އާޒިމާގެ މައްސަލަ ކުރިއަށް ނުދަނީ ޗިޓު ހަވާލު ނުކުރެވިގެން: ޑީޖޭއޭ
7 މެއި 2019 | އަންގާރަ 09:26އާޒިމާގެ މައްޗަށް ކުރަނީ ޔާމީން އަށް މަނީ ލޯންޑަރކުރުމަށް އެހީތެރިވެދިނުމާއި ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ
ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރު
ކުރީގެ ރައީސް އަބްދުﷲ ޔާމީނުގެ ވެރިކަމުގައި ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީލޯންޑްރިންގެ މައްސަލަ ކުރިއަށް ނުގެންގޮސްގެން އުޅެނީ އޭނާއާއި ޗިޓު ހަވާލު ނުކުރެވިގެން ކަމަށް ކޯޓުތަކާއި ބެހޭ އިދާރާ ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ބުނެފިއެވެ.
ޑީޖޭއޭގެ ތަރުޖަމާން ފައިސަލް އާދަމް ރާއްޖެއެމްވީއަށް ވިދާޅުވީ އާޒިމާގެ މައްސަލަ ވެސް ކްރިމިނަލް ކޯޓުން ކުރިއަށް ގެންދާ ކަމަށެވެ. އެހެން ނަމަވެސް އެމައްސަލައިގައި ކޯޓަށް ހާޒިރުވުމަށް އަންގާ ޗިޓު އޭނާއާއި ހަވާލު ކުރަން އޮތް ދުވަހު ރާއްޖޭގައި ނޫޅުއްވާކަން ކަމާބެހޭ އިދާރާތްތަކާއި ގުޅިގެން ބެލި ބެލުމުން އެނގިފައިވާ ކަމަށެވެ. އަދި އާޒިމާ އެނބުރި ރާއްޖެ ވަޑައިގަތް ކަމެއް އެނގިފައި ނުވާކަމަށް އޭނާ ވިދާޅުވިއެވެ.
"ޗިޓު ހަވާލު ނުކުރެވިގެން އިމިގްރޭޝަން ތްރޫކޮށް ބެލި ބެލުމުން އެނގުނީ ރާއްޖޭގައި ނޫޅުއްވާކަން" ފައިސަލް ވިދާޅުވިއެވެ.
އާޒިމާގެ މައްޗަށް ދައުލަތުން ކޮށްފައި ވަނީ މަނީ ލޯންޑަރ ކުރުމަށް އެހީތެރިވެދިނުމާއި ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއެވެ. އެ މައްސަލައިގައި ދައުވާއާ ގުޅޭ ލިޔެކިޔުންތަކާއި މައްސަލައަށް ޖަވާބުދާރީ ވުމަށް ތައްޔާރުވާން ކްރިމިނަލް ކޯޓުން މިދިޔަ ފެބްރުއަރީ މަހުގެ 21 ވަނަ ދުވަހު އޭނާއާއި ހަވާލު ކުރުމަށް މަސައްކަތް ކުރިއެވެ. އެހެން ނަމަވެސް އެ ލިޔުންތަކާއި ޗިޓުތައް ހަވާލު ނުކުރެވުނީ ރާއްޖެއިން ބޭރުގައި އުޅުއްވާތީއެވެ.
އާޒިމާ ރާއްޖެއިން ބޭރަށް ފުރާވަޑައިގެންފައިވަނީ ޕްރޮސެކިއުޓަރ ޖެނެރަލްގެ އޮފީހުން ކްރިމިނަލްކޯޓަށް ދައުވާ ކުރުމަށް ފޮނުވި ތަނާހެންނެވެ.
ރައީސް ޔާމީނަށް މަނީ ލޯންޑަރ ކުރުމަށް އެހީތެރިވެދިނުމާއި ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާގެ ތަހުގީގަށް އާޒިމާ ފުލުސް އޮފީހަށް ވެސް ހާޒިރުކޮށްފައި ވެއެވެ.
ރައީސް ޔާމިންގެ މައްޗަށް ވެސް ދައުވާ ކޮށްދޭން ފުލުހުން އެދުނީ އާޒިމާގެ މައްޗަށް ވެސް ދައުވާކޮށްދޭން އެދުނު ދުވަހުއެވެ. ޔާމިންގެ މައްޗަށް ދައުލަތުން އުފުލި ދައުވާއާ ގުޅިގެން އެމަނިކުފާނުގެ މައްޗަށް ޝަރީއަތް ދަނީ ހިންގަމުންނެވެ. އެދައުވާގެ ޝަރީއަތުގެ ދެ އަޑުއެހުމެއް ކްރިމިނަލް ކޯޓުގައި މިހާތަނަށް ވަނީ ބާއްވާފައެވެ.
