އެއްފަހަރާ 63000 މީހުންނަށް ނަމާދުކުރެވޭ މިސްކިތެއް ތުރުކީގައި ހުޅުވައިފި

ތުރުކީގައި މިހާތަނަށް ހެދުނު އެންމެ ބޮޑު މިސްކިތް ކަމުގައިވާ ކަމްލިކާ މޮސްކް ކޮމްޕްލެކްސް، އެ ގައުމުގެ ރައީސް ރަޖަބް ތައްޔިބް އުރުދުޣާން ހުޅުއްވައިދެއްވައިފިއެވެ.

މިއީ އެއްފަހަރާ 63000 މީހުންނަށް ނަމާދުކުރެވޭހާ ޖާގަ ތަނަވަސް މިސްކިތެކެވެ. ކުރިން ތުރުކީގައި ހުންނަ އެންމެ ގިނަ މީހުންނަށް އެއްފަހަރާ ނަމާދުކުރެވޭ، އަދާނާ ޕްރޮވިންސްގައި ހުންނަ ސަބަންކީ ސެންޓްރަލް މޮސްކްގައި ނަމާދުކުރެވެނީ 28،500 މީހުންނަށެވެ. އޮޓޮމަން އާއި ސެލްޖުކް އާކިޓެކްޗަރަލް ސްޓައިލްތަކަށް ފަރުމާކޮށްފައިވާ މިސްކިތަކީ އިސްތަންބޫލުގެ އޭޝިއާ ފަޅީގައި ހުންނަ މިސްކިތެކެވެ. މިސްކިތް އިމާރާތްކުރުމުގެ މަސައްކަތް ފަށާފައިވަނީ 2013 ވަނަ އަހަރުގައެވެ.

މިސްކިތް ހުޅުވައިދެއްވުމަށް ފަހު ދެއްކެވި ވާހަކަފުޅުގައި، އުރުދުގާން ވަނީ އަޅުކަން ކުރާ ތަންތަނަށް ދެވޭ ހަމަލާތައް ވަރަށް ހަރުކަށި އިބާރާތުން ކުށްވެރި ކުރައްވާފައެވެ. އެގޮތުން އުރުދުގާން ވިދާލުވީ ދީނުގައި ނަމުގައި އަޅުކަން ކުރާ ތަންތަނަށް ދެވޭ ހަމަލާތައް ދޭ މީހުންނަކީ އެއްޒާތެއްގެ "އަނދިރި" ވިސްނުމެއް ގެންގުޅޭ މީހުން ކަމަށެވެ. އަދި އެ މީހުން އެ ކުރަނީ ޖިހާދެއް ނޫން ކަމަށާއި، އެއީ ޓެރަރިސްޓުން ކަމަށް ވިދާޅުވިއެވެ.

މިސްކިތުގައި ހަ މުންނާރު ހުންނައިރު މިއިން ކޮންމެ މުންނާރަކުން ރަމްޒުކޮށްދެނީ މުސްލިމުންގެ އަގީދާގައި ގަބޫލުކުރަން ޖެހޭ ކަންކަން ކަމުގައިވާ ހެއްދެވި ފަރާތެއްވާ ކަމާއި، ރަސޫލުން ފޮނުއްވިކަން ގަބޫލުކުރުމާއި، މަލާއިކަތުން ވާކަން ގަބޫލުކުރުމާއި، ފޮތް ބާއްވާލެއްވިކަން ގަބޫލުކުރުމާއި އަދި ގިޔާމަތް ދުވަހާއި އިލާހީ ގާނޫނެއް ވާކަން ގަބޫލުކުރުމެވެ.

މިސްކިތުގެ ތެރޭގައި ތުރުކީގެ އިސްލާމީ ފަންނުވެރި މަސައްކަތްތައް ދައްކުވައިދޭ ދާރުލް އާސާރަކާއި ކުތުބުހާނާއަކާއި ގެލަރީއެއްގެ އިތުރުން ކޮންފަރެންސް ހޯލް އެންޑް ސެވެރަލް ވޯކްޝޮޕެކެވެ. މިސްކިތް ހުޅުވުމުގެ ރަސްމިއްޔާތައް ބޭރުގެ އިއްޒައްތެރިން ވަޑައިގެންނެވި އިރު އޭގެ ތެރޭގައި އަލްބޭނިއާގެ ރައީސް އިލިރް މޭޓާއާ ގިނީގެ ރައީސް އަލްފާ ކޮންޑޭއާ ސެނެގާލްގެ ރައީސް މެކީ ސޯލްއާ ފަލަސްތީނުގެ ބޮޑުވަޒީރު މުހައްމަދު ޝްތައިއްޔޭ ހިމެނެއެވެ.