ށ. ފީވަކުގެ ކަރަންޓް މައްސަލަ ހައްލުކުރުމަށް ފެނަކައިން ކުރަމުންދާ މަސައްކަތަށް ބަޔަކު ހުރަސް އަޅަމުންދާ ކަމަށް ފެނަކަ ކޯޕަރޭޝަން ލިމިޓެޑުން ބުނެފިއެވެ.

ށ. ފީވަކުގެ ކަރަންޓް ހާލަތާ ގުޅޭ ގޮތުން ފެނަކައިން ނެރެފައިވާ ނޫސް ބަޔާނެއްގައި ބުނެފައި ވަނީ 16 މެއި 2019 ވަނަ ދުވަހު ފީވަކު ބްރާންޗްގެ ޕެނަލްގެ މަސައްކަތް ކުރަމުން ދަނިކޮށް އެ ރަށުގެ ރައްޔިތުންގެ ތެރެއިން ބަޔަކު އިންޖީނުގެ ތެރެއަށް ވަދެ އަޑުގަދަކޮށް މަސައްކަތް ކުރުމުގެ ސަބަބުން މަސައްކަތުގެ މާހައުލު ގެއްލި ކަރަންޓް ހިދްމަތް ފޯރުކޮށް ދިނުމަށް ޓެކްނިކަލް މައްސަލަތަކެއް ދިމާވެ، ކަރަންޓް ޚިދްމަތް ފޯރުކޮށް ދިނުމަށް ގިނަ ވަގުތުތަކެއް ހޭދަވި ކަމަށެވެ.

ފެނަކައިގެ ބަޔާނުގައި ބުނެފައި ވަނީ ފީވަކަށް ދިމާވެފައިވާ ކަރަންޓްގެ މައްސަލައަށް ދާއިމީ ހައްލެއް ހޯދުމަށް އަލުން ޓެކްނިކަލް ޓީމެއް ފީވަކުގައި މަސައްކަތް ކުރަމުން ދަނިކޮށް، 22 މެއި 2019 ގައި ރައްޔިތުންގެ ތެރެއިން ބަޔަކު އިންޖީން ރޫމަށާއި ކޮންޓްރޯލް ރޫމަށް ވަދެ މުވައްޒިފުންނަށް ބިރުދައްކައި މުޅި ރަށުން ކަރަންޓްގެ ހިދްމަތް ކަނޑާލި ކަމަށެވެ. އަދި އެ ދުވަހު ކަރަންޓް ހިދުމަތް ފޯރުކޮށްދެވުނީ ވެސް ގިނަ އިރުތަކެއް ފަހުން، ކައުންސިލް އަދި ރައްޔިތުންގެ ތެރެއިން ބަޔަކާ ވާހަކަ ދެކެވިގެން ކަމަށް ފެނަކައިން ވަނީ ބުނެފައެވެ.

ފެނަކައިން ބުނީ 24 މެއި 2019 ވަނަ ދުވަހުގެ ރޭ އިންޖީނަކަށް ދިމާވި މައްސަލަޔަކާ ގުޅިގެން ކަރަންޓް ކެނޑުނުތަނާހެން ރައްޔިތުންގެ ތެރެއިން ބަޔަކު އިންޖީނުގެ ތެރެއަށް ވަދެ އަޑު ގަދަކޮށް، މަސައްކަތުގެ މާހައުލް ގެއްލުވާލި ކަމަށެވެ. ކަރަންޓްގެ ޚިދްމަތް އަނބުރާ ދެވުނީ ކަރަންޓްގެ ޚިދްމަތް ދިނުމާ ދެކޮޅު ހަދަމުން ދިޔަ މީހުންނާ ދެކޮޅަށް، ރައްޔިތުންގެ ތެރެއިން ބަޔަކު ނިކުމެ ކަރަންޓް އިޔާދަކުރަން އެދިގެން ކަމަށް ބަޔާނުގައި ވެއެވެ. އެ ގޮތަށް ކަންތައްތައް ދިމާވުމުގެ ސަބަބުން ކަރަންޓް ޚިދުމަތް މެދުކެނޑި އަލުން ޚިދުމަތް ފޯރުކޮށްދިނުމަށް ގިނަ ވަގުތުތަކެއް ހޭދަވި ކަމަށް ފެނަކަ އިން ވަނީ ބުނެފައެވެ.

ފެނަކަ އިން ބުނީ ފީވަކަށް ކަރަންޓް ދެވޭ ވަރަށް އެ ރަށުގައި ޖެނެރޭޝަން ކެޕޭސިޓީ ގާއިމްކުރެވިފައިވާ ކަމަށާއި، ދިމާވާ ބައެއް ޓެކްނިކަލް މައްސަލަތައް ހައްލުކުރުމަށް ކުރަންޖެހޭ ކަންތައްތައް ކުންފުނިން ކުރަމުންދާ ކަމަށެވެ. ފީވަކުގެ ކަރަންޓުގެ ހާލަތު އިތުރަށް ރަނގަޅުކޮށް ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމައްޓަކައި ކުރިން ވެސް ރޭވިފައިވާ އެންމެހާ ކަންތައްތައް ކުންފުނިން ކުރަމުންދާ ކަމަށެވެ. ފެނަކައިން ބުނީ ފީވަކުގެ ކަރަންޓް ޚިދްމަތް ފޯރުކޮށްދެމުންދަނީ 180 ކިލޯވޯޓް، 128 ކިލޯވޯޓް އަދި 128 ކިލޯވޯޓް ތިން ޖެނެރޭޓަރު ބޭނުންކޮށްގެން ކަމަށެވެ. އެ ރަށުގެ އެންމެ މަތީ ލޯޑަކީ 200 ކިލޯ ވޯޓް ކަމަށް ވެސް ފެނަކައިގެ ބަޔާނުގައި ވެއެވެ.