އެމްޓީސީސީގެ ބަސް އެކްސިޑެންޓްތަކުގެ މައްސަލަ ތަހުގީގުކޮށް ނުނިމޭ: ޕޮލިސް
2 ޖޫން 2019 | އާދީއްތަ 11:38މި އެކްސިޑެންޓްތައް ހިނގީ ޑްރައިވަރަށް ނިދި ޖެހުމުގެ ސަބަބުން
ޔުކްރެއިން އަންހެން މީހާ ގައިގާ ޖެހުނު ބަަސް
ހުޅުމާލޭގައި އެމްޓީސީސީގެ ބަހަކުން ޖެހި ޔޫކްރެއިންގެ 31 އަހަރުގެ އަންހެނަކު މަރުވި މައްސަލަ އާއި ހަމަ އެ ކުންފުނީގެ ބަހެއް އެކްސިޑެންޓްވެ ކާރަކަށް ބޮޑެތި ގެއްލުންތަކެއް ވީ މައްސަލައިގައި އެކަމުގައި އިހުމާލުވި ޑްރައިވަރުންގެ މައްސަލަ އަދިވެސް ތަހްގީގުކޮށް ނުނިމޭ ކަމަށް ފުލުހުން ބުނެފިއެވެ.
"ރާއްޖެ އެމްވީ" އަށް މައުލޫމާތު ދެއްވަމުން ފުލުހުންގެ މީޑީއާ އޮފިޝަލް ވިދާޅުވީ އެ ދެ މައްސަލައިގެ ތަހުގީގު ކުރިއަށްދާ ކަމަށާއި ނިމުނުހާ އަވަހަށް ޕްރޮސެކިއުޓާ ޖެނެރަލް އޮފީހަށް ދައުވާކުރަން ފޮނުވާނެ ކަމަށެވެ.
އެކްސިޑެންޓްވެގައި ޔޫކްރެއިންގެ އަންހެން މީހާ މަރުވެފައި ވަނީ އޭނާ ހިނގާފައިދަނިކޮށް އޭނާގެ ގައިގައި ބަހުން ޖެހި ދަށުވެގެންނެވެ. އަދި އެކްސިޑެންޓްވެގެން، ބޭނުންނުކުރެވޭ ވަރަށް ގެއްލުން ލިބުން ކާރު ހަލާކުވެފައި ވަނީ ދުއްވަމުންދިޔަ ބަހުގައި ޖެހުމާ އެކު ކުރިމަތީގައި ޕާކް ކޮށްފައި އޮތް ޕިކަޕެއްގައި ޖެހުމުގެ ސަބަބުންނެވެ.
މި ދެ ހާދިސާ ވެސް ހިނގުމަށް މެދުވެރިވީ ބަސް ދުއްވި ޑްރައިވަރުންނަށް ނިދި ޖެހުމުން، ކޮންޓްރޯލް ނުކުރެވުމުން ކަމަށް ވެއެވެ.
އެމްޓީސީސީގެ ބަސްތައް ދުއްވަނީ ވަރަށް ބާރުމިނުގައި ކަމަށާއި ނުރައްކާތެރި ގޮތްގޮތަށް ބަސް ދުއްވަމުންދާ ކަމަށް ބުނެ ސޯޝަލް މީޑީއާގައި އާންމުން ކުރަމުންދިޔަ ޝަކުވާތައް އަދިވެސް މަދެއް ނުވެއެވެ. އަދި މިކަމާ ގުޅިގެން އެމްޓީސީސީން އޭރު ބުނެފައި ވަނީ ފަރުވާކުޑަކޮށް ބަސް ދުއްވާ ޑްރައިވަރުންނާ މެދު ފިޔަވަޅު އަޅާނެ ކަމަށެވެ.
އެމްޓީސީސީގެ އިސްނެގުމުގެ މަތިން ފުލުހުންނާއި އެމްޓީސީސީ ގުޅިގެން އެ ކުންފުނީގެ ބަސް ޑްރައިވަރުންނަށް ހޭލުންތެރިކުރުމުގެ ޕްރޮގްރާމެއް ވެސް އޭގެ ފަހުން ވަނީ ހިންގާފައެވެ.
