައި 16 ލަނޑު ކާމިޔާބުކުރުމުގެ އިތުރުން އެ ކްލަބުގެ އެންމެ މޮޅު ކުޅުންތެރިޔާގެ މަގާމު 2017 ވަނަ އަހަރުގެ ސީޒަނުގައި ހޯދާފައެވެ.

ލެސްޓާއަށް މިހާތަނަށް ކުޅުނު 33 މެޗުގައި ހަތް ލަނޑު ކާމިޔާބުކޮށްފައިވާ މެޑިސަން އިނގިރޭސި ގައުމީ ޓީމަށް މެޗެއް ނުކުޅުނު ނަމަވެސް، އޭނާ ވަނީ އިނގިރޭސި 21 އަހަރުން ދަށުގެ ޓީމަށް ހަ މެޗު ކުޅެފައެވެ.