ސުއޫދުގެ މައްސަލަ ބަލަން ފެށުމަކީ ފަނޑިޔާރުގެ އިސްލާހުކުރުމަށް ވާހަކަ ދައްކާ ފަރާތްތަކަށް ބިރުދެއްކުން: އެމްޑީޕީ
ސުއޫދު ހާޒިރުކުރީ ބުދަ ދުވަުގެ މެންދުރު
މަރުތައް ބަލާ ކޮމިޝަންގެ ރައީސް އަދި ކުރީގެ ބަންޑާރަ ނައިބު ހުސްނުއް ސުއޫދު
ރާއްޖެ ޓީވީގެ ފަލަސުރުޚީ ޕްރޮގްރާމުގައި ދެއްކެވި ވާހަކަތަކާ ގުޅިގެން މަރުތައް ބަލާ ކޮމިޝަންގެ ރައީސް އަދި ކުރީގެ ބަންޑާރަ ނައިބު ހުސްނުއްސުއޫދު ސުޕްރީމް ކޯޓަށް ހާޒިރުކޮށް ބަޔާން ނެގީ ފަނޑިޔާރުގެ އިސްލާހުކުރުމަށް ވާހަކަދައްކާ ފަރާތްތަކަށް ބިރުދެއްކުމަށް ކަމަށް އެމްޑީޕީން ބުނެފިއެވެ.
ރާއްޖެޓީވީގައި ދެއްކެވި ވާހަކަތަކާއިގުޅިގެން ކޯޓުތަކުގެ ބެލެނެވެރި ފަރާތްކަމަށްވާ ޑީޖޭއޭއަށް ސުއޫދު ހާޒިރުކޮށް ބުދަ ދުވަހު ވަނީ ބަޔާން ނަގާފައެވެ.
އެމްޑީޕީން ނެރުނު ބަޔާނެއްގައި ބުނީ ގާނޫނު އަސާސީގައާއި ގާނޫނުގައި ކުށެއްކަމަށް ބަޔާންކޮށްފައި ނުވާ ކަންކަމުގައި، ސްޕްރީމް ކޯޓަށް ހާޒިރުކޮށް މައްސަލަ ބަލަން ފެށުމަކީ ފަނޑިޔާރުގެ އިސްލާހުކުރުމަށް ވާހަކަދައްކާ ފަރާތްތަކަށް ބިރުދެއްކުން ކަމަށާއި ފަނޑިޔާރުގެއާ މެދު ހިޔާލުފާޅުކުރުމުގެ ސަބަބުން މީގެ ކުރިން ވެސް އެކި ފަހަރުމަތިން ސްޕްރީމް ކޯޓުން ވަނީ ސުއޫދު ސަސްޕެންޑް ކޮށްފައިވާކަމަށެވެ.
ޓީވީ ޕްރޮގްރާމްގައި ސުއޫދު ދެއްކެވީ ފަނޑިޔާރުގެއިން އިންސާފު ނުލިބޭތީ ރާއްޖޭގެ ގިނަ މީހުންނާއި ބޭރުގެ ފަރާތްތަކުން ވެސް ދައްކާ ވާހަކަތައް ކަމަށާއި ގާނޫނާ އެއްގޮތަށް ދެފުށްފެންނަ ގޮތަށް ހުރިހާ އިޖްރާޢަތްތަކެއް ފުރިހަމަ ކުރުމަށްފަހުގައާއި، ފަނޑިޔާރުންނަށް ޖަވާބުދާރީވުމުގެ ފުރުސަތު ދިނުމަށްފަހުގައި މެނުވީ ފަނޑިޔާރުން ވަކިކުރެވިގެން ނުވާނޭކަމަށް ސުއޫދު ބާރުއަޅުއްވާފައިވާ ކަމަށެވެ.
ދިވެހިރާއްޖޭގެ އަދުލު އިންސާފުގެ ނިޒާމާއި ފަނޑިޔާރުގެއާ މެދު ވަރަށް ގިނަ ރައްޔިތުންނާއި އަދި ބައިނަލްއަގުވާމީ ފަރާތްތަކުން އިންތިހާއަށް ކަންބޮޑުވުން ފާޅުކޮށް ރާއްޖޭގެ ޝަރުއީ ނިޒާމް ވަގުތުން އިސްލާހުކުރުމަށް ގޮވާލަމުންދާ ކަމަށްވެސް ބަޔާނުގައި ބުނެފައިވެއެވެ.
އެގޮތުން ފަނޑިޔާރުންނާއި ވަކީލުންނާ ބެހޭ އދ. ގެ ހާއްސަ މުޝީރު ވެސް މީގެ ކުރިން ރާއްޖެ ވަޑައިގެން ދިރާސާކުރެއްވުމަށްފަހު ރާއްޖޭގެ ވަކީލުން ސަސްޕެންޑްކުރުމާއި، އަދި ޝަރުއީ ނިޒާމު އޮތް ހާލަތާމެދު ބޮޑެތި ކަންބޮޑުވުންތައް ފާޅުކުރައްވާފައިވާކަން އެމްޑީޕީގެ ބަޔާނުގައި ވަނީ ފާހަގަކޮށްފައެވެ.
މީގެ އިތުރުން އދ. ގެ ހިޔުމަން ރައިޓްސް ކޮމިޝަނާއި، ކޮމެންވެލްތާއި، ޔޫރަޕިއަން ޔޫނިއަން އާއި އެކިއެކި ޑިމޮކްރެޓިކް ގައުމުތަކުންނާއި ދުނިޔޭގެ ބޮޑެތި ޖަމިއްޔާ ޖަމާއަތްތަކުން ވެސް ރާއްޖޭގެ ޝަރުއީ ނިޒާމާ މެދު އިންތިހާއަށް ކަންބޮޑުވުން ފާޅުކޮށް އެކަންކަން ވަގުތުން އިސްލާޙުކުރެއްވުމަށް ގޮވާލަމުންދާ ކަމަށް އެމްޑީޕީގެ ބަޔާނުގައި ބުނެފައިވެއެވެ
ޜާއްޖެޓީވީގެ ފަލަ ސުރުޚީގައި ވާހަކަ ދައްކަވަމުން ސުއޫދު ވިދާޅުވެފައިވަނީ ސުޕްރީމް ކޯޓުގެ ފަނޑިޔާރުންގެ މައްޗަށް އިތުބާރު ނެތް ކަމަށާއި އެ ހުރިހާ ފަނޑިޔާރުން މަގާމުން ދުރުކުރަން ޖެހޭ ކަމަށެވެ. ސުޕްރީމް ކޯޓުން މިދިޔަ އަހަރުގެ ފެބްރުއަރީ މަހު ނެރުނު އަމުރަށް ފަހު ހިނގައި ދިޔަ ކަންކަމުން ސުޕްރީމް ކޯޓުގެ ފަނޑިޔާރުންނަށް އިތުބާރު ނެތް ކަމަށާއި އެހެންކަމުން އެ ހުރިހާ ބޭފުޅުން ވެސް އެ މަގާމުން ދުރުކުރަން ޖެހޭނެ ކަމަށް ގަބޫލުކުރައްވާ ކަމަށް ސުއޫދު ވަނީ ވިދާޅުވެފައެވެ.
ޝަރުއީ ދާއިރާ އިސްލާހު ކުރަންޖެހޭ ކަމަށް ވިދާޅުވެ ސުއޫދު ވިދާޅުވީ ޝަރުއީ ދާއިރާ އިސްލާހު ކުރުމަށްޓަކައި ދަށު ކޯޓުތަކުން ފެށިގެން ސުޕްރީމް ކޯޓާ ހަމައަށް ވެސް ބަދަލުތަކެއް ގެންނަން ޖެހޭ ކަމަށާއި ޖުޑީޝަލް ސާވިސް ކޮމިޝަން (ޖޭއެސްސީ)ގެ ކަންކަން ތަރުތީބުކޮށްފައި ވަނީ ފަނޑިޔާރުންނާ ގުޅޭ ގޮތުން ހުށަހަޅާ މައްސަލަތައް ނުބެލޭ ގޮތަށް ކަމަށްވާއިރު އެކަންކަން އިސްލާހު ކުރަންޖެހޭ ކަމަށް ފެނިވަޑައިގަންނަވާ ކަމަށް ވިދާޅުވިއެވެ.
