ކޮރެލް ބުލެވާޑް ހުޅުމާލެ އަށް ބަދަލު ނުކުރެވިގެން އުޅެނީ ބިމެއް ހަމަނުޖެހިގެން: ހައުސިން މިނިސްޓްރީ
ތިން ހަފްތާއެއް ތެރޭގައި ބިމެއް ހަމަޖެހޭނެ ކަމަށް ލަފާކުރެވޭ ކަމަށް ވިދާޅުވި
ކޮރެލް ބުލެވާޑް
ސިންގަޕޫރުގެ ޗަންހުއާ ކުންފުންޏާ ހަވާލުކޮށްގެން ރަސްފަންނު ސަރަހައްދުގައި އެޅުމަށް ނިންމި 100 މީޓަރު އުސް ކޮރެލް ބުލެވާޑް ހުޅުމާލެއަށް ބަދަލު ނުކުރެވިގެން އުޅެނީ ބިމެއް ހަމަނުޖެހިގެން ކަމަށް ހައުސިން މިނިސްޓްރީން ބުނެފިއެވެ.
ރަސްފަންނު ސަރަހައްދުގައި 350 ފްލެޓްއާ އެކު ހަދާ 25 ބުރީގެ ހަތަރު ޓަވަރު އިމާރާތް ކުރުމުގެ މަސައްކަތް ކުރީ ސަރުކާރުގެ ހައުސިން މިނިސްޓްރީން ޗަންހުއާ ކުންފުންޏާ ހަވާލުކޮށްފައި ވަނީ 2017 ވަނަ އަހަރުއެވެ.
ހައުސިން މިނިސްޓްރީން ވަނީ ކޮރެލް ބުލެވާޑް ހުޅުމާލެއަށް ބަދަލުކުރުމާ ބެހޭ ގޮތުން ޗަންހުވާ ކުންފުންޏާއި އެކު މަޝްވަރާތަކެއް ކޮށްފައެވެ. ހައުސިން މިނިސްޓްރީގެ ހުށައެޅުމަށް އިޖާބަދީ އެތަން ބަދަލުކުރުމަށް ޗަންހުއާ ކުންފުނިން އެއްބަސްވިއެވެ.
ހައުސިން މިނިސްޓްރީގެ ޑެޕިއުޓީ މިނިސްޓަރު ޒުހުރުﷲ ސިޔާދް ވިދާޅުވީ، ކޮރެލް ބުލެވާޑް ހުޅުމާލެ އަށް ބަދަލުކުރުމުގެ މަސައްކަތް ކުރިޔަށް ދާ ކަމަށެވެ. އެކަމަކު ހުޅުމާލެއިން ބިމެއް ލިބުމުގެ ދަތިކަމުގެ ސަބަބުން އަދި ބަދަލު ނުކުރެވޭ ކަމަށް ޒުހުރުﷲ ވިދާޅުވިއެވެ.
ޒުހުރުﷲ ވިދާޅުވީ، އެޗްޑީސީ އާއި ޗަންހުއާ ކޮންސްޓްރަކްޝަންއާ ދެމެދު މިހާރު ވެސް އެކަމާ ބެހޭ ގޮތުން މަޝްވަރާތަކެއް ކުރެވެމުންދާ ކަމަށެވެ. އަދި ވިދާޅުވީ، ކުރިޔަށް އޮތް ތިން ވަރަކަށް ހަފްތާ ތެރޭގައި ބިމެއް ލިބޭނެ ކަމަށް ލަފާކުރެވޭ ކަމަށެވެ.
ކޮރެލް ބުލެވާޑް ރެޒިޑެންޝަލް ޓަވަރުތަކުގެ 15 ޕަސެންޓްގައި ގުދުރަތީ ގަސް ހިމެނޭ ގޮތަށް ތަރައްގީކުރާ އިރު އެއީ ޒަމާނީ ފެންވަރުގެ ސްވިމިން ޕޫލްތަކާއި ކުޑަކުދިން ކުޅެން ހާއްސަ ސަރަހައްދުތަކުގެ އިތުރުން ބާބަކިއު އޭރިޔާއެއް ވެސް ހިމެނޭ ގޮތަށް ތަރައްގީކުރި ތަނެކެވެ. މާލޭގައި ރަސްފަންނު ކައިރިން ޓަވަރުތައް އެޅުމަށް ނަގާފައިވަނީ ހަތްދިހަ ހާސް އަކަފޫޓުގެ ސަރަހައްދެކެވެ. މިދިޔަ އަހަރުގެ ތެރޭގައި އެ ފްލެޓްތަކުގެ މޮޑެލްއެއް ދައްކާލާފައިވާ އިރު އެ ކުންފުނީގެ ބޭނުމަށް ގިނަ ދުވަސްތަކެއް ވަންދެން އެ ސަރަހައްދު ބަންދުކުރިއެވެ. ނަމަވެސް އެ ސަރަހައްދުގައި މާބޮޑު މަސައްކަތްތަކެއް ކޮށްފައެއް ނުވެއެވެ.
