މައްސަލަ ތަކުގައި ރައްޔިތުން އަމިއްލައަށް ގޮތް ނުނިންމުމަށް ފުލުހުން އިލްތިމާސްކޮށްފި
26 މެއި 2019 | އާދީއްތަ 10:07އެކަމުގެ ސަބަބުން ފުލުހުންގެ ތަހުޤީޤަށް ހުރަސްއެޅޭ
ާމާލޭ މަގެއް މަތީގައި ފުލުހުންތަކެެއް ހަރަކާތްތެރިވަނީ
ފުލުހުންނަށް ހުށައެޅޭ ތަފާތު މައްސަލަތަކުގައި ރައްޔިތުން އަމިއްލައަށް ގޮތް ނުނިންމުމަށް ފުލުހުން އެދިއްޖެއެވެ.
ދާދި ފަހުން ކ. ދިއްފުށީގައި ވައްކަން ކުރި މީހަކަށް ރައްޔިތުން ނުކުމެ އަދަބުދީފައިވާއިރު، އެކަމާ ގުޅޭ ގޮތުން "ރާއްޖެއެމްވީ" އަށް މައުލޫމާތު ދެއްވަމުން ފުލުހުންގެ ސްޕޯކްސްޕާރސަން އިޒްމިއާ ޒާހިރް ވިދާޅުވީ، މިހާރަަކަށް އައިސް ފުލުހުންނަށް ހުށައެޅޭ މައްސަލަތަކާ ގުޅިގެން ފުލުހުންގެ ތަހުޤީޤަށް ނޭނގި އާންމު ރައްޔިތުން އެފަދަ މައްސަލަތަކުގައި ގޮތް ނިންމަން މަސައްކަތް ކުރާކަން ފާހަގަކުރެވިފައިވާ ކަމަށާއި، އެކަމުގެ ސަބަބުން ފުލުހުންގެ ތަހުޤީޤަށް ހުރަސްއެޅޭ ކަމަށެވެ.
އިޒްމިޔާ އެހެން ވިދާޅުވެފައިވާއިރު، ދިއްފުށީގައި ވައްކަން ކުރާ މައްސަލަ ބޮޑުވެ އެރަށުގެ ރައްޔިތުންގެ ތެރެއިން ބަޔަކު ވަގުން ހޯދަން ނިކުމެ، ބުދަ ދުވަހުގެ ރެއާއި ބުރާސްފަތި ދުވަހުގެ ރޭ ވަނީ ހަމަނުޖެހުން ހިންގާފައެވެ. އަދި މި ހަމަނުޖެހުމުގެ ތެރޭގައި ބުދަ ދުވަހުގެ ރޭ ދެ މީހަކަށް ވަނީ ވަރަށް ބޮޑަށް އަނިޔާ ވެސް ވެފައެވެ.
އޭގެ އިތުރުން، ހުޅުމާލޭގައި ކުޑަ ދެ ކުއްޖަކަށް ޖިންސީ ގޯނާ ކުރި ކަމުގެ މައްސަލާގައި ފިރިހެނަކު ހައްޔަރު ކޮށްފައިވާއިރު، އެ މީހާ ބޮކްސާގައި ހުޅުމާލޭގައި ގަން ހިންގުވާ މަންޒަރު ދައްކުވައިދޭ ވީޑިއޯއެއް ސޯޝަލް މީޑިއާގައި ވަނީ އާއްމުވެފައެވެ.
