ޕެރިސް ސެއިންޓް ޖާމަން (ޕީއެސްޖީ) އާއެކު ހަދާފައިވާ އެއްބަސްވުން ތޯމަސް ޓުޗެލް އާކޮށްފިއެވެ.

ޕީއެސްޖީގެ ކޯޗުކަމުން ޓުޗެލް ވަކިކުރާނެ ކަމަށް ރިޕޯޓްތައް ބުނަމުން އައި ދަނޑިވަޅެއްގައި އޭނާ ކްލަބާއެކު އެއްބަސްވުން އާކޮށްފައިވާއިރު، އާ އެއްބަސްވުމުގެ ދަށުން އޭނާ ކްލަބުގައި 2021 ގެ ނިޔަލަށް މަޑުކުރާނެއެވެ.

އެއްބަސްވުން އާކުރުމަށް ފަހު ޓުޗެލް ބުނީ، އެއްބަސްވުން އާކުރެވުމުން އެކަމާ ވަރަށް އުފާވެފައި ހުރި ކަމަށާއި، ކްލަބުން އޭނާއާމެދު ކުރާ އިތުބާރަށް ޝުކުރު އަދާކުރާ ކަމަށެވެ.

ކުރިޔަށް އޮތް ސީޒަނަށް އަމާޒުކޮށް ޕީއެސްޖީން ވަނީ އެ ކްލަބަށް ކުޅުންތެރިން ގެނައުމުގެ މަސައްކަތް ފަށާފައެވެ. އަދި އެ ކްލަބުން އަންނަނީ ޓުޗެލްގެ އެދުމުގެ މަތިން ބައެއް ކުޅުންތެރިން ހޯދުމަށް ވެސް މަސައްކަތް ފަށާފައެވެ.

ޓުޗެލްގެ އިރުޝާދުގެ ދަށުން މި ސީޒަނުގައި ޕީއެސްޖީން އެންމެ އުންމީދުކުރި ޔުއެފާ ޗެމްޕިއަންސް ލީގުގައި ކާމިޔާބެއް ނުހޯދުނަސް، ކުރިޔަށް އޮތް ސީޒަނުގައި ޗެމްޕިއަންސް ލީގު ކާމިޔާބު ކުރުމަށް އެ ކްލަބުން ވަނީ އަމާޒު ހިފާފައެވެ.

މީގެކުރިން ބްރޫޝިއާ ޑޯޓްމަންޑަށް ވެސް ކޯޗުކޮށްދީފައިވާ ޓުޗެލްގެ އިރުޝާދުގެ ދަށުން ޕީއެސްޖީ ވަނީ ކުޅުނު 55 މެޗުގެ ތެރެއިން 40 މެޗުން މޮޅުވެފައެވެ. ބާކީ 8 މެޗުން އެޓީމު ބަލިވިއިރު، ހަތް މެޗު ނިމުނީ އެއްވަރުވެގެންނެވެ.

ޖަރުމަނަށް އުފަން ޓުޗެލްގެ އިރުޝާދުގެ ދަށުން ޑޯޓްމަންޑުން ޖަރުމަން ކަޕް ކާމިޔާބު ކޮށްފައިވާއިރު، ޕީއެސްޖީން ވަނީ އޭނާގެ އިރުޝާދުގެ ދަށުން ފްރެންޗް ލީގު އަދި ފްރެންޗް ސުޕަކަޕް ކާމިޔާބު ކޮށްފައެވެ.