ޑރ.އަފްރާޝީމް މަރު މައްސަލާގައި އާންމުކުރަން ޖެހޭ އައު މައުލޫމާތެއް ނެތް: ރިޔާޒު
20 އެޕްރީލު 2019 | ހޮނިހިރު 06:01ހުރިހާ މައުލޫމާތެއް ފުލުހުންގެ އިދާރާގައި ހުންނާނެ
މަޝްހޫރު ދީނީ އިލްމުވެރިޔާ ޑރ.އަފްރާޝިމް އަލީ
މަޝްހޫރު ދީނީ އިލްމުވެރިޔާ އަދި އުނގޫފާރު ދާއިރާގެ ރައްޔިތުން މަޖިލީހުގެ ކުރީގެ މެންބަރު ޑރ.އަފްރާޝިމް އަލީގެ މަރުގެ މައްސަލާގައި އާންމު ކުރަންޖެހޭ އިތުރު އައު މައުލޫމާތެއް ނެތް ކަމަށް އޭރު ޕޮލިސް ކޮމިޝަނަކަށް ހުންނެވި އަދި މިހާރުގެ ޖުމްހޫރީ ޕާޓީގެ ޕާލިމަންޓްރީ ގްރޫޕްގެ ލީޑަރު އަބްދުﷲ ރިޔާޒް ވިދާޅުވެއްޖެއެވެ.
ޕީއެސްއެމްގެ ''ރާއްޖެމިއަދު'' ޕްރޮގްރާމްގައި ރިޔާޒު ވިދާޅުވީ އަފްރާޝީމްގެ މަރު މައްސަލާގައި މިހާތަނަށް ލިބިވަޑައިގެންފައިވާ ހުރިހާ މައުލޫމާތެއް ހިއްސާކޮށްފައިވާނެ ކަމަށާއި، އެމައުލޫމާތުތައް ފުލުހުންގެ އިދާރާގައި ހުންނާނެ ކަމަށެވެ. އަދި މިހާރު އާންމު ކުރަންޖެހޭ އައު މައުލޫމާތެއް ނުހުންނާނެ ކަމަށް އޭނާ ވިދާޅުވިއެވެ.
ރައީސް ސޯލިހު ސަރުކާރުން އުފެއްދެވި ރިޔާސީ ކޮމިޝަނަށް އަލިއަޅުއްވާލައްވާ ރިޔާޒު ވިދާޅުވީ ފުލުހުންގެ އިދާރާގައި ހުރި މައުލޫމާތުތައް އެކޮމިޝަނުން ހޯދާފައިވާ ކަމަށް އުންމީދުކުރާ ކަމަށެވެ. އަދި ރިޔާޒު ވިދާޅުވީ ކޮމިޝަނުން ތަހުގީގު ކުރާ މައްސަލަތަކަށް އަބަދު ވެސް އެއްބާރުލުންދޭނެ ކަމަށާއި، ނަމަވެސް ރިޔާސީ ކޮމިޝަނަށް އޭނާ އަމިއްލަ އަށް ވަޑައިގެން މައުލޫމާތު ދިނުމުގެ ބޭނުމެއް ނެތް ކަމަށެވެ. އަދި ކޮމިޝަނުން އޭނާއާ ސުވާލު ނުކުރަނީ ފުލުހުން އެމައުލޫމާތު ދީފައިވާތީ ކަމަށް ގަބޫލުކުރެވޭ ކަމަށް އޭނާ ވިދާޅުވިއެވެ.
އަފްރާޝީމް މަރުގެ މައްސަލާގައި ދޭންޖެހޭ އިތުރު އައު މައުލޫމާތެއް ނެތް ކަމަށް ރިޔާޒު ވިދާޅުވެފައިވާއިރު މީގެ ކުރިން ރިޔާޒު ވިދާޅުވީ އަފްރާޝީމްގެ މަރާ ބެހޭ މައުލޫމާތު، އެކަށީގެންވާ ވަގުތު ޖެހުމުން އާންމުކުރާނެ ކަމަށާއި، ނަމަވެސް އެފަދަ މާހައުލެއް މިހާރު ނެތް ކަމަށެވެ. ނަމަވެސް، ގިނަ ދުވަސްތަކެއް ފާއިތުވެގެން ގޮސްފައިވާއިރު އެމައުލޫމާތު އާންމުކޮށްފައިނުވާތީ ގިނަ ބައެއްގެ ފާޑު ކިޔުން ރިޔާޒަށް ވަނީ އަމާޒުވެފައެވެ.
ޑރ.އަފްރާޝީމް އަވަހާރަ ކޮށްލީ، 2012 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހުގެ ރޭ ދަންވަރު ސްޓެލްކޯ ސަރަހައްދުގައި ހުންނަ ހ. ފުންވިލު ސިޑި ގޮޅި ސަރަހައްދުގައެވެ. އަފްރާޝީމް އަވަހާރަ ކޮށްލި މައްސަލައާއި ގުޅިގެން ދެ މީހެއްގެ މައްޗަށް ދައުލަތުން ދައުވާ ކުރި ނަމަވެސް މައްސަލަ ސާބިތުވީ ހ. ލޮބީ ހުސެއިން ހުމާމުގެ މައްޗަށެވެ.
