ހަމަލާ އަށް ފަންޑް ކުރި މީހާ ހައްޔަރު ކޮށްފި

އޭޕްރީލް މަހުގެ 21 ވަނަ ދުވަހު އަވަށްޓެރި ސްރީލަންކާ އަށް ދިން ބޮންގޮއްވާލުމުގެ ހަމަލާ ހިންގި ނެޝަނަލް ތައުހީދު ޖަމާއަތަށް (އެންޓީޖޭ) ފަންޑު ކޮށްދިން ކަމުގެ ތުހުމަތުގައި ފުލުހުން މީހަކު ހައްޔަރު ކޮށްފިއެވެ.

ލަންކާގެ ފުލުހުން ހިންގި އޮޕަރޭޝަނެއް ގައި ހައްޔަރު ކޮށްފައިވަނީ އަބްދުލް ސައްތާރު މުހައްމަދު ނަމަކަށް ކިޔާ މީހެކެވެ. އޭނާ އަކީ އެންޓީޖޭ ފައިނޭންޝަލް މެނޭޖަރު ކަމަށް ފުލުހުން ތުހުމަތު ކުރެއެވެ.

ސިފައިންގެ ފައުޖުތަކުން ވަނީ އޭނާގެ އަތުން 200 ބޭންކް ސްލިޕާއި 10 މިލިއަން ރުޕީސްގެ ކޭޝް ރިސިޕްޓްގެ އިތުރުން 25 މިލިއަންގެ ކޭޝް ރިސިޕްޓް ހޯދާފައެވެ.

ބޭންކް ސްލިޕްގެ އިތުރުން ލެޕްޓޮޕަކާ، އައިއެސް ޖަމާއަތުގެ ވީޑިއޯ ތަކަކާއި، ސިފައިންގެ ޔުނީފޯމު އަޅައިގެން ތިބި ފޮޓޯ ތަކަކާއި، ދެ އައިޑީ ކާޑުގެ އިތުރުން ތެލަދެނިޔާގައި ހިނގާ ދިޔަ ހަމަލާތަކުގެ ވީޑިއޯތަކެއް ހޯދިފައިވާ ކަމަށް ފުލުހުން ބުންޏެވެ.

އަދި އޭގެ އިތުރުން ހަމަލާއަށް ފަހު ސަމާލުވެގެން އުޅުމަށް އަންހެނަކު އިލްތިމާސް ކުރާ އޯޑިއޯއެއް ވެސް ފުލުހުން ވަނީ ހޯދާފައެވެ.

ފަންޑު ކުރި ކަމަށް ޝައްކު ކުރެވޭ ސައްތާރު ހައްޔަރު ކޮށްފައި ވަނީ ބޫޓް ވިއްކާ ފިހާރައެއްގެ ވެރިމީހަކުގެ ގެކައިރި ކުއްޔަށް ނަގައިގެން އުޅުނު ތަނަކުންނެވެ. އެ ގެއަކީ ހަށިގޮއްވާލައިގެން ހަމަލާދިން ދެ މީހަކު އެކަން ކުރަން ކުރުމުގެ ކުރިން ބޭނުން ކުރި ގެކަމަށް ފުލުހުން މައުލޫމާތުދެއެވެ. ހައްޔަރު ކުރި މީހާގެ ބަންދާ މެދު ގޮތެއް ނިންމުމަށް އިއްޔެ އޭނާ ވަނީ ގަމްޕޮލާގެ މެރޖިސްޓްރޭޓް ކޯޓަށް ހާޒިރު ކޮށްފައެވެ.

ފަންޑު ކުރި ކަމަށް ތުހުމަތު ކުރި މީހަކު ހައްޔަރު ކޮށްފައިވާއިރު، އިސްލާމީ ހަރުކަށި ބަޔަކު ވެރިރަށް ކޮޅުނބުގެ ބްރިޖްގައި ހަމަލާތަކެއް ދޭން އުޅޭ ކަމުގެ އިންޓެލް މައުލޫމާތު ލިބިފައިވާ ކަމަށް ހުކުރު ދުވަހު ފުލުހުން ވަނީ ބުނެފައެވެ. ފުލުހުން ވަނީ މިހާރު އެ ސަރަހައްދުގެ ސަލާމަތީ ފިޔަވަޅުތައް ވަރުގަދަ ކޮށްފައެވެ.