ދިރާގުގެ 30 ވަނަ އަހަރީ ޢާންމު ޖަލްސާ މިމަހު 25ގައި!

ދިވެހިރާއްޖޭގެ ގުޅުން ޕލކ (ދިރާގު)ގެ 30 ވަނަ އަހަރީ ޢާންމު ޖަލްސާ 25 އޭޕްރިލްގައި ބާއްވާ ގޮތަށް ނިންމައިފިއެވެ.

ދިރާގުން ބުނީ މިޖަލްސާ އޮންނާނީ 25 އޭޕްރިލް ދުވަހުގެ ރޭ 8:15 ގައި ކުރުނބާ މޯލްޑިވްސްގެ ކޮންވެންޝަން ހޯލުގައި ކަމަށެވެ.

ދިރާގުގެ ޙިއްޞާދާރުންގެ ރަޖިސްޓަރީގައި ހިމެނިވަޑައިގަންނަވާ ހިއްސާދާރުންނަށް މިޖަލްސާގައި ބައިވެރިވުމަށް ރެޖިސްޓަރ ކުރުމަށް މިހާރު ވަނީ ހުޅުވާލެވިފައިއެވެ. ރެޖިސްޓްރޭޝަން ފޯމްތައް ދިރާގު investor-relations@dhiraagu.com.mv ވެބްސައިޓުން ޑައުންލޯޑް ކުރެވޭނެ ކަމަށް އެކުންފުނިން ބުންޏެވެ.

އަދި ފޯމް ފުރިހަމަކުރެއްވުމަށްފަހު އީމެއިލްއަށް އީމެއިލްކޮށް ނުވަތަ ދިރާގު ހެޑް އޮފީހުގެ ރިސެޕްޝަނަށް ހަވާލުކޮށްލެވޭނެ ކަމަށާއި އަދި ޙިއްސާދާރުންނަށް ލިންކު މެދުވެރިކޮށް އޮންލައިންކޮށް ރެޖިސްޓަރ ކުރެވޭނެއެވެ.

ޙިއްޞާދާރުން ރަޖިސްޓަރީ ކުރުމުގެ ސުންގަނޑިއަކީ 24 އޭޕްރިލް 2019ގެ 20:15 އެވެ. އަދި ޙިއްޞާދާރުންގެ ބަދަލުގައި ވަޑައިގަންނަވާ ފަރާތްތައް ރަޖިސްޓަރީ ކުރުމުގެ ސުންގަނޑިއަކީ 23 އޭޕްރިލް 2019 ގެ 20:15 ގައި ކަމަށް ދިރާގުން ބުންޏެވެ.

ނިމިދިޔަ އަހަރުގެ ފައިދާ އިން ހިއްސާއަކަށް 11.91ރ. ބެހުމަށް ކުރިއަށް އޮތް އަހަރީ އާންމު ޖަލްސާގައި ފާސްކުރަން ހުށަހެޅުމަށް ދިރާގުންވަނީ ނިންމާފައެވެ.

ދިރާގުގެ ޑިރެކްޓަރުންގެ ބޯޑުން ވަނީ 2018 ވަނަ އަހަރުގެ ޖުމްލަ ހިއްސާގެ ފައިދާގެ ގޮތުގައި 905،160،000 (ނުވަ ސަތޭކަ ފަސް މިލިއަން އެއް ލައްކަ ފަސްދޮޅަސް ހާސް) ރުފިޔާ ބަހަން ހުށަހަޅަން ނިންމާފައެވެ. އެއީ ކުންފުނީގެ ސާފު ފައިދާގެ %100 އެވެ.

ދިރާގުން ބުނީ 2018 ވަނަ އަހަރުގެ ފައިނަލް ޑިވިޑެންޑްގެ ގޮތުގައި އަހަރީ އާންމު ޖަލްސާގައި ހިއްސާދާރުން ކަނޑައަޅާ ފައިދާ ބަހާނީ ކުންފުނީގެ ކުރިއަށް އޮތް އަހަރީ އާންމު ޖަލްސާގައި އިއުލާނުކުރާ 'ބުކް ކްލޯޝަރ ޑޭޓް' ގައި ކުންފުނީގެ ރަޖިސްޓަރގައި ވާ ހިއްސާދާރުންގެ މެދުގައި ކަމަށެވެ.