ފެބުރުއަރީ 1 ގެ އަމުރު ތަންފީޒު ނުކުރި މައްސަލަ ތަހުޤީޤް ކުރުމަށް އަންގައިފި
ކޮމިޝަންގެ ރިޕޯޓް ނެރޭތާ 7 ދުވަހުގެ ތެރޭގައި އެމައްސަލަތައް މުއައްސަސާތަކަށް ހުށަހެޅުމަށް އަންގާފައިވޭ
ކުއްލި ނުރައްކަލުގެ ހާލަތު އިއުލާންކުރުމަށްފަހު ފުލުހުން މަގުމަތީގައި
ފެބުރުއަރީ 1 ގެ އަމުރު ތަންފީޒު ނުކުރި މައްސަލަ ތަހުޤީޤްކޮށް ފިޔަވަޅު އެޅުމަށް ޖަލުތަކުގެ ހާލަތު ދިރާސާކުރި ކޮމިޝަން ފޯރ ޕްރިޒަންސް އޮޑިޓް އިން، ކޮމިޝަނުން ހޯމް މިނިސްޓްރީއަށް ލަފާދީފި އެވެ.
ޖަލުތަކުގެ ހާލަތު ދިރާސާކުރުމަށް ފަހު އެކުލަވާލި ރިޕޯޓުގައި ކޮމިޝަނުން ގިނަ ކަންތައްތަކެއް ފާހަގަކޮށްފައިވެއެވެ. އެގޮތުން 1 ފެބުރުއަރީ 2018 ވަނަ ދުވަހުު ސުޕްރީމް ކޯޓުން ނެރުނު އަމުރާއި ގުޅެގޮތުން އެ ރިޕޯޓުގައި ބުނެފައިވަނީ ސުޕްރީމް ކޯޓުން ނެރުނު އަމުރުގައި ބަންދުގައި ތިބި 9 މީހަކު މިނިވަންކުރަން އަންގާފައިވީ ނަމަވެސް، އަދި ސުޕްރީމް ކޯޓުން ނެރޭ ޢަމުރުތަކަކީ އެ ތަންފީޛްކުރުން ލާޒިމް އަމުރުތަކަކަށްވީއިރު، އަދި މިފަދަ ޢަމުރުތައް ތަންފީޛް ނުކުރުމަކީ ކުށަކަށް ވާއިރު، ދަޢުލަތުގެ ކަމާގުޅުން ހުރި މުއައްސަސާތަކުން މިކަމަށް އިއުތިރާޒް ކޮށްފައިވާ ކަމަށެވެ. އަދި އެގޮތަށް ކަންކުރުމުން، ޢަމުރު ނެރުމުގެ ފަހުން ހިނގައިދިޔަ ކޮންމެ ދުވަހެއްގައި އަމުރުގައި ފާހަގަކޮށްފައިވާ މީހުން ބައިތިއްބާފައިވަނީ ޣައިރުޤާނޫނީ ބަންދެއްގައި ކަމަށް ކޮމިޝަންގެ ރިޕޯޓުގައި ބުނެފައިވެއެވެ.
އެކަންތައްތައް ފާހަގަކޮށް ކޮމިޝަންގެ ރިޕޯޓްގައި އިތުރަށް ބުނެފައިވަނީ އަމުރު ތަންފީޛް ކުރުމަށް މޯލްޑިވްސް ޕޮލިސް ސަރވިސްއާއި، މޯލްޑިވްސް ކަރެކްޝަނަލް ސަރވިސް އިން ކަނޑައެޅިގެން ހުރަސްއަޅާފައިވާ ކަމަށެވެ. އަދި އެކަން މިގޮތަށް ހިނގައިދިޔައިރު، ޖަލުތަކުގައި ބަންދުކުރެވޭ މީހުންގެ ޙައްޤުތައް ކަށަވަރުކުރުމުގެ ޒިންމާ މަތިކުރެވިފައިވާ، ދަޢުލަތުގެ ބަންޑާރަ ނައިބާއި، އިންސްޕެކްޓަރ އޮފް ކަރެކްޝަނަލް ސަރވިސްއާއި، ހިއުމަން ރައިޓްސް ކޮމިޝަނާއި، އަދި ނެޝަނަލް އިންޓެގްރިޓީ ކޮމިޝަނުން ވެސް އެފަރާތްތަކުގެ ޣައިރު ޤާނޫނީ ބަންދު ބާތިލްކޮށް އެފަރާތްތަކަށް ސުޕްރީމް ކޯޓުގެ ޢަމުރުން ލިބިދިނުމަށް ކަނޑައެޅުނު އެއްވެސް ޙައްޤެއް ކަށަވަރު ކޮށްދިނުމަށް އެއްވެސް މަސައްކަތެއް ކޮށްދީފައި ނުވާ ކަމަށް އެމީހުންގެ ފަރާތުން ކޮމިޝަނަށް މަޢުލޫމާތު ދީފައިވާ ކަމަށެވެ.
އޭގެއިތުރުން ކުއްލި ނުރައްކަލުގެ ޙާލަތުގައި ފުލުހުން ހައްޔަރުކުރި މީހުންނާއި މޯލްޑިވްސް ނޭޝަނަލް ޑިފެންސް ފޯސްއިން ފޮރުވާފައި ބޭތިއްބި ފުލުހުންގެ އާއިލާތަކުން އަނިޔާގެ މައްސަލަތައް އެޗްއާރުސީއެމް އަށް ހުށަހެޅުމުން ވެސް އެ މައްސަލަތަކަށް ފަރުވާ ކުޑަކޮށް، މަދު އާއިލާއަކަށް ނޫނީ އެހީތެރިކަން ނުދޭ ކަމަށް އަނިޔާ ލިބުނު މީހުންނާއި އެމީހުންގެ އާއިލާތަކުން ކޮމިޝަނަށް މައުލޫމާތު ދީފައިވާ ކަމަށް ވެސް އެ ރިޕޯޓުގައި ބުނެފައިވެއެވެ.
ކޮމިޝަނުން ހުށަހެޅުމެއްގެ ގޮތުގައި ހޯމް މިނިސްޓަރަށް ހުށަހަޅާފައިވަނީ ކޮމިޝަންގެ ރިޕޯޓް ނެރޭތާ 7 ދުވަހުގެ ތެރޭގައި އެމައްސަލަތައް ދައުލަތުގެކަމާ ގުޅުންހުރި ތަހުގީގީ މުއައްސަސާތައް މެދުވެރިކޮށް ތަހުގީގް ކުރުމަށެވެ. ނަމަވެސް އެ މައްސަލަ ހުށަހަޅަން ޖެހޭ އިދާރާތަކެއް ކޮމިޝަންގެ ރިޕޯޓްގައި ސާފުކޮށް ބުނެފައެއް ނުވެ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ފެބުރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒްކުރުމަށް ދެކޮޅު ހެދުމަށްފަހު، ކުއްލި ނުރައްކަލުގެ ހާލަތު އިއުލާންކޮށްފައިވަނީ އެ މަހުގެ 5 ވަނަ ދުވަހު އެވެ. އަދި އެޔަށްފަހު ގިނަ ސިޔާސީ ފަރާތްތަކެއް ހައްޔަރުކޮށް އެތައް މަސް ދުވަހަކު ބަންދުގައި ގެންގުޅެފައިވެއެވެ.
