ކޮރަޕްޝަނާއި ގުޅޭ ތަހުގީގުތަކުގައި އެންމެން އެއްބާރުލުން ދޭން ޖެހޭ: އަކްރަމް
16 އެޕްރީލު 2019 | އަންގާރަ 17:05ރައްޔިތުންނަށް ހިދުމަށް ކޮށްދެއްވުމުގެ ޝަރަފު ލިބިވަޑައިގަތުމަކީ އުފަލެއް ކަމަށް ވިދާޅުވި
އަކްރަމް މަގާމުގެ ފަތްކޮޅާއި ހަވާލުވެވަޑައިގަތުމުގެ ތެރެއިން
ސަރުކާރުން ގެންގުޅޭ ޒީރޯ ޓޮލެރެންސްގެ ދަށުން ކޮރްޕަޝަނުގެ ތުހުމަތު ކުރެވި ތަހުގީގު ހިންގޭ ސަރުކާރުގެ ހުރިހާ ފަރާތްތަކުން ވެސް އެކަމަށް އެއްބާރުލުން ދެއްވަން ޖެހޭ ކަމަށް ނޭޝަނަލް ޕްލޭނިންގް އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
އެމްއެމްޕީއާރްސީގެ ހިޔާނާތުގެ ރިޕޯޓްގައި އެސްއޯއެފް ކުންފުނިން ޑޮލަރު ގަތް މީހުންގެ ނަންތަކުގެ ތެރޭގައި އަކުރަމްގެ ނަން ހިމެނުމުން މަގާމުން އެކަހެރި ކުރެއްވުމަށް ފަހު އަކްރަމްގެ ސަސްޕެންޝަން އުވާލާފައިވަނީ އަންގާރަ ދުވަހުއެވެ.
އަންގާރަ ދުވަހު އަކްރަމް ކުރެއްވި ޓްވީޓެއްގައި ވިދާޅުވީ، އަލުން މަގާމުގެ މަސްއޫލިއްޔަތުތަކާ ހަވާލުވެވަޑައިގަތުމަށް ފުރުސަތު ލިބިވަޑައިގަތުމުން އުފާކުރައްވާ ކަމަށެވެ. އަދި ރައީސް ސޯލިހުގެ ސަރުކާރުގައި ރައްޔިތުންނަށް ހިދުމަށް ކޮށްދެއްވުމުގެ ޝަރަފު ލިބިވަޑައިގަތުމަކީ ލިބޭ އުފަލެއް ކަމަށް ވެސް ވިދާޅުވިއެވެ.
އަކްރަމްގެ ސަސްޕެންޝަން އުވާލާފައި ވަނީ އެންޓި ކޮރަޕްޝަން ކޮމިޝަނުން (އޭސީސީ) އާ ފުލުހުން އެ މައްސަލަ ތަހުގީގުކޮށް ބެލުމަށް ފަހު ކަމަށް ރައީސްގެ ތަރުޖަމާނު އިބްރާހިމް ހޫދު ވިދާޅުވެފައިވެއެވެ.
އެމްއެމްޕީއާރްސީގެ ހިޔާނާތުގެ ރިޕޯޓް ދައްކާ ގޮތުން އަކްރަމްގެ އެކައުންޓަށް ވަނީ އެސްއޯއެފް އިން 30000 ޑޮލަރު ޖަމާކޮށްފައެވެ. އަކުރަމްގެ އިތުރުން ސަސްޕެންޑް ކޮށްފައިވާ ޔޫތް މިނިސްޓަރު އަހުމަދު މަހްލޫފުގެ ސަސްޕެންޝަން ވެސް ވަނީ އަންގާރަ ދުވަހު އުވާލާފައެވެ.
އޭސީސީން ނެރުނު ރިޕޯޓްގައިވާ ގޮތުން އެމްއެމްޕީއާރުސީން 57 ރަށަކާއި ފަޅެއް ދޫކޮށްފައި ލިބުނު ފައިސާގެ ތެރެއިން އެކުއިޒިޝަން ކޮސްޓްގެ ގޮތުގައި 77.5 މިލިއަން ޑޮލަރު ލިބެން ޖެހޭ އިރު އެމްއެމްޕީއާރުސީގެ އެކައުންޓަށް ޖަމާކޮށްފައި ވަނީ އެންމެ 12.5 މިލިއަން ޑޮލަރު (192.75 މިލިއަން ރުފިޔާ) އެވެ.
ހިޔާނާތްވީ 1.3 ބިލިއަން ރުފިޔާއަށް ވާ ފައިސާގެ ތެރެއިން ބޮޑު ބައެއް ޖަމާކޮށްފައި ވަނީ އެސްއޯއެފްގެ އެކައުންޓަށެވެ. އަދި އެސްއޯއެފް އިން ވަނީ އެ ފައިސާތައް އެކި އެކައުންޓްތަކަށް ޖަމާކޮށްފައެވެ. މީގެ ތެރޭގައި ރާއްޖޭގެ ބޮޑެތި ކުންފުނިތަކާއި، މަޖިލިސް މެމްބަރުން އަދި ވިޔަފާރިވެރިން ވެސް ހިމެނެއެވެ.
