ރައްޔިތުންގެ މަޖިލީހުގެ އިންތިޚާބުގައި ބައިވެރިވި ކެންޑިޑޭޓުންގެ ތެރެއިން 39 ކެންޑިޑޭޓަކު މާލީ ބަޔާން ހުށައަޅާފައި ނުވާތީ އެކެންޑިޑޭޓުންގެ މައްސަލަ މި ހަފުތާގެ ތެރޭގައި ޕްރޮސެކިއުޓާ ޖެނެރަލް އޮފީ އަށް ފޮނުވާނެ ކަމަށް އިލެކްޝަންސް ކަމިޝަން (އީސީ) އިން ބުނެފިއެވެ. 

އީސީގެ ނައިބު ރައީސް އަމްޖަދު މުސްތަފާ ވިދާޅުވީ އީސީ އިން ދަނީ އެކަމިޝަނަށް ކެންޑިޑޭޓުން ހުށައަޅާފައިވާ މާލީ ބަޔާންތައް ދިރާސާ ކުރަމުން ކަމަށާއި އެ ބަޔާންތައް މި ހަފްތާ ތެރޭގައި ދިރާސާކޮށް ނިމޭނެ ކަމަށެވެ. އަދި ބަޔާންތައް ދިރާސާކޮށް ނިމުމުން މާލީ ބަޔާން ހުށަނާޅުއްވާ ކެންޑިޑޭޓުންގެ މައްސަލަތައް ޕީޖީ އޮފީހަށް ފޮނުވާނެ ކަމަށް ވެސް އޭނާ ވިދާޅުވިއެވެ.

ނިމިދިޔަ ރައްޔިތުންގެ މަޖިލީހުގެ އިންތިޚާބުގައި 386 ކެންޑިޑޭޓުން ވަނީ ވާދަކުރައްވާފައެވެ. 386 މެމްބަރުންގެ ތެރެއިން 39 ކެންޑިޑޭޓުން މާލީ ބަޔާން ހުށަނާޅުއްވާއިރު އޭގެ ތެރޭގައި މަޖިލީހަށް ހޮވި ވަޑައިގެންނެވި އެއްވެސް މެމްބަރަކު ނުހިމެނޭ ކަމަށް އީސީއިން ބުނެއެވެ. މާލީ ބަޔާން ހުށަނާޅާ ކެންޑިޑޭޓުންގެ ތެރޭގައި ހިމެނެނީ  އަމިއްލަ ގޮތުން 31 ކެންޑިޑޭޓޫން، ޕީޕީއެމް އިން ދެ ކެންޑިޑޭޓުން، މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީއިން ދެ ކެންޑިޑޭޓުން، އެމްޓީޑީއިން ދެ ކެންޑިޑޭޓުން، އަދާލަތު ޕާޓީ އާއި ޕީއެންސީ އިން އެއް ކެންޑިޑޭޓެކެވެ. 

ކެންޑިޑޭޓުންގެ މާލީ ބަޔާން ހުށައަޅަންޖެހޭނެ އެންމެ ފަހު ދުވަހެއްގެ ގޮތުގައި އީސީއިން ކަނޑައެޅީ މިދިޔަ ހޮނިހިރު ދުވަހުގެ 00:00 އާހަމައަށެވެ. 

އިންތިޚާބާ ބެހޭ ގާނޫނު ބުނާ ގޮތުން އިންތިޚާބާ ގުޅޭ މާލީ ކަންކަމާ ބެހޭ ގޮތުން ކޮށްފައިވާ މަޢުލޫމާތާ ތަކެތި ހިމެނޭ ގޮތުގެ މަތިން ރިޕޯޓެއް ތައްޔާރު ކޮށް އިންތިޚާބު ބާއްވާ ތާރީޚުން ފެށިގެން 21 ދުވަހުގެ ތެރޭގައި އިލެކްޝަންސް ކަމިޝަނަށް ހުށައަޅަން ޖެހެއެވެ. އެ ރިޕޯޓުގައި އިންތިޚާބާ ގުޅިގެން ކެންޑިޑޭޓު ކޮށްފައިވާ ޚަރަދުތަކުގެ ތަފްސީލާއި އިންތިޚާބުގައި ކެންޑިޑޭޓަށް ތާއީދު ހޯދުމަށްޓަކައި ކޮށްފައިވާ ޚަރަދުތައް ވަކިން އެނގޭގޮތަށް ހުށައަޅަން ޖެހެއެވެ. އަދި އިންތިޚާބަށް ޚަރަދު ކުރުމަށްޓަކައި ފައިސާ ހޯދި ގޮތުގެ ތަފްސީލާއި އިންތިޚާބާ ގުޅިގެން ކެންޑިޑޭޓަކު ޚަރަދުކުރުމަށްޓަކައި ނުވަތަ ބޭނުންކުރުމަށްޓަކައި ފައިސާ އާއި ތަކެތި ދިން ފަރާތްތަކާއި އެފަރާތްތަކުން ދިން މިންވަރުގެ ތަފްޞީލު ހިމަނަން ވާނެ ކަމަށެވެ.

އިންތިޚާބާއި ބެހޭ ގާނޫނު ބުނާ ގޮތުން އެ ގާނޫނުގައި ވަކި ގޮތަކަށް ކުރުމަށް ކަނޑައެޅިފައިވާ ކަމެއް އެނޫން ގޮތަކަށް ކޮށްފިމީހަކު ނުވަތަ ކުރަން އުޅެފި މީހަކު ކުށްވެއްރި ވެއްޖެނަމަ އެމީހެއްގެ އަދަބަކީ ހަ މަސްދުވަހާއި ދެ އަހަރާ ދެމެދުގެ މުއްދަތަކަށް ޖަލަށްލުން ނުވަތަ 6،000ރ. އާއި 24،000 އާ ދެމެދުގެ އަދަދަކުން ޖޫރިމަނާ ކުރުމެވެ.