ކ. މާލެ
|
2 ޖޫން 2019 | އާދީއްތަ 10:28
ޗެމްޕިއަންސް ލީގު ކާމިޔާބު ކުރުމަށް ފަހު ލިވަޕޫލްގެ ކުޅުންތެރިން ތަށި އުފުލާލަނީ
ޗެމްޕިއަންސް ލީގު ކާމިޔާބު ކުރުމަށް ފަހު ލިވަޕޫލްގެ ކުޅުންތެރިން ތަށި އުފުލާލަނީ
ގެޓީ އިމޭޖަސް
ޔޫއެފާ ޗެމްޕިއަންސް ލީގު
ޓޮޓެންހަމް ބަލިކޮށް ލިވަޕޫލް ޗެމްޕިއަންސް ލީގު ކާމިޔާބުކޮށްފި
 
މިއީ ލިވަޕޫލުން ޔޫރަޕުގެ ތަށި އުފުލާލި ހަވަނަ ފަހަރު

2-0 ގެ ނަތީޖާއަކުން ޓޮޓެންހަމް ބަލިކުރުމަށް ފަހު، ލިވަޕޫލުން 19/2018 ސީޒަންގެ ޗެމްޕިއަންސް ލީގު ތަށި އުފުލާލައިފިއެވެ.

ފައިނަލް މެޗު ފެށިގެން ދިޔައީ ހުކުރު ދުވަހު ހިނގި ކާރު އެކްސިޑެންޓެއްގައި މަރުވި ހޯސޭ އެންޓޯނިއޯ ރެޔޭސްގެ ހަނދާނުގައި ބޭއްވި ސުކޫތަކުންނެވެ.

ސްޕެއިންގެ މެޑްރިޑްގައި ކުޅުނު މެޗުގެ ފުރަތަމަ ލަނޑު ލިބުނު ޕެނަލްޓީއަކުން ކާމިޔާބު ކުރީ ލިވަޕޫލްއަށް ކުޅެމުން އަންނަ މިސްރުގެ ހުނަރުވެރި ފޯވާޑް މުހައްމަދު ސަލާހުއެވެ. ލިވަޕޫލަށް ޕެނަލްޓީ ލިބުނީ އޭރިއާ ބޭރުގައި ހުރެފައި ލިވަޕޫލްގެ ސަދިއޯ މާނޭ ހުރަސް ކޮށްލަން ފޮނުވާލި ބޯޅަ، ޓޮޓެންހަމްގެ މޫސާ ސިސޯކޯ އަތުގައި ޖެހުމުންނެވެ.

އޭގެ ފަހުން ޓޮޓެންހަމްގެ ކުޅުން ރަނގަޅުކޮށް ބޯޅަ ގިނައިރު ހިފަހައްޓައިގެން ކުޅުނު ކަމުގައިވީ ނަމަވެސް، ނުރައްކާތެރި ހަމަލާއެއް ލިވަޕޫލްގެ ގޯލަށް އަމާޒުކުރެވޭ ވަރެއް ނުވިއެވެ. މެޗުގެ ފުރަތަމަ ހާފު ނިމިގެން ދިޔައީ ދެ ޓީމަށް ވެސް ގޯލް ޖަހަން މާ ރަނގަޅު ފުރުސަތުތަކެއް ތަނަވަސް ނުކުރެވިއެވެ. އެ ހާފުގައި ޓޮޓެންހަމްގެ ފަރާތުން ކިރިޔާ ވެސް ނުރައްކާ ކޮށްފައިވަނީ ކުރިޔަށް ކުޅޭ ދެކުނު ކޮރެއާގެ ފޯވާޑް ސޮން ހޮން-މިންގެ ފަރާތުންނެވެ.

ރިހި މެޑަލް ހޯދައިގެން ޓޮޓެންހަމްގެ ހެރީ ކޭން ދަނީ

ދެވަނަ ހާފު ފެށިގެން ވެސް ގިނައިރު ބޯޅަ ހިފަހައްޓައިގެން ކުޅުނީ ޓޮޓެންހަމްއިންނެވެ. ބަދަލު ކުޅުންތެރިޔެއްގެ ގޮތުގައި އެރި ލިވަޕޫލްގެ ޖޭމްސް މިލްނަރއަށް ވެސް ލީޑު ފުޅާކުރަން ރަނގަޅު ފުރުސަތެއް ލިބުނު އިރު، އެ ޓީމަށް ދެވަނަ ލަނޑު ޖަހައި ދިނީވެސް ބަދަލު ކުޅުންތެރިޔެއްގެ ގޮތުގައި ކުޅެން އެރި ޑިވޮކް އޮރީގީއެވެ. މެޗުގެ 87 ވަނަ މިނިޓުގައި އޭނާ ޖެހި ލަނޑާއެކު ލިވަޕޫލަށް މެޗު ހަމަޖެހިލައިގެން ނިންމާލުމުގެ ފުރުސަތު ލިބުނެވެ. ދެވަނަ ހާފުގެ ނަތީޖާ އެއޮތް ގޮތަށް އޮވެ ނިމުމުގައި އެންމެ ބޮޑު ރޯލެއް އަދާކުރީ ލިވަޕޫލްއަށް ކުޅޭ ބްރެޒިލްގެ ކީޕަރު އެލިސަން ބެކަރއެވެ. އޭނާވަނީ ޓޮޓެންހަމުން ލިވަޕޫލްގެ ގޯލަށް އަމާޒުކޮށް ފޮނުވާލި ހުރިހާ ހަމަލާއެއް ދިފާއުކޮށްފައެވެ.

މިއީ ލިވަޕޫލުން ޔޫރަޕުގެ ތަށި ކާމިޔާބު ކުރި ހަވަނަ ފަހަރު އަދި ޗެމްޕިއަންސް ލީގުގެ ގޮތުގައި އެ މުބާރާތް ރީބްރޭންޑް ކުރެވުނު ފަހުން ލިވަޕޫލުން އެ މުބާރާތް ކާމިޔާބު ކުރި ދެވަނަ ފަހަރެވެ. އެންމެ ފަހުން ލިވަޕޫލުން ޗެމްޕިއަންސް ލީގު ކާމިޔާބު ކޮށްފައިވަނީ ރަފާ ބެނީޓޭޒްގެ އިރުޝާދުގެ ދަށުން 2005 ވަނަ އަހަރުގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
0%
100%
0%
0%
0%
0%
ކޮމެންޓް