ބިގްގެ މައްސަލަ ޖުޑީޝަލް ރިވިއުއަކަށް ދިއުމަށް އެޓާނީ ޖެނެރަލަށް ހުށައަޅަނީ

ބިޒްނަސް އިމޭޖް ގްރޫޕް(ބިގް) ކުންފުންޏަށް 30 މިލިއަން ރުފިޔާ ދައުލަތުގެ ފައިސާއިން ދޫކޮށްފައި ވާތީ ޖުޑީޝަލް ރިވިއުއަކަށް ދިއުމަށް އެޓާނީ ޖެނެރަލަށް ހުށައެޅުމަށް މާލިއްޔަތު ކޮމެޓީއިން ނިންމައިފިއެވެ.

މާލިއްޔަތު ކޮމެޓީއިން އަންގާރަ ދުވަހު ބޭއްވި ޖަލްސާގައި ނިންމާފައިވަނީ އެންޓިކަރަޕްޝަން ކަމިޝަން(އޭސީސީއިން) އެކޮމެޓީއަށް ފޮނުވި ސިޓީއާއި އެކު އެޓަރނީ ޖެނެރަލްއަށް ފޮނުވުމަށެވެ.

ކުރީގެ ރައީސް މުހައްމަދު ނަޝީދުގެ ވެރިކަމުގައި އުފެއްދި މޯލްޑިވްސް ނެޝަނަލް ބްރޮޑްކާސްޓިން ކަމިޝަން(އެމްބީސީ)އިން އަމިއްލަ ކުންފުންޏެއް ކަމަށްވާ ބިގްއަށް 78 މިލިޔަން ރުފިޔާ ދޭން ޖެހި އޭގެ ތެރެއިން 30 މިލިޔަން ރުފިޔާ ޕީއެސްއެމުން ދީފައިވަނީ މިދިޔަ ފެބްރުއަރީ މަހުގެ ތެރޭގައެވެ. ބިގަށް 78 މިލިއަން ރުފިޔާ ދޭން ސިވިލް ކޯޓުން ހުކުމް ކުރީ ކުރީގެ ރައީސް އަބްދުﷲ ޔާމީންގެ ސަރުކާރުން ޖޫން 7، 2016 ގައެވެ.

އެކަމާ އެތައް ބައެއްގެ ފާޑު ކިޔުން މިސަރުކާރަށް އަމާޒުވިއެވެ.

ތިމަރަފުށީ ދާއިރާގެ މެމްބަރު މުހައްމަދު މުސްތަފާ ވިދާޅުވީ 78 މިލިއަން ރުފިޔާ ދިނުމަށް ހުކުމް ކޮށްފައިވާ ކަމަށާއި 30 މިލިއަން ރުފިޔާ ދޫކުރުމަކީ ގޯހެއް ކަމަށެވެ. އެހުކުމަކީ އުފެދުމުގައި ވެސް ގޯސް ހުކުމެއް ކަމަށް ވިދާޅުވިއެވެ. އަދި ޝަރުއީ މުޅި މަރުހަލާ ނުނިމެނީސް ހުކުމް ކުރުމަކީ ގޯސްކަމެއް ކަމަށް ވިދާޅުވިއެވެ.

ކުޅުދުއްފުށީ އުތުރު ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ އެމައްސަލަ އެޓަރނީ ޖެނެރަލަށް ހުށައެޅުމަށް ނިންމާ ކަމަށާއި އެމައްސަލައިގައި ކުރިއަށް ދިއުމަށް އެޓަރނީ ޖެނެރަލްގެ އޮފީހަށް ހުށަހަޅާއިރު އޭސީސީގެ ސިޓީއާއެކު ހުށައެޅުމަށް ބޭނުންފުޅުވާ ކަމަށެވެ.